Yuuda 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Bariito

¹ Eti khadaaba soochiiro a ani, Yuudahi bowꞌda Yeesso Kiriisteenye, walaal Yaakoobee. ꞌDooꞌdi an ichiiro la a ꞌdooꞌdi Waakkhi Aabbaheene wahe toro la ꞌdoono, Yeesso Kiriisto la toorribo.

² Waakh ba uur atin isoonugleesta, nebey atin kakaala, ꞌdoonin atin tusta. Toro la usu ba wahanyeyyoha tuumman weyti atin ikasookhaya.

Waakh ꞌdooꞌdi worassi beenaat cheeko a hukkuma

³ Aalasseeyki an weyti ꞌdoono, geeddi an wori ribnaanki inno isleegisanno miinsan atin isoochiiro kamaldi, wihi an arge a mehe ya, wohoo addane uur ikasoodihe atin isoochiira. A atin hawwaasda, kakhuufnaanki atin Kiriisto kakhuuftaane ꞌdooꞌdi Waakh maantoo kalday on dahan lagesse, jirtuu la liikanokhan hol kadowa.

⁴ Iꞌdi tahe ꞌdooꞌdoo dagsi ka goytiin soogele a jira. Saggi archiiy Yeedi Waakh liikachiiruu ꞌdooꞌda sina a liigooche. Icho a ꞌdooꞌdi Waakh igaranne, haaggi Waakhe buure baabulo, jitoo icho sohoꞌddarri kaassohtaan kayeelo. Toro la Yeesso Kiriistohi Kamureenki keleyenye anto tuumman leh a ꞌdiiꞌddanyahiin.

⁵ Toolla waha tuumman a garattaan. Eheetteey laka, wihi an atin kasooꞌhelin ꞌdoono Kamuri goorat yaafohi Issiraayel ili Miissiri kasoobahche, iꞌdaasenyi yomboka eti tuummane usu irummeysan a bakkiche.

⁶ Wihi addane an atin kasooꞌhelcho, a herti Waakhe goorat antohi Waakh siiche ka hili lasiiche ibuuhinne, iꞌdaasenyi meessiche katabte. Waakh icho biingoyyohi armaanjireene mugꞌdi goyaka kahide, ichoowka Ibeenki weene Waakh ꞌdooꞌd hukkumo yateeh.

⁷ Iꞌdaas on u ꞌdooꞌdi ilkerengeetti Soodom ichoow ki ilkerengeetti Goomorah ichoow ilkerengeetohi addane isoodow ba jiroti iꞌdi ti hertaasenye jireen. Icho laka sohoꞌddarri ichoow jiti mejel ichoow deyyeho ba isleeurꞌdaan a kheeroocheen. ꞌDooꞌdaas la iyookkoti ꞌdooꞌdi berri ꞌdabi jirtuu ijitin ka sina latuso yitaaheen.

⁸ Iꞌdaasu laka ꞌdooꞌda wori beenaat enenyet abcho jeenteti wihi icho kiissillootaan u sartichooda biꞌdirroochaane, antohi Waakh ꞌdiiꞌdaane, toro herti Waakh igafaan.

⁹ Iꞌdaasenyi herti Waakhe weene Miikayel layadeeh laka maanti iche ichoow Seytaan ba eti sar Muusa khaato isleemarmeen, walah iche Seytaan kacheekatte mele, iꞌdaasenyi “Kamur a kileejaakho,” iche itidah.

¹⁰ Iꞌdaasenyi ꞌdooꞌda wihi icho foolicho ikhabine leeabaarramaan. Icho laka iꞌdi binahi yibaate mal ikhabin u wihi uuricho kasoobaho on gartaan. Wahanyeyyoha on icho bakkichá.

¹¹ Sinati icho sugto eenna a buure. A mehe icho jiti suujenye goorat Kaayin tabe tabeen! Toro la jeenteti icho chilim iꞌdoonaan u, uskeeli goorat Baalam gele icho laka ioryeen. Icho laka yeeddaagiwwaayyo katuumaan iꞌdi ꞌdooꞌdi goorat Koorah woyo Kamur daagiwwaayuu.

¹² ꞌDooꞌda a iꞌdi duksakki atin biꞌdirroocho chirri atin daawti ꞌdooꞌd Kiriisto isleegolossati atin gessaan. Icho heebtoo rucchul laka ma argaane, toro la wihi awtichooda on rirrihaan. Icho a iꞌdi mirisi hafar guuricho, bicche laa. Icho a iꞌdi geeyohi hayohi gurnaan lasugo ka gurnaankoo rucchul laka ikhabin. Icho hiiyyaye lakasoobukkhiche. Icho rumanka a tuumeen.

¹³ Lakhaanyoti icho gelaan la a iꞌdi hamboti weyti buurenye chaafo khabto beyti buure ka hafari buurenye irti uskul kahcho sookhaatto. Icho a iꞌdi yiyyihimohi baabe Kamur mugꞌdihi reebenye armaanjireen meel igesso.

¹⁴ Eti Eenog layadeehe kholoti teebannaatteete Aadam sooraahte ka jire, orey on wori Waakhe ꞌdooꞌda miinsan kaayyeede, wihi us yidah, “Bal yeya, Kamur hertiisti munyayyeenye aliffe goosso khabaayi a yamiit.

¹⁵ Ulla ꞌdooꞌd tuumman a hukkuma. ꞌDooꞌdi tuummane Waakh igaranne uskeel leh, wihi Waakh ꞌdiiꞌdo tuumman yeele ichoow yeedichoki tuummane sussuujenye Waakh miinsane icho esseen ka sina igoocha.”

¹⁶ ꞌDooꞌda kol dakkhan nyunnyuuto ma ꞌdiicho, iriir on kajiraane, suujoonki uurassicho imoonaan on yeelaan. Icho a iskhukkhummanaachaane, ꞌdooꞌdi addan koolichaane ꞌdee wihi icho ꞌdoonaan ꞌhelaan.

Kakhuufnaanki atin Kiriisto kakhuuftaan ka mujjum tolola

¹⁷ Iꞌdaasenyi aalasseeyki an weyti ꞌdoono, atin la wihi ergaano Yeesso Kiriistohi Kamureene orey atin icheekte kasooꞌhela.

¹⁸ Wihi iche atin itidah kallaayo, “Ibeenneti ꞌdaꞌddaboot ꞌdooꞌdi ꞌdooꞌdi addan kachaarti, wahanyeyyohi wihi Waakh ieheynane uurassicho imoonaan on yeelo a soobaha.”

¹⁹ ꞌDooꞌdane seley atin goggoocha. Rubeyti Waakh goycho ma kijirto gone, suujoonki harrata on yeelaan.

²⁰ Iꞌdaasenyi atinhi aalasseeyki an weyti ꞌdoonee, taba kakhuufnaanki weyti lagane atin Kiriisto kakhuuftaan ka ismiigoocha. Chaꞌatin Waakh wahattaan la Rubeyti Munyee a atin woyto.

²¹ Geeddi atin jiroti jirtuu imassanne Yeesso Kiriistohi Kamureene uurnugleeliis ka atin siicho sugtaan, ꞌdooninti Waakh atin ikhabo kafiddiya.

²² ꞌDooꞌdi uurlammaal khabo inaha.

²³ ꞌDooꞌdi addan la ꞌdab goya kasootogda, riba. Gaasoo la nahtinti roorroti Waakh khabto tusda, iꞌdaasenyi atin laka ubbaarretichoti derdeere ildeerroti suujenye icho yeelaan ka labiꞌdirrooche ꞌdiiꞌda.

Weysihi Waakh lakakoolicho

²⁴ Toollaka weynaan tuumman a ti Waakkhi tarraantarran atin kaholin yabuuꞌde, toro la atinhi wohoo rucchul laka atin liikacheekan hamaadi buure khabtaani ortiisti ababto atin keeno.

²⁵ Toro la Yeesso Kiriistohi Kamureene ka, Waakkheenki kaldaye ꞌDoorribeheene koolo ichoow kussi ichoow miig ichoow anto ba wihiissa on a yitaaheen geeddi harra liisoouumin ichoow toolla ichoow jirtuu tuummamba. Aamiin.