Yoohana 15 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso a iꞌdi geeyi sabiib

¹ Yeesso toro wihi us yidah, “An a iꞌdi geeyi sabiibe rummaate, Aabbaheey la a eti gos hil kahaaggicho.

² Aabbaheey la eti tuummane iꞌdi liikhimeet u ani ikatoollo gurnaan idelin, a goocha. Eti tuummane iꞌdi liikhimeet u gurnaan delo la, Aabbaheey mujjume yeela, ꞌdee gurnaanki buure bahcha.

³ Atin la ꞌhor on wihi an atin abche ka, atin mujjummooche.

⁴ Goyteey fiddiya, anna goytiin a fiddiyo. Liikhime keley gurnaan iche bihisso mele. Chirri iche gurnaan bihisso, a chirri iche geeyi sabiib katolosso on. Atin laka iꞌdaasu, chirri atin goyteey ifiddiyin, walah atin ꞌduuꞌddaan mele.

⁵ “An a iꞌdi geeyi sabiibe, atin la a iꞌdi liikhimohaaya. Eti tuummane goyteey fiddiyo, anna goytiis fiddiyo, gurnaanki buurenye dela. Laanteey walah atin ꞌduuꞌddaan mele.

⁶ Eti tuummane goyteey ifiddiyin, iꞌdi liikhimeet u a laroga, angaga. Liikhimohi iꞌdaase a lasoosuuna, ꞌdab lakalugꞌda, laguba.

⁷ Chirri atin goyteey fiddiitaane, yeedeey la goytiin fiddiyo, wihi atin ꞌdoontaan tuumman Aabbaheey a daahtaane, ulla atin siicha.

⁸ Chirri atin gurnaanki buure bihissaan, saggi atin abattiteey itahiine tussaan. Iꞌda ka la, Aabbaheey a laweynaacha.

⁹ “Saggi Aabbaheey ani iꞌdoono, iche ani laka atin iꞌdoona. Goyteey fiddiya, ꞌdee ani a atin ꞌdoono giꞌde.

¹⁰ Chaꞌatin amurreteey raahtaan ꞌdoonintaaya kafiddiitaan, saggi an amurre Aabbaheey iraahe an ꞌdoonintiis ikafiddiyuu.

¹¹ “Waha la a atin isoocheeke, ꞌdee atin laka hamaadi an khabo khabtaane, toro la hamaadiin walah kaankhati mele.

¹² “Amuri an atin siicho kalla, saggi an atin iꞌdoonuu, taba atin laka isꞌdoona.

¹³ Wihi ꞌdooninti enenyet aalassiis weyti ꞌdoono tuso kallaayo, a ti us jirotiis jeentetichuu isoobahcho.

¹⁴ Atin a aalassaaya chirri atin amureey raahtaan.

¹⁵ “Kola ilbooyye ma atin adeeh, iꞌdi tahe ilbooyye wihi kamuriche haaggicho ma garatti. Aalassaaya atin adeeh. Iꞌdi tahe wihi tuummane an Aabbaheey kadaage, a atin isoocheeke.

¹⁶ Atin ani ma isoobahsan, iꞌdaasenyi ani atin soobahsade, toro hiloo atin korche, ꞌdee gurnaan bihissaan, gurnaanki fiddiyo bihissaan. ꞌDeerka jeenteti atin keey itahiin u, Aabbaheey wihi tuummane atin daahtaan, a atin siicha.

¹⁷ Amurreteey taacheyye, taba giꞌde isꞌdoona.

ꞌDooꞌdi harrata a atin ꞌdiiꞌda

¹⁸ “Chirri ꞌdooꞌdi wahanyeyyohi harratane sussuuje raaho atin ꞌdiiꞌde, saggi icho kolooraat ani iꞌdiiꞌdeen abda.

¹⁹ Chirri kootte atin iꞌdi ꞌdooꞌda harrata tahiin, ꞌdooꞌdaas a atin ꞌdoona, iꞌdi ꞌdooꞌdichuu. Atin ꞌdooꞌdi harrata menye, iꞌdaasenyi an a atin soobahsade. Jeentetaase ꞌdooꞌdi harrata atin iꞌdiiꞌda.

²⁰ Wihi an atin iidah kasooꞌhela, ‘Falfá kamuriche kaween mele.’ Chirri ꞌdooꞌdi harrata ani sina iomhicho, atin laka sina a atin omhichaan. Chirri icho wihi an abche raaheen la, wihiin laka a raahaan.

²¹ Waha tuumman la jeenteti atin keey itahiin u, a atin layeela. Iꞌdi tahe icho eti ani isooergate ma gartaan.

²² “Chirri goorat an iimaatane an icho ileeyyeedin, uskeel lakacheekti mele gon. Iꞌdaasenyi toolla uskeelicho ka walah icho laabaan mele.

²³ Eti tuummane ani inibhaate, Aabbaheéy laka a nibhaate.

²⁴ Chirri kootte an goycho ka wihi injire liiyeelin iyeelin, uskeel ma khabaan. Iꞌdaasenyi toolla wihi ittaawenye weeli enenyet yeelin iubaaꞌdane an yeele a argeene, toro Aabbaheey ichoow ani ba a nah nibhaateen.

²⁵ Iꞌdaasenyi waha toolla a yateehiine, wihi Amurreticho lakachiire labuuhicha, ‘Walah an yeele icho ikaꞌdiiꞌdaan mele.’

²⁶ “Maanti Rubeyti Munyeenye ꞌDooggargaarto layadeehe Aabbaheey katamiit an atin isooergo, Rubeyta Munyeenye rum lehe Aabbaheey katamiit, a atin itamiite, wori ani imiinsan atin icheekta.

²⁷ Atin laka woraaya cheektaan. A mehe uuꞌ goorat maanti an hila sookhabde, a ileejirteen.