Yaakoobo 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Aalassi harrata a chiiyti Waakh

¹ Waha kamalda bal, mehe jihit ichoow jaakh goytiin keena? Wihi suujenye uurassiin goyaka isdiho menya kayamiitiin?

² Atin wohoo weyti ꞌdoontaane, iꞌdaasenyi ma ꞌhessaan. Enenyet dubunuunu tagiisiine toro walah maanjeerattaane, iꞌdaasenyi walah ma ꞌhessaan. A isleejaakhtaane toro la isjahtaan. Walah ma ꞌhessaan, a mehe Waakh walah ma daahtaanee.

³ Walah a daahtaane ma ꞌhessaan, a mehe atin uuri suujenye kadaahtaane, ꞌdee wahaas awtiinna on hamaadichaan.

⁴ Atinha waakkhassi addan wahattaan, saggi eti wahanyeyyohi harratane sussuuje aal kabahsate Waakh iꞌdiiꞌddanyahe ma garattaan a? Eti wahanyeyyohi harratane sussuuje aal kabahsan goosti chiiytanki Waakhe iskayeela.

⁵ Ommos Chiirnaanneti Waakhe, “Rubeyti Waakh goyteen gesse inaafe leetahe,” elatti a immarah on a?

⁶ Iꞌdaasenyi Waakh haaggiiski buurenye us inno siicho a kakhayma. Jeentetaase Chiirnaanneti Waakh mehe itadeeh ya, “Waakh eti eylajo a ꞌdiiꞌddanyahe, iꞌdaasenyi eti isnuglaacho haaggiiski buurenye siicha.”

⁷ ꞌDeerka Waakh afiis akutina. Seytaan iskahossa, ulla a atin kafirdaa.

⁸ Waakh isoodowwaada giꞌde ulla a atin isoodowwaataa. Atinha uskeel leh, dahanohiin uskeeli atin yeesseen ka dikha. Atinha uurlammaal khabattaan, uurassiin dikha.

⁹ Taba, ilmo khuba, ooya toro uuwwicha. Reyati atin reyattaan urgiyicha oytim kayeela, hamaadi atin khabtaan la urgiyicha fooli atin ribowo kayeela.

¹⁰ Kamur ortiis ka isnuglaacha, ulla a atin okkhichaa.

Etoo Kiriisto rummeesti ahamanna

¹¹ ꞌDooꞌd Kiriistokaaw, taba iishamanna. Eti tuummane etoo koo Kiriistee hayhayo ommos hukkumo a iꞌdoo us amurreti Waakh hanti toro hayhayo. Geedda atin amurreti Waakh hukkuntaan, amurre ma raahtaane, geeddaase iche amurre fit tahe ichoow ichehuus goossaan.

¹² Waakkhoo kalday on amurre enenyet siicha toro enenyet hukkuma. Usu kalday on enenyet ribin yabuuꞌde toro baabiicha. Iꞌdaasenyi atin a ayyo, atinhi ollokkiin hukkuntaan?

Waakh on wihi saahta garta

¹³ Alleya bal atinhi, “Maalinka ommos saahta ilkerengeetta ommos ilkerengeettuus a iranna, guꞌhoo fiddiina, bacchaaranna, chilimmeteenyo dessa,” elattaan!

¹⁴ Ya? Wihi saahta yateeh laka ma garattaan! Jirotiin a mehe? Atin a iꞌdi ꞌduubathi geeddoo rucchul on laargo, toro baabo.

¹⁵ Wihi deefo a atinhi, “Chiꞌ Waakh ꞌdoono a jirra, waha ichoow wahaas yeella,” tadeehiin.

¹⁶ Iꞌdaasenyi atin rannyaat ka a eylajjaan. Eylajaas tuumman a uskeel.

¹⁷ Maantaka eti tuummane haaggi imale us yeelo garti toro iyeelin, uskeele yeela.