Yaakoobo 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Bariito

¹ Khadaaba eti atin isoochiiro, a ani Yaakoobo. Anna a bowꞌdati Waakh ichoow bowꞌda Yeesso Kiriistohi Kamureene. ꞌDooꞌdi an isoochiiro la a ꞌdooꞌd Kiriistoki yaafohi tomon ichoow lammeenye Issiraayelenye harra tuumman kataasan. Nebeeheyte?

Sinayyohi khar kayamiit ichoow uskeeli lakijiito

² ꞌDooꞌd Kiriistokaaw, maambaaw sinayyohi khar kayamiit atin isoobahaan weyti hamaad iekkaacha.

³ A mehe saggi atin igarattaan u, sinayyo kakhuufnaanki atin Yeesso kakhuuftaan usu ki rummaatenye kajaane, toro sinayyohaas miigti atin kagarrahsattaane delaan.

⁴ Maantaka taba miigti atin kagarrahsattaan tuum hiliche a massisso, ꞌdee ꞌdooꞌdi iiꞌdowe ateeha, toro la ꞌdooꞌdi wohoo rucchul laka ikaankhaneynan ateeha.

⁵ Iꞌdaasenyi chirri etiinkoo khara laayahe, Waakh a daaho Waakh la usu a siichaa. Iꞌdi tahe Waakh enenyet tuumman iꞌdaanu weyti walah siicha toro enenyet ma kofo.

⁶ Iꞌdaasenyi eti Waakh walah daaho, uus uurlammaal khabine, saggi Waakh wahaas us daahe isiicho a kakhuufo. A mehe eti tuummane uurlammaal khabo, a iꞌdi irti beyti buure goyaka hafar kolba ankoo ilaabo.

⁷ Eti iꞌdee uus kol us Waakh wohoo kaꞌhelo koogeynan.

⁸ Eta uurlammaal khabo, jirotiis kol dakkhan maamba fooloo yeerenye bihissa.

Waansihi kamurre ichoow miskiino miinsan

⁹ Eti Kiriisto rummeeste miskiine weynaantiisti buure a keeylajo.

¹⁰ Iꞌdaasenyi eti kamure, weynaantiisti rucchul a keeylajo. Iꞌdi tahe eti kamure iꞌdi fiikhti yibaat u a baaba.

¹¹ A mehe orrahe kuleeli walah gubto leesookorta, geey angagissa, fiikhe la khubatta, haaggiche la ibaaba. Saggaas on eti kamure laka hiliis haaggichaayi baaba.

¹² Waakh eti sinayyohi kharaat ka garrahsati a imaala. A mehe inkoo us kajmeyyohaas ka mujjum tolossate, Waakh kalaꞌddi us ꞌdooꞌdi usu ꞌdoono iayyiche iche siicha, kalaꞌdda la a jiroti jirtuu imassan.

¹³ Chirri etoo kajme ka uskeel lakalugꞌdo, uus “Waakhe kajme ka uskeel ikalugꞌda,” elan. Iꞌdi tahe Waakh kajmeti uskeel kaluguꞌddo ka ma lakajo, toro Waakh et us kajmeti uskeel kaluguꞌddo ka us kajo mele.

¹⁴ Iꞌdaasenyi ebba chiꞌ kajmeti uskeel kaluguꞌddo ka lakajo, geedda ꞌdooninti us uskeel imoono jiitto iche angey lagessa.

¹⁵ ꞌDeerka inkoo uskeelaas liimoono lasoouume ka, uskeel dessa. Uskeel la chuꞌus tuum weynaate, omootti armaanjireen dela.

¹⁶ ꞌDooꞌd Kiriistokaaw, uus atin leekkeysan.

¹⁷ Siinti tuummane haaggane toro la eloo rucchul laka ikhabin, sereye katamiite toro la Waakkhi Aabbaheenenye banayhi saraat tuumman soouume iche katamiit. Banayhaas a geeddi icho urgiyaane mugꞌdi yateehiin. Iꞌdaasenyi Waakh iꞌdaaru laka ma urgiyo.

¹⁸ Maliis ka wihi us gooche, a ki us yeediiski rummaat ka jiroti husub inno siicho. Iꞌda ka wihi us soouume tuumman goyaka, wihi us soobahsate orate nateeh.

Yeedi Waakh daagno toro la yeello

¹⁹ ꞌDooꞌd Kiriistokaaw, taba waha tissiba, atin tuumman dowwa nabah suda, dowwa ayeedina, dowwa ahollowina.

²⁰ Iꞌdi tahe holi weeli enenyet jiroti fissane Waakh ꞌdoono ma keeno.

²¹ Maantaka, wihi uurassiin biꞌdirroocho tuumman ichoow suujoonki noole atin yeessaan kasootaba. Wori Waakh uurassiin goya gesse ribin atin yabuuꞌd samacchaar on khaadda.

²² Toro la Yeedi Waakh nabah kalday iisudina. Iꞌdaakka a isekkeysattaan. Wihi us yeela essi laka yeela.

²³ Iꞌdi tahe eti tuummane Yeedi Waakh nabah on isudo iꞌdaasenyi wihi us essi iyeelin, a iꞌdi eti kitaab ka fooliis ꞌdeyꞌdoocho,

²⁴ inkoo us isfiiriche irti chirraas on toro fooliis iꞌdi us yahe kadabo.

²⁵ Iꞌdaasenyi eti amurreti eloo rucchul laka ikhabine enenyet soofurto mujjum fiiricho toro la kol dakkhan kamassi, toro la wihi us daage ikadabine iꞌdaasenyi raaho, Waakh etaas wihi us yeelo ka a imaala.

²⁶ Chirri etoo kol us wihi Waakh ꞌdoono mujjum raaho koogyahe toro la harrabiis ijeyin, etaas a isekkeesta, saggi us Waakh iraaho la a wihi ilmarhaatteet on.

²⁷ Jitaas inno Waakkhi Aabbaheene mujjum karaahno us khaatti uruftoo rucchul laka ikhabine toro wohoo ikaankhaneynan, a ki nyaakhuti abar ichoow ooyo laa ichoow muunkhoyyo sinayyohicho ka mujjum lawoywoyo. Toro la wahanyeyyohi harratane sussuujenye enenyet biꞌdirroocho islakalaabo.