Yoohana 21 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso abattiti teebee bey afiche ka isoobaha

¹ Inkoo ibeennetoo kutte ka, Yeesso toro abattitiis Beyti Buurenye Tibeeriya afiche ka isoobahe. Wihi yitah la kallaayo.

² Abatti Yeessoti isleejirte a Siimonhi Beetero layadeeh ichoow Toomashi magahiiski addan Manꞌdáan layadeeh ichoow Naꞌdaanayelhi boroofenhi Gaalilaaya ka ilkerengeetti Kaana kayimiy ichoow yeele Sebedaayo ichoow abattitoo addane lammee.

³ Siimonhi Beetero layadeeh wihi us abattiti addan iyidah, “An a irda, bahag sookhabda.” Abattiti addan la, “Nah laka a kiraahna,” itidah. ꞌDeerka bahte kooban korte, iꞌdaasenyi ibeenkaas bahag iche khabatte mele.

⁴ Chirra orrahe sookorto ka, Yeesso bey afiche sootolossate, iꞌdaasenyi abatti saggi us Yeesso iyahe ma garan.

⁵ Yeesso chirraakka wihi us abatti iyidah, “Era, walah bahagenye atin khabatteen mele?” Wihi icho ilaabeen, “Walah nah khabanne mele.”

⁶ Ulla wihi us iyidah, “Oroohti atin bahag kakhabattaan, kooban ankichoki miigeet ka bicche goya iseya, bahag a ꞌhessaanee.” Uus iche iꞌdaas yeesse, bahaggi buure khabatte, ichoowka oroohti iche kooban goya isoojiitto laka agaafatte.

⁷ Eti abatti goyaka Yeesso weyti ꞌdoono la wihi us Beetero iyidah, “Waha a Kamureenna alah.” Chirri Siimonhi Beetero layadeeh saggi wahaas Kamur iyahe daage ka, dafartiisti oroot dabar kahiite. Iꞌdi tahe kootte a bahchee. ꞌDeerka bicche goya kadihe.

⁸ Abattiti addan la oroohti bahag buuho khabtaayi, kooban ka bey afiche timiy. A mehe icho bey afiche ma kadeerneynane, geeddi mitta kudoo on bey afiche ileejireen.

⁹ Chirri iche bey afiche eleesse ka, seeꞌddi bolokhto bahag fuulo agarte. Makaate laka intaas a kajirte.

¹⁰ Yeesso wihi us abatti iyidah, “Bahaggi atin sookhabatteen goyaka, gaasoo sookhaata.”

¹¹ Siimonhi Beetero layadeeh kooban kore, oroohti bahaggi burbuure buuho soojiite. Bahaggi icho ꞌheleen a bahag kudoo ichoow tomon chan ichoow bahag seyyah. Iꞌdaasenyi chiꞌ bahag burbuur eheet laka, oroohe ma goggowin ba.

¹² Yeesso wihi us icho iyidah, “Kaaleya golossada.” Abatti goyaka, et, “At a ayyo?” worsati mele. Saggi us Kamur iyahe a garteen.

¹³ Yeesso toro makaate khaate, abatti idiibe, bahag laka toro iꞌdaas on yeele.

¹⁴ Waha la a koli seyyahnaatteete Yeesso inkoo us omoot kasookahe, abattitiis isoobahe.

Yeesso toro Beetero, “Isooraah,” iyadeeh

¹⁵ Inkoo icho golossateen ka, Yeesso wihi us Siimonhi Beetero layadeeh iyidah, “Siimon, ínam Yoohana, at geeddi abattita addan iꞌdoonto, ꞌdirihiche weyti a iꞌdoonta?” Ulla, “Aa, Kamur, ati rubeytaah saggi an kiꞌdoono a garatta,” iyidah. Yeesso la wihi us iyidah, “ꞌDooꞌdeeyki iꞌdi makhassi iiyyaate goolli giꞌde.”

¹⁶ Yeesso toro koli lammaatteet inokhte, wihi us iyidah, “Siimon, ínam Yoohana, at rumanka a iꞌdoonta?” Wihi us ilaabe, “Aa, Kamur, at saggi an kiꞌdoono a garatta.” Yeesso wihi us iyidah, “ꞌDooꞌdeeyki iꞌdi iiyteeye yaakhi giꞌde.”

¹⁷ Koli seyyahnaatteet Yeesso toro inokhte, wihi us iyidah, “Siimon, ínam Yoohana, at rumanka a iꞌdoonta?” Beetero jeenteti Yeesso kol seyyah, “At a iꞌdoonta?” iworsatuu, fool ribowe, wihi us iyidah, “Kamur, at walah dakkhan a garatta. Saggi an kiꞌdoono la a garatta!” Yeesso wihi us iyidah “Tab giꞌde, ꞌdooꞌdeeyki iꞌdi iiyteeye goolli.”

¹⁸ Yeesso toro wihi us iyidah, “Rume kisoocheeka, maanti goorat at nugussahe, a sookahta, darfo gessatta, meessi at iran ꞌdoonto tuumman iratta. Iꞌdaasenyi maanti at araarrowte, dahanohaah a oogta, etoo addan la gaad kigessa, inti at iran iꞌdoonin kigeecha.”

¹⁹ Yeeda Yeesso yidah mehe tusa ya, omootti Beetero yamuute, ꞌdee omoottiis ka Waakh laweynaacho. ꞌDeerka Yeesso wihi us Beetero iyidah, “Kaale, abattiteey ateeh.”

Yeesso wori eti abatteenye us weyti ꞌdoono kaayyeeda

²⁰ Beetero urgiye, etoo ullaka abatteenye ꞌdubicho sooraaho arge. Eta a ki goorat Yeesso weyti ꞌdoono, maanti goorat Yeesso gololi ꞌdaꞌddaboot abatti leeyuhum, Yeesso garabiis fiddiye, Yeesso kasiihsate, “Kamur, eti ꞌdub kigoocho a ayyo?” worsate.

²¹ Beetero chirri us arge ka, wihi us Yeesso worsate, “Kamur, eta la mehe layeela?”

²² Yeesso wihi us ilaabe, “Chirri an usuhi ichoowka maanti an soonokhdi jiro ꞌdoono, wahaas ati walah icho kiyahiin mele. At kaale abattiteey ateeh!”

²³ Jeentetaas u woraas leessi ꞌdooꞌdi Kiriisto rummeeste goya kataaꞌhe. Wihi icho esseen a mehe ya, “Eta abattee ma yamuut.” Iꞌdaasenyi Yeesso ma yamuut ma idaahane, wihi us yidah a mehe ya, “Chirri an usuhi ichoowka maanti an soonokhdi jiro ꞌdoono, wahaas ati walah icho kiyahiin mele.”

²⁴ Eti abatteenye waha runticho garti, cheeko, toro la chiire, a kan. Saggi wihi us yidah rum iyahiin la a garanna.

²⁵ Yeesso wohoo addane ittaawe laka a yeele. Chirri kootte wahaas tuumman lachiire, imurchoteey ka, harra tuumman laka, buuggassi wahaas tuumman lakachiire, meel iche gelisso mele.