Yoohana 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Makhaabassoo makhaabaloo kiche ieheynan leeuꞌdurte Yeesso liikeena

¹ Uuꞌ tol massate, Yeesso Hali Geeyohi Oolif irte.

² Ibeenki kaas sooraaho baryo ka, toro Yeesso minki Waakhe buure isoonokhte. ꞌDooꞌd tuumman la kasoourure, ulla orronte, ꞌdooꞌd walah abche.

³ Tagaammeti amurre ichoow Farissaayo ba makhaabassoo ichehi makhaabaloo kiche ieheynan leeuꞌdurto lakhabte sookhaateene, enenyet ortiis keeneen.

⁴ Wihi iche Yeesso itidah, “Eti ween, makhaabassa ichehi makhaabaloo kiche ieheynan leeuꞌdurto iche lakhabte.

⁵ Amurre Muusa ka la, oboorrihi iꞌdaase dagahe lakaseya layagiis. At la mehe tadeeh?”

⁶ Icho la jeenteti icho wahaas iworsateen, Yeesso angey gelin ꞌdoonaane ꞌdee jitoo icho usu kacheektaan khabaan. Iꞌdaasenyi Yeesso gulguubsate farriis ka il chirchiire.

⁷ Geedda icho toollaane yeedaas wowworsataan, Yeesso fit tolossate, wihi us iyidah, “Bal etiinki uskeel laa, kolooraat makhaabal dagah a kaseyo.”

⁸ Toro gulguubsate il chirchiire.

⁹ Chirri icho waha daageen ka, icho tuumman seley tabeene, tattakkay ka irteen. Kolooraat la araarrinye iratte, ichoowka Yeesso ichoow makhaabál kalday sooꞌhadeen.

¹⁰ Yeesso fit tolossate, wihi us makhaabál worsate, “Weela, ꞌdooꞌdi kootte kicheekti meeke? Et uskeel kigoocho mele?”

¹¹ Makhaabale la wihi iche ilaabte, “Eti weenoow ebba.” Yeesso la wihi us iyidah, “Annaka uskeel ma kigoocho gon. Tabe, jirotaahti haꞌdaabeet ꞌdii.”

Yeesso a iꞌdi banayhi ꞌdooꞌdi harra kajiro

¹² Yeesso toro ꞌdooꞌd leeyyeede wihi us iyidah, “An a banayhi harra. Eti tuummane isooraaho, jirtuu mugꞌdi goya ma kaassohti, iꞌdaasenyi banayhi jiro lakeelo siicha.”

¹³ Farissaayo la wihi iche Yeesso itidah, “At toolla awtaahha on kaayyeedda, gartaah rum mee.”

¹⁴ Yeesso wihi us ilaabe, “Chirri an awteey kaayyeedo laka, wihi an eldi a rum. Iꞌdi tahe inti an kiimiy a garda, toro la inti an isohdi a garda. Iꞌdaasenyi atin inti an kiimiy ma garattaane, ommos inti an isohdi ma garattaan.

¹⁵ Atin jiti weeli enenyete walah kagoossaan, ani la et an uskeel igoocho mele.

¹⁶ Iꞌdaasenyi chiꞌ kootte incheenka an ꞌdooꞌd hukkumo, jiti an ꞌdooꞌd kahukkumo a ki rummaat. A mehe an waha keley ma yeelo, Aabbaheeyki isooerge a ileejira.

¹⁷ Amurretiin goyaka wihi chiiran, ‘Chirri et lamma garti iche laabto too kalday tahe, aytaas a rum.’

¹⁸ An rumanka awtaaya kaayyeeda, toro la Aabbaheeyki ani isooerge laka garteey a laaba.”

¹⁹ ꞌDeerka wihi icho Yeesso worsateen, “Aabbahaah meeke?” Yeesso wihi us ilaabe, “Atin ani ma igarattaane ommos Aabbaheey laka ma garattaan. Chirri kootte atin ani igarattaan, Aabbaheey laka a garattaan gon.”

²⁰ Yeesso inti minki Waakhe buure ka saanduukhi sadakha lakachibo yaal, iche ꞌdooꞌd walah kaabche, toro wahaas tuumman keesse. Et usú khabte la mele, a mehe ibeenkiis uliba a ankhanyahee.

Yeesso toro saggi us serey ikayimiy ꞌdooꞌd icheeka

²¹ Yeesso toro wihi us icho iyidah, “An a irda, atin la a iyowattaan. Iꞌdaasenyi inti an irdi ma tamiitiin. Uskeeliin goya katuuntaan.”

²² Jeenteti waha u, ewweenki Yaꞌhuud wihi us isworsate, “A isyagiis? Jeentetaase ‘Inti an irdi, ma tamiitiin,’ iessa?”

²³ Iꞌdaasenyi Yeesso wihi us iyidah, “Atin a ki ilane, anna a ki saraat. Atin a ki harratane, anna ki harrata mee.

²⁴ Jeentaase uskeeliin goya katuuntaan atin ikiidah. Chirri atin eti an ahe an atin isoocheeke irummeysan, uskeeliin goya katuuntaan.”

²⁵ Iche la wihi iche Yeesso worsatte, “At a ayyo?” Yeesso la wihi us ilaabe, “An a eti an uus uumaccho ka an atin isoocheeke on.

²⁶ Wihi buurenye atin miinsane an adeehe toro atin kahukkumo a jiraan. Iꞌdaasenyi eti isooerge a ki rum leh. Anna wihi an usu kadaage on ꞌdooꞌdi harrata icheeka.”

²⁷ Icho la saggi Yeesso wor Aabbahiis ikayeyyeedo ma aban.

²⁸ ꞌDeerka wihi us iyidah, “Maanti atin Ínam Aadam massalaaba ka serey geesseen, saggi an etaas iahe, a abattaan. Toro la saggi an wohoo rucchul laka miigteey ka iyeeline, iꞌdaasenyi an wihi Aabbaheey iabche on icheeko a abattaan.

²⁹ Ki isooerge la ma ikatabine, a ileejira, iꞌdi tahe an kol tuumman wihi usu kahamaadicho on yeela.”

³⁰ ꞌDooꞌdi buurenye yeeda Yeesso essi daage, Yeesso rummeeste.

Weeli Waakh enenyet rumanka a fura

³¹ Yeesso wihi us ꞌdooꞌdi Yaꞌhuude usu rummeeste iyidah, “Chirri atin wori an atin abche khucchissaan, atin rumanka a abattitaaya.

³² Runti Waakh a abattaane, runti Waakh la a atin furta.”

³³ Icho la wihi icho usu ilaabeen, “Nah a nyaakhut nyaakhut Aburaaham, toro et nah injire ifalle mele. Toollaka chirri at, ‘Runti Waakh a atin furta,’ nah idowto, mehe tussa?”

³⁴ Yeesso wihi us ilaabe, “Rume atin icheeka, eti tuummane uskeel yeelo, a iꞌdoo us bowꞌdati uskeelaas yitah.

³⁵ Bowꞌda min goyaka inti tichee ma khabto, iꞌdaasenyi inam jirtuu tuumman a ki minkaas on.

³⁶ ꞌDeerka chirri Weeli Waakh kifure rumanka a furantahe.

³⁷ Saggi atin nyaakhut nyaakhut Aburaaham itahiin a garda. Iꞌdaasenyi ogoose imarantaan, iꞌdi tahe wihi an atin abcho ma rummeysattaan.

³⁸ Wihi an inti Aabbaheey kajiro ka an arge a atin icheeke. Atin la wihi atin aabbahiin kadaagteen iche yeessaan.”

³⁹ Wihi icho ilaabeen, “Aburaaham a aabbahaanya.” Yeesso la wihi us ilaabe, “Chirri atin rumanka nyaakhut nyaakhut Aburaaham tahiin, wihi us yeele atin laka a yeessaan.

⁴⁰ Atin la anihi wihi rummaate tuummane an Waakh kadaage atin isoocheeke, iche ogoos imarantaan. Aburaaham injire wihi iꞌdaase ma yeelin.

⁴¹ Wahanyeyyohi aabbahiin yeele on atin laka yeessaan.” Icho la wihi icho ilaabeen, “Nah iꞌdi nyaakhuti eysingꞌalaje mee. Aabbahi kaldaye nah khabno a Waakh rubeytiissa.”

⁴² Yeesso la wihi us iyidah, “Chirri kootte Waakh rumanka Aabbahiin yahe, ani a iꞌdoontaan. Iꞌdi tahe an Waakhe kiimiyye, toolla la an intane kajira. An awteey u ma imaatane, iꞌdaasenyi usu isooerge.

⁴³ Kamalda bal, atin a iꞌdoh wihi an atin idowo matah atin igelin? A jeenteti atin wori an atin idowo atin aban iubaaꞌdan.

⁴⁴ Atin a nyaakhuti Seytaanki ooyohiine. Wihi us imoono tuumman atin laka yeeline ꞌdoontaan. Uus uumaccho ka us eti ꞌdooꞌd bakkicho on eheet. Ulla toro rum a ꞌdiiꞌda, iꞌdi tahe us injire wihi rummaat ma cheekin. Chirra us yeedi beenaat cheeko la, wahaas eti rumanka us yahe tusaan. Us a eti been lehe, toro la a ooyohi ꞌdooꞌdi been goocho.

⁴⁵ Iꞌdaasenyi an ayti rummaate atin icheeka, jeentetaase ani irummeysawwaayteen.

⁴⁶ Ayyo goytiin ka saggi an rumanka uskeel iyeele tusa? Chirri an rum cheeko a iꞌdoh ani irummeysanna?

⁴⁷ Eti Waakh kayimiy, Yeedi Waakh a dagansata. Atin la Waakh ma kiimaatan gone, jeentetaase ani nabah ikasudiwwaayteen.”

Yeesso eti us yahe ꞌdooꞌd icheeka

⁴⁸ ꞌDooꞌdi Yaꞌhuud wihi us Yeesso ilaabe, “Chirri nah, ‘At a yaafohi biꞌdirenye Saamariya toro la ginna kidakhatta,’ kinidah, nah ma eysiinna?”

⁴⁹ Yeesso la wihi us ilaabe, “Ani ginna ma idakhatti. Iꞌdaasenyi an Aabbahaaya koolo ikeena, atin la lakhaanyo ikadowtaan.

⁵⁰ An koolo ma isiyowdi, iꞌdaasenyi eti anihi liikoolicho ꞌdoono a jira, ulla a eti jiti rummaat ka enenyet hukkumo.

⁵¹ Rume atin icheeka, eti tuummane wihi an abcho raaho, jirtuu ma yamuut.”

⁵² Jeenteti waha u, ꞌdooꞌdi Yaꞌhuud wihi us yidah, “Ya! Toolla saggi rumanka ginna kidakhatti a abanne. Aburaaham a yumuyye, ꞌdooꞌdi tuummane Waákh íyeyyeedo laka a tuume. Iꞌdaasenyi at mehe elatta ya, eti tuummane wihi at abisso raaho jirtuu ma yamuut.

⁵³ Aburaahamhi aabbaheenyee a yumuyye, at usu a kaweentahe? ꞌDooꞌdi Waákh íyeyyeedo laka a tuume, at ayyo iskoogtahe?”

⁵⁴ Yeesso wihi us ilaabe, “Chirri an iskoolicho, koolohaas walah icho ibahaan mele. Eti koolo iꞌdoono a Aabbaheeyki atin a Waakkhiinna elattaan.

⁵⁵ Atin injire usu ma garanne, anna usu a garda. Chirri ani, ‘An usu ma gardi,’ an atin iidah, annaka iꞌdiin u eti been lehe ateeh. Iꞌdaasenyi an usu a garda, yeediis la a raaha.

⁵⁶ Aburaahamhi aabbahiine laka, emeetteey weyti kahamaade. Ulla goorat archiiy emeetteey a arge, weyti hamaade.”

⁵⁷ ꞌDooꞌdi Yaꞌhuud la wihi us Yeesso iyidah “At guꞌh tomon chan laka ma eleelinne, toro Aburaaham a agarte?”

⁵⁸ Yeesso wihi us ilaabe, “Rume atin icheeka, geeddi Aburaaham ijirin laka an a jira on.”

⁵⁹ Jeenteti waha u dagah okhsatte, usu saataa. Iꞌdaasenyi Yeesso dagte, dagsi ka uranti minki Waakhe buure kabahe.