Yoohana 19 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Bilaato ꞌdeerka, “Yeesso a lakhaato, laajja ka a lajaho,” yidah.

² Iskare la ꞌduuboo kudaheet iskayuubte matah Yeesso korisse, dafartoo muggee laka iꞌdi karnat u gelisse.

³ Iskare isoononnokhatte, “Karnati Yaꞌhuudoow, jiroti deer ꞌhel,” idoddowte, toro la fodoorre jajjahte.

⁴ Bilaato toro koloo addan urur isoobahe, wihi us iyidah, “Yeya, kharane isoobahcha atin ikeena, ꞌdee saggi wohoo rucchule lakahukkumo an ikaargin agartaan.”

⁵ Chirri Yeesso ꞌduubi kudaheet ichoow dafarti muggee khabaayi khar isoobahe ka, Bilaato wihi us ꞌdooꞌd iyidah, “Et kalla!”

⁶ Uus kuhaaniyyohi wewween ichoow iskarti minki Waakhe buure yaakhisso Yeesso agarte ka, riirte, “Massalaaba kakaah! Massalaaba kakaah!” tidah. Iꞌdaasenyi Bilaato wihi us ilaabe, “Atin khaata massalaaba kakaaha. Ani ka walah lakacheekti an argo mele.”

⁷ Weynaanti Yaꞌhuud tirriinsatte wihi iche tidah, “Nah amuri eti iꞌdee a layigaase yadeeh a khabna. A mehe us, ‘Aní Weeli Waakhe,’ iche essa.”

⁸ Chirri Bilaato saggi Yeesso Weeli Waakh isikawahe daage ka, geeddi kootteet ꞌdirihiis roorro gesse.

⁹ Minki buurenye gaafana goya inokhte, Yeesso, “Intoh katimiy?” worsate. Iꞌdaasenyi Yeesso walah us laabe mele.

¹⁰ Bilaato la wihi us Yeesso iyidah, “At ani ma ileeyyeeddo? Saggi an antohi an kaafuro ikhabo ommos antohi an massalaaba kaakaaho ikhabo ma kasso?”

¹¹ Yeesso wihi us ilaabe, “Waakh on anto kisiiche menye, at anto at ikakhabto mele. Maantaka eti dahanohaah igesse, uskeeli us khabo kaah laka a kuta.”

¹² Chirri Bilaato waha daage ka, jiti us Yeesso kafuro yowte. Iꞌdaasenyi weynaanti Yaꞌhuud riirte wihi iche tidah, “Chirri at eta soofurte, at aali karnati ili Rooma mee! Eti tuummane karnat iskawaho karnati ili Rooma tirrima.”

¹³ Chirri Bilaato yeeda daage ka, Yeesso khaate, khar ibahche, inti ꞌdooꞌd lakahukkumo, “Orotti dagaheet,” layadeeh keene. Magaha afi Ibiraaniya ka la Gabaaꞌda layadeeh.

¹⁴ Sahaꞌd tomon ichoow lammati chirdeereet, Ibeenki Latannabti daawti Baasakka orchee, Bilaato wihi us ꞌdooꞌdi Yaꞌhuud iyidah, “Karnatiin kalla!”

¹⁵ Iꞌdaasenyi riireene, “Agiis, agiis! Massalaaba kakaah,” yidaaheen. Bilaato toro wihi us worsate, “Anihi karnatiin massalaaba kakaaho ꞌdoontaan?” Kuhaaniyyohi wewween wihi icho ilaabeen, “Kaaysar on menye, karnat addane nah khabno mele.”

¹⁶ ꞌDaꞌddaboka Bilaato Yeesso dahanohicho gesse, ꞌdee massalaaba a kakaaheen. Iskare ꞌdeerka Yeesso khaatte.

Yeesso massalaaba lakakaaha

¹⁷ Yeesso massalaabatiis siꞌdaayi bahe. Meessoo Meessi Lafohi Matahe Enenyet layadeeh irte. Meessa la afi Ibiraaniya ka a Golgooꞌda.

¹⁸ Inta ka massalaaba kakaaheen. Reeroo lammee laka Yeesso leekaaheen. Kooba Yeesso ankiiskoo lakakaahe, Yeesso la dahcho lakakaahe.

¹⁹ Bilaato la amuri baawatoo lachiiro, massalaaba Yeesso sarche lakalooꞌdicho bahche. Wihi lakachiire la a mehe ya, Yeessohi Ilkerengeetti Naasaret, Karnati Yaꞌhuud.

²⁰ ꞌDooꞌdi ittaawenye Yaꞌhuud la chiirnaannetaas soome, iꞌdi tahe meessi Yeesso massalaaba lakakaahe, ilkerengeet ma kadeer. Wihi baawa kachiiran la afi Ibiraaniya ichoow afi ꞌDeylaan ichoow afi Giriige lakachiire.

²¹ Kuhaaniyyohi wewween la wihi icho Bilaato iyidaaheen, “ ‘Karnati Yaꞌhuud’ akachiirine, iꞌdaasenyi eta, ‘An a karnati Yaꞌhuud,’ iche isyadeeh, kachiir.”

²² Bilaato wihi us ilaabe, “Wihi an chiire, koloo kalday laka ma luurgiyicho.”

²³ Inkoo iskare Yeesso massalaaba kakaahte ka, gaaddiisti saraat et affar ka gisante. Dafartiisti goyaatteet la a dafartoo kaldache ma tolan la.

²⁴ Iskare wihi iche isitidah, “Uus inno khakkharadinne, kaaleya kura a iguꞌdubno, eti khaatti a agarro!” Waha la a yitaaheene, ꞌdee Chiirnaanneti Waakhe iꞌda tadeeh labuuhicha, “Darfoheey a gismeene, toro la dafarteeyti goyaatteet kura iguꞌddeen.” Wihi iskare yeesse ꞌdeerka a wahaas.

²⁵ ꞌDooꞌdi massalaaba Yeesso hagga toolle a abartiis ichoow iingotiis ichoow Maariyati makhaabál Kiiliyoobaase ichoow Maariyati ilkerengeetti Magdaala.

²⁶ Yeesso abartiis ichoow eti us abattitiis goyaka weyti ꞌdoono ichohi intaas toollo arge. Yeesso wihi us abartiis iyidah, “Abartaay, eta inankaah kayeelo.”

²⁷ Etaas abattitiise la wihi us iyidah, “Eta, makhaabassa abartaah kayeelo.” Uus maalinkaas la, eta abattee Maariya khaate goobiis geeche.

Yeesso rubey goocha

²⁸ Yeesso chirraakka saggi wihi goorat yateeh tuumman iyitaaheen garte. Ulla saggi us wihi Chiirnaanneti Waakh tadeeh ibuuhichuu, wihi us yidah, “An a subgaade.”

²⁹ ꞌDirihoo farsoti sabiibe birrakhe kijirto la intaas a kajire. ꞌDeerka haaruggoo farso goya kalugꞌdeene, haaruggaas khoꞌdoonkoo deer kachuukheene, Yeesso ioogeene, af gesseen.

³⁰ Chirri us farsota surrukhe ka Yeesso wihi us yidah, “Walah tuumman a massateen.” Wahaas ka matah soolugꞌde, rubey gooche.

Etoo iskareet Yeesso waaru ꞌhuna

³¹ Ibeenki Latannabti kola a yitah. Ibeenki kaas sooraaho la, a Seeri Lanaso weyti khumman. Weynaanti Yaꞌhuud la sarti Seeri Lanaso massalaaba kajirto ma ꞌdoonto. Bilaato amuri luhlo lakaajjebcho ꞌdee sar lasooyagcho daaheen.

³² Iskare ꞌdeerka timiyye, ꞌdooꞌdi kootte Yeesso laleekaahe ki oraat ichoow ki addan ba luhlo jejjebisse.

³³ Iꞌdaasenyi chirri iche Yeesso sooeleesse ka, saggi us iyumuy agarte, luhlohiis ma jejjebin.

³⁴ Etoo iskareet toor ka Yeesso waaru ꞌhune, diig ichoow bicche kasookhubteen.

³⁵ Eti waha arge, ayti rummaate cheeke, ꞌdee atin laka Yeesso rummeysattaan. Wihi us cheeke la beene ma kijirto, ulla saggi us rumanka wihi rummaat icheeko, a garta.

³⁶ Waha la a yitaaheene, ꞌdee wihi Chiirnaanneti Waakh ka lachiire labuuhicha, “Laftiistoo kalday laka ma lajebcho.”

³⁷ Toro la iꞌdi chiirnaankoo addan Chiirnaanneti Waakh goyaka yadeeh u, “ꞌDooꞌd eti icho toor ka ꞌhuneen a ꞌdeyꞌdoocha.”

Yeesso lahawwaala

³⁸ Yomboka etoo Yuussuf layadeehe ilkerengeetti Arimaꞌdaaya kayimiy, irte Bilaato sar Yeesso daahe. Yuussuf la dagsi ka abatti Yeesso eheet, jeenteti us weynaanti Yaꞌhuud ikarooruu. Amuri Bilaato siiche ka, yimiyye sar Yeesso khaate.

³⁹ Eti leejire la, a Nikodeemohi goorat orey Yeesso ibeen iyimiyye, leeyyeede. Nikodeemo uyuuggetoo geeddi kiilo tomon seyyahe sookhaate. Uyuuggetaas la, miricchihoo ichoow abahti geeyoo miir layadeehe islakachibe.

⁴⁰ Lammache ba sar Yeesso khaatte, uyuugge kachibeene goonanneti darfoot leeyuubte. Waha ichoow hugunki yaafohi Yaꞌhuud ka saggi eti yumuy il liikalaabo a israahaan.

⁴¹ Inti Yeesso lakakaahe, gosoo a kajire, gosaas goya la goꞌddoo lakhute, enenyet injire liikahawwaalin a kajira.

⁴² Waha yaafohi Yaꞌhuud ka a Ibeenki Latannabti gone, goꞌd la a soodowyahe gone, Yeesso goꞌddaas kahawwaaleen.