Yaakoobo 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Tootoonnaanki kamurreti enenyet il itakhto miinsan

¹ Atinhi kamurree, alleya bal! Jeenteti sinati atin isoosahattuu, weyti ooya toro la uuwwicha.

² Kamurroonkiin a suusahe, gaaddiinti hahhaaggan la riirime a tuhum.

³ ꞌDahabiin ichoow lahaagtiin kuuttu a gele, ibeenki enenyet lahukkumo ka la, kuuttuhaas a atin cheekta, toro iꞌdi ꞌdab u sartiin a yaham. Waha a ibeenneti ꞌdaꞌddaboote, atin la kamurroonkiin weyti meel gessatteen.

⁴ Yeya, ilbooyyeti gosashiin ka gurnaan gurto chilimmeticho ma gutine, chilimmeticho a atin kooyta. Toro la oytinti ꞌdooꞌdi gurnaan guro nabahti Kamureenki Miig Tuumman Leh a eleesse.

⁵ Jiroti atin harrata ka jirteen a ti atin wihi atin ꞌdoonteen tuumman khabteene, toro la hamadiinna on yowatteen. Atin wihi uurassiin ꞌdoonaan tuumman a dargisseen, iꞌdaasenyi ibeenki Waakh enenyet hukkumo ma kasin.

⁶ Atin ꞌdooꞌdi fiffissane atin itirrimine uskeel igoosseene toro dubunuunu bakkisseen.

Garrahsada Kamur a soonokhtaa

⁷ Maantaka ꞌdooꞌd Kiriistokaaw, ꞌdooꞌdi samacchaare ateeha ichoowka Kamur a soonokhti. Saggi eti gos leh gosiiski gurnaanki haaggan bahcho isugo yeya. Us a samacchaara one ichoowka hiri oraat ichoow ki ꞌdaꞌddaboot ꞌdeyaan.

⁸ Atin laka ꞌdooꞌdi samacchaare ateeha, mujjum tolossada iꞌdi tahe ibeenki Kamur soonokhti a soodowwaatee.

⁹ ꞌDooꞌd Kiriistokaaw, taba iiskaannyuwina, uus Waakh uskeel atin igoonne. Waakkhi enenyet hukkumo min khariissa sootoolla.

¹⁰ ꞌDooꞌd Kiriistokaaw, ꞌdooꞌdi iyookkoti haaggane geeddi sinayyo lakawaariche samacchaar fiddiye, a ꞌdooꞌdi goorat Kamur iyeyyeedo.

¹¹ Saggi atin igarattaan u, inno ꞌdooꞌdi sinayyo lakawaariche garrahsate ꞌdooꞌdi Waakh imaale iekkaanna. Atin saggi Ayuub igarrahsate ichoow wihi Kamur yomboka iyeele a daagteen. Waakh weyti uur nugulyahe, toro la enenyet a isoonaha.

¹² ꞌDooꞌd Kiriistokaaw walah tuumman ꞌdirihicho ka, taba adaatanna, goobi Waakh ommos harrata ommos wohoo addan akadaatanna. “Aa” ti atin tadeehiin, “Aa” a titaahe. “Mele” ti atin tadeehiin la “Mele,” a titaahe. Iꞌda ka Waakh sina ma atin ikeeno.

Waansihi weysi miinsan

¹³ Etoo goytiin ka sina khaba? Waakh on a wahti. Etoo goytiin ka a hamaada? Waakh a saaꞌdo.

¹⁴ Etoo goytiin ka a khannanyahe? Ewweenki urur Kiriisto woyo a waho, a iweesti, magahi Kamur ka subah ka matah a subho.

¹⁵ Weysihi saggi Waakh eta khannan isamaacho lakakhuufo la eti khannan a samaachaan. Kamur la etaas ilaali us kajiifo a kasookahcha. Chuꞌus uskeel yeele la, Kamur uskeel a ikakuta.

¹⁶ Maantaka uskeeli atin isiyeesseen isicheekda, toro la isiweesda, ꞌdee Waakh a atin samaacho. Weysihi eti fissan weyti miig a khabaane toro la wihi buurenye yeelaan.

¹⁷ Eliiya weeli enenyete iꞌdeene on eheete, weyti Waakh wahte, hiri ilaas iꞌdeyin daahe, guꞌh seyyah ichoow nyuus la hir ꞌdeye mele.

¹⁸ Toro Waakhe wahte, serey ka hir sooꞌdeye, harra la gurnaan bihisse.

¹⁹ ꞌDooꞌd Kiriistokaaw, chiꞌ etoo goytiin ka jiti rummaat kabaabe, etoo addan la soohosse,

²⁰ waha kasooꞌhela, eti etoo addane uskeel yeelo uskeeliis kasoolaabe, rubeyti etaas omootti armaanjireene kasoohossa, Waakh la uskeeli buurenye eti kootteet yeelo a ikakuta.