Yoohana 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso abattitiis luhlo dikha

¹ Geeddi ibeenki daawti Baasakka iitaahan, Yeesso saggi ibeenki us harrata katabo, us Aabbahiis iirti kola iyitah garte. Yeesso la ichoowka maanti jirotiisti harrata soomassatti laka, ꞌdooꞌdiis a ꞌdoone.

² Yeesso ichoow abattitiis ba gololi gelebeete yamhiin. Seytaan la Yuuda Iskaariyoothi inam Siimone mali suujenye us Yeesso ꞌdub kagoocho orey on rubeytiis gesse.

³ Yeesso saggi Aabbahiis walah tuumman dahantiis igesse a garta, saggi us Waakh ikayimiyye us toro Waakh ikanokhti a garta.

⁴ ꞌDeerka kombor kasookahe, dafartiisti oroot duumiche, dafarti chirri ladikhte lakahiyyaayti dabar kahiite.

⁵ Wahaas ꞌdubicho ka, karaayatoo bicche kachibe, abattitiis luhlo dikhe, dafarti kootte us dabar kahiite ka hiyyaaye.

⁶ Chirri us Siimonhi Beetero layadeeh sooeleele ka, Beetero wihi us iyidah, “Kamur, luhlo idikhta?”

⁷ Yeesso wihi us ilaabe, “Wihi an yeelo toolla wihicho ma abatti, iꞌdaasenyi yomboka a abatta.”

⁸ Beetero la wihi us iyidah, “At koloo kalday laka luhlo ma idikhto.” Yeesso wihi us ilaabe, “Chirri an luhlo kidikhin, at keey mee.”

⁹ Siimonhi Beetero layadeeh wihi us Yeesso ilaabe, “Kamur, ꞌdeerka luhlo kalday iidikhine, iꞌdaasenyi dahano ichoow matah laka idikh giꞌde.”

¹⁰ Yeesso wihi us ilaabe, “Eti kootte sar tuumman dikhte, yomboka luhlo kalday on dikhta. Iꞌdi tahe sartiis tuumman chaafo ma khabto. Buurtiin a dikhantahe, iꞌdaasenyi atin tuumman mee dikhan.”

¹¹ A mehe us ꞌhor on eti ꞌdub goocho garte, jeentetaase, “Atin tuumman mee dikhan,” iyidah.

¹² Inkoo Yeesso abattitiis luhlo dikhe, us dafartiisti oroot toro gessate ka, inti kootte us ꞌhor fiddiye koorronte. Wihi us icho iyidah, “Kamalda bal, wihi toolla an atin iyeele wihicho a abatteen?

¹³ Atin ani, ‘Eti ween,’ ichoow, ‘Kamur,’ menya itadeehiin? Aa! A iꞌdaas on gon. An rumanka a eti weene, toro la a Kamur.

¹⁴ Anihi Kamuriinenye toro la etiinki weene, toolla luhlo a atin dikhe. Taba giꞌde atin laka luhlo isdikha.

¹⁵ An jit a atin tuse, ꞌdee atin laka wihi an atin iyeele ꞌdooꞌdi addan iyeessaan.

¹⁶ Rume atin icheeka, falfá kamuriche kaween mele, ommos eti ergaanee eti ergate ma kaween.

¹⁷ Toolla ꞌdeerka atin runta garattaan, a hamaadoo geeddohe chaꞌatin wihi atin liiꞌdoono yeessaan.

Yeesso saggi ꞌdub liigoocho orey on cheeka

¹⁸ “Wora an kaayyeedo atin tuumman mee atin miinsanyahe. ꞌDooꞌdi rumanka an soobahsade a garda. Iꞌdaasenyi Chiirnaanneti Waakhe, ‘Eti ileegolossate on toro chiiy iyitah,’ tadeeh a labuuhicha.

¹⁹ “Waha geeddi icho iitaahane atin isoocheeka, ꞌdee maanti icho yitaaheen laka, saggi an eti an ahe, an atin isoocheeke iahe rummeysattaan.

²⁰ Rume atin icheeka, eti tuummane eti an sooergade khaatti, ani ikhaatta. Eti ani ikhaatti la, eti isooergate khaattta.”

²¹ Inkoo us waha yidah ka, Yeesso weyti uur suujowe, wihi awtiis miinsan abatti icheeke, wihi us yidah, “Rume atin icheeka, etiinkoo ꞌdub igoocha.”

²² Abattitiis isyeyte, etichoki yeedaas miinsanyahe fooliis waayte.

²³ Abatti goyaka, etoo kachka Yeesso weyti ꞌdoono, Yeessó garabiissa fiddiya.

²⁴ Siimonhi Beetero layadeeh etaas abattee far iooge, wihi us iyidah, “Bal eti us woriis kaayyeedo, eti tahe worsada.”

²⁵ Etaas abattee Yeesso kasiihsate wihi us worsate, “Kamur etaas a ayyo?”

²⁶ Yeesso wihi us ilaabe, “Etaas, a eti toolla an makaatetoor idiibo inkoo an karam kalugꞌde.” Yeesso ꞌdeerka makaatetoor karam goya kalugꞌde, Yuuda Iskaariyoothi inam Siimone iooge.

²⁷ Uus Yuuda makaate khaate, Seytaan goytiis gele. Yeesso la wihi us Yuuda iyidah, “Nyaam, wihi at sooyeesso dowwa yeel!”

²⁸ Iꞌdaasenyi ꞌdooꞌdi addane leegolossati et jeenteti Yeesso waha iyidah garti mele.

²⁹ Yuuda gon chilimme khucchaa, abatti gaasoo kol Yeesso Yuuda ergate, wihi icho daaw ka ꞌdoonaan, “Soogat,” iyidahye, ommos us, “Wohoo miskiin sii,” iyidahye koogyahiin.

³⁰ Chirraas on Yuuda makaate khaate, dowwa bahe. Il la a ibeen.

Yeesso abatti amuroo husub siicha

³¹ Inkoo Yuuda bahe ka, Yeesso wihi us yidah, “Toolla Ínam Aadam a laweynaache. Ulla saggi Waakh iweenyahe ꞌdooꞌd a tusa.

³² Anna chirri an saggi Waakh iweenyahe ꞌdooꞌd tuse, Waakh laka saggi Ínam Aadam iweenyahe ꞌdooꞌde tusa, toro la dowwa tusa.

³³ “Nyaakhutaaw, an kola geeddoo rucchul on atin leefiddiya. Atin a iyowattaane, iꞌdaasenyi iꞌdi goorat an yaafohi Yaꞌhuud iidah u, inti an irdi emeet ma tabuuꞌdiin.

³⁴ “Amuroo husube atin siicha. Taba isꞌdoona. Saggi an atin iꞌdoone, atin laka saggaas isiꞌdoona.

³⁵ Chaꞌatin isꞌdoontaan, ꞌdooꞌd tuumman saggi atin abattiteey itahiin a abta.”

Yeesso saggi Beetero isooꞌdiiꞌdo orey on cheeka

³⁶ Siimonhi Beetero layadeeh wihi us Yeesso worsate, “Kamur, at intoh iratta?” Yeesso wihi us ilaabe, “Toolla inti an irdi ma ileeiratti. Iꞌdaasenyi ꞌdee yomboka a ileeiratta.”

³⁷ Beetero la wihi us worsate, “Kamur, an a iꞌdoh toolla kiraahin? An a geeddi an jiroteey laka soobahcho jeentetaah u.”

³⁸ Yeesso wihi us ilaabe, “At rumanka jeenteteey u jirotaah a soobihissa? Rume kisoocheeka, geeddi lukki iriirin, at kol seyyahe ma igaratti tadeeh.”