Yaakoobo 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Harrabiin jeysada

¹ ꞌDooꞌd Kiriistokaaw, buurtiin iiche ꞌdooꞌdi enenyet Yeedi Waakh abcho itaahan. A mehe a garattaane Waakh nahi Yeedi Waakh enenyet abinno, ꞌdooꞌdi addan ꞌdirihiissa nah hukkuma.

² Rumanka inno tuumman jitassi ittaawe ka a tarraantarranna. Chiꞌ etoo wihi us yadeeh ka jirtuu ikhufin, etaas tuum a iiꞌdowe toro la sartiis tuumman jeyin a yabuuꞌd.

³ Chiꞌinno faraꞌd luugaam af kahiino, ꞌdee faraꞌd inno raaho, faraꞌd tuum laabin a nabuuꞌde, inti inno ꞌdoonno geenna.

⁴ Bal toro iyookkoti koobanhi burbuurenye bey sarche kasohti hafari miige takho yeya. Iꞌdaasenyi khoꞌdoonkoo hafan on koobanhi buure lakawoya inti eti woyo geen ꞌdoono lakageecha.

⁵ Iꞌdaasu la harrab laka a miiloo sareete rucchule, iꞌdaasenyi wihi buure ka eylajo. Bal iyookkoti oomaari buure yeyno, jilahtoo rucchul geeddi iche oomaaraas massisso menya?

⁶ Harrab laka iꞌdi ꞌdab u sarteen goyaka wahanyeyyohi harratane sussuujenye itoolla. Enenyet tuum a biꞌdirroocha, jirotiis tuumman ꞌdab kaguba. Harrab rubeytiis la ꞌdabi armaanjireene lakaguba.

⁷ Weeli enenyet a geeddi us wihi lasoouume tuumman dakhti. Waha la a hoola ichoow bina ichoow chimbiro ichoow binahi uur il kajiito ichoow wihiiyye beyo goya kajiro. Rumanka la wahaas tuumman a dakhte.

⁸ Iꞌdaasenyi et harrab dakhti mele. Harrab a suujoonki jeyin liiubaaꞌdane, hadaadohi uskul buuhaan.

⁹ Inno harraba on Kamureen ichoow Aabbaheen kakoolinna, toro harraba on ka weeli enenyete Waakh iyookkotiis ka soouume falla.

¹⁰ Afa kaldach on koolo ichoow falo leeyamiitiin. ꞌDooꞌd Kiriistokaaw, uus iꞌdaas itaahan.

¹¹ Bicchehi haaggan ichoow bicchehi magaaꞌde, koloo kalday issi biccheet a kasoobahaan?

¹² ꞌDooꞌd Kiriistokaaw, dahar maanta medeer a dela? Ommos geeyi hayay bejelo a dela? Mele! Issi bicche hadaade, bicchehi haaggan ma soobihisso.

Kharati rummaat Waakhe katamiit

¹³ Chiꞌ goytiin ka etoo khara yahe toro haag ichoow suujoon garti jiro, jiroti haaggane us jiro ka, samacchaari khara kayamiite wihi haaggan us yeelo ka a tuso giꞌde.

¹⁴ Iꞌdaasenyi chirri uuraah inaaf ichoow bolokh buuhicheene toro la wihi awtaahha on yowatti, tab serey iisgeenne ommos yeedi rummaat aꞌdiiꞌdin.

¹⁵ Kharati iꞌdee goobi Waakh ma katamiite iꞌdaasenyi a ti harratane, ti wahanyeyyohi Waakh menye, a ti Seytaan.

¹⁶ Iꞌdi tahe inti kalꞌdarri kijirto toro la enenyet wihi awtiissa on yowti, intaas wihi jiro a hugunꞌdarri ichoow suujoonki noole layeelo.

¹⁷ Iꞌdaasenyi kharati Waakh katamiit a miꞌdabe, nebeye ꞌdoonta, a samacchaare, nabahe sudda, uure nugussahe, gurnaanki haaggane dessa, enenyet seley ma sassaahto toro la ma iskaayyeesso.

¹⁸ ꞌDooꞌdi enenyet isineybicho la, a iꞌdoo icho ilinti nebeyeet il gessaane, ꞌdee gurnaanki icho delaan la a jiroti fissan.