Yaakoobo 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Enenyet seley asassaahina

¹ ꞌDooꞌd Kiriistokaaw, atin Yeesso Kiriistohi Kamureenenye toro weynaan tuumman leh a rummeysatteen gone, taba enenyet seley asassaahina.

² Eemba a kulanteene etoo gaaddi weyti gato miige khabo, lahaagti ꞌdahab far kakhabo soogel. Toro etoo addane miskiinenye, gaaddi ꞌdebbeysatte khabo soogel.

³ Kolossoo eti kamure inkaanyit ka soodowwaassaane, mehe itadeehiin ya, “Komborta haaggan koorrommo,” iꞌdaasenyi ki miskiine mehe itadeehiin ya, “Intuus tolosso,” ommos, “Il orrommo.”

⁴ Iꞌdaakka atin enenyet seley ma sassaahine toro la mali suuje ka enenyet ma hukkumin a?

⁵ ꞌDooꞌd Kiriistokaaw, waha daaga bal, Waakh ꞌdooꞌdi harrata ka miskiin liiekkaacho ma soobahsanne, ꞌdee kakhuufnaanki icho Yeesso kakhuufaan ka Waakh icho kamurre ma iekkaanna? Toro la Waakh ꞌdooꞌda ma soobahsanne ꞌdee dakhi Waakhe Waakh ꞌdooꞌdi usu ꞌdoono iayyiche ma muꞌdan a?

⁶ Iꞌdaasenyi atin miskiino lakhaanyo a kadowteen. Kamurre menya sina atin kawaarisso? Toro la icho menya kootiin atin geesso?

⁷ Kamurre menya magah Yeesso Kiriistoki liinkaanyito atin lakawaho igafto?

⁸ Chirri atin rumanka amuri weyti khummane Yeessohi karnateene inno siiche, Chiirnaanneti Waakh goya kachiirane, “Ollokkaah geeddi at isꞌdoonto ꞌdoon,” yadeeh raahtaan, haage yeessaan.

⁹ Iꞌdaasenyi chirri atin enenyet seley sassaahtaan, atin uskeele yeessaane toro amurreti Waakh a jebisseen.

¹⁰ Iꞌdi tahe eti amurreti Waakh tuumman raaho iꞌdaasenyi aytoo kalday katarraantarrate, sinati eti amurre tuumman jebcho liigoocha.

¹¹ A mehe Waakkhi, “Makhaabali kaah ieheynan ommos makhaabassi taah ieheynan aleeurꞌdin,” yidah on, “Weeli enenyet dubunuunu iigaasan,” laka yidah. Chirri at makhaabali kaah ieheynan ommos makhaabassi taah ieheynan ileeurꞌdine, iꞌdaasenyi at enenyet dubunuunu tagiis, at amurreti Waakh a jebissa.

¹² Taba saggi ꞌdooꞌdi Waakh amurretaas enenyet furto dowwanoha ka kahukkumo iyeyyeeda toro la ijira.

¹³ Iꞌdi tahe eti ꞌdooꞌdi addan uur ikanugleysan, Waakh maanti us ꞌdooꞌd hukkumo laka usu uur ma inugleesti. Iꞌdaasenyi, eti ꞌdooꞌdi addan uur inugleesti maanti lahukkumo, walah us karooro mele.

Eti Waakh kakhuufo wihi us yeelo ka usu rumanka Waakh kakhuufo a tusa

¹⁴ ꞌDooꞌd Kiriistokaaw, chiꞌ etoo, Yeesso a kakhuufa essi, iꞌdaasenyi wihi us yeelo usu rumanka Yeesso kakhuufe itusin, haaggoh ibahta? Kakhuufnaanki iꞌdaase usu ribaayi?

¹⁵ Eemba etoo koo Kiriisteenye gaad laaye toro la gololi maan dakkhan ikhabine jira.

¹⁶ Chirri etiinko etaas, “Nyaam nebey leeiro, roffo iskajeyiche toro mujjum golosso,” idowo iꞌdaasenyi wihi us ꞌdoono ka igargaarin, haaggoh ibahta?

¹⁷ Saggaas on u kakhuufnaanki Yeesso Kiriisto lakakhuufo iꞌdaasenyi haag liiyeelin, kakhuufnaankaas a yumuy.

¹⁸ Iꞌdaasenyi etoo mehe yadeeh ya, “Eemba at Kiriisto a kakhuufta, ani la haage yeela.” Wihi an etaas ilaabo a mehe ya, “Bal saggi at Kiriisto on ikakhuufto toro la haag iyeelin itus. Ani la haaggi an yeelo ka saggi an Kiriisto ikakhuufo a kitusaa.”

¹⁹ Saggi Waakkhoo kalday on ijiro a rummeysatta? A haaggantahe! Ginnayyo laka saggi Waakkhoo kalday on ijiro a rummeestaane, roorro ka harmaan.

²⁰ ꞌDalamoow, anihi saggi Kiriistohi lakakhuufo toro haag liiyeelin wihi ilmarhaatteet iyahiin kituso ꞌdoonta?

²¹ Aacchiheenki Aburaaham layadeeh, jeenteti wihi us yeele menya Waakh usu eti fissan iekkaache? Wahaas la a maanti us inankiiski Isakh layadeeh chalag ka Waakh soorriyo ikabahin leheet.

²² Wihi atin agartaan kakhuufnaanki us Waakh kakhuufo ichoow wihi us yeele a israaheen. Toro la wihi us yeele ka, kakhuufnaanki us Waakh kakhuufo tuume lakayeele.

²³ Chiirnaanneti Waakhe, “Aburaaham Waakhe rummeeste, Waakh la eti fissan iekkaache,” tadeeh a labuuhiche. Aburaaham la aali Waakhe lakawahe.

²⁴ Kola saggi Waakh jeenteti inno usu ikakhuufno kalday on menye, jeenteti haaggi inno yeello ꞌdooꞌdi fiffissan inno iekkaacho a agartaan.

²⁵ Saggaas on u inanti malaayeenye Raahab layadeeh laka iꞌdaas on eheet. Jeenteti wihi haaggane iche yeesse iche ꞌdooꞌdi Issiraayele ꞌdegeye inti icho baryaan isiisse, toro jitoo addan igattuu, Waakh iche laka eti ortiis ka fissan ma iekkaanna?

²⁶ A mehe enenyeti rubey ikhabin a yumuy. Saggaas on u kakhuufnaanki inno Waakh kakhuufno haag liiyeelin a yumuy on.