Tiito 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo Tiito bariito ierga

¹ Eti khadaaba kisoochiiro a ani Baawulohi ilbooyi Waakhenye, toro la ergaano Yeesso Kiriistee. Anna a liisoobahche, ꞌdee ꞌdooꞌdi Waakh soobahsate gargaara Waakh mujjum kakhuufa, toro la wori rummaate Kiriisto miinsane jiroti Waakh ꞌdoono lajiro icho woya.

² Wora rummaat ichoow kakhuufnaankaas la khajjeeli saggi icho jiroti jirtuu imassanne goorat Waakkhi been igoon geeddi harra liisoouumin iayyiche ikhabaane siicha.

³ Ulla ibeenki usu rubeytiis gooche ka woriis inno tuse. Wora Haaggan la a ki Waakkhi ꞌDoorribeheene amuriis ka dahanteey soogesse, cheek iyidah.

⁴ Eti an khadaab ichiiro la a ati Tiitohi kakhuufnaanki inno Kiriisto kakhuufno ka iꞌdi weeleeye. Waakkhi Aabbaheene ichoow Yeesso Kiriistohi ꞌDoorribeheene ba kimaalaane nebey kaakaalaan.

Hili Tiito kurti Kireete bicche ukkuricho kijirto ka haaggicho

⁵ Kireete kaatabe, ꞌdee hili goorat dabare khumissa, toro la iꞌdi goorat an kiidah u, ilkerengeeto tuumman ka ewweenki urur Kiriisto woyo soobihissa.

⁶ Wihi Waakh gooche, eti urur Kiriisto woyo, a eti wohoo rucchul laka liikacheekan, a makhaabali makhaabassoo kalday on khabo, nyaakhutiis Kiriisto rummeeste, nyaakhutiis uskeeli buurenye iꞌdaanu layeelo ichoow yeeddaagiwwaayyo liikacheekan.

⁷ Toro la eti urur Kiriisto yaakhicho, hili Waakhe dahanohiis lagesse gone, a eti wohoo rucchul laka liikacheekan. A eti rannyaat ikhabine, holholo ieheynane, meleefu ieheynane, enenyet ijahine, jiti baabule ka chilim iyowan.

⁸ Toro la a eti goobiis ka enenyet martiisti, haag on ꞌdoono, samacchaarenye, fissane, munyeenye, isjeycho.

⁹ Toro la a eti wori rummaate lakakhuufo laabche mujjum khuccho, ꞌdee eti wora ka ꞌdooꞌdi addan uur miigoon yabuuꞌde toro ꞌdooꞌdi wora tirrimo uskeelicho icheekin yabuuꞌd.

¹⁰ Iꞌdi tahe ꞌdooꞌdi ittaawenye weynaan iinkaanyitine, worassi indigir laa ka ꞌdooꞌd ekkeesti jira. Kach ka la a ꞌdooꞌdoo Yaꞌhuude Kiriisto rummeesti, ꞌdooꞌd Kiriisto a lakhandiyo essi.

¹¹ Tabe ꞌdooꞌda aficho hid. Iꞌdi tahe wahanyeyyoha kootte ikamaline icho enenyet abchaan ka, goobassi kulman wori rummaat a buucheen. Waha la jeenteti icho chilim iꞌdoonaan on iyeelaan.

¹² Gorsatoo tichee goorat wihi iche tidah a mehe ya “ꞌDooꞌdi Kireete, a ꞌdooꞌdi lagarti been leh, a iꞌdi binahi sussuujenye enenyet bakkicho toro la seyꞌho lehe ꞌdamaammee.”

¹³ Ayta eta cheeke a rum. Maantaka tabe ꞌdooꞌda weyti leejaakhe, ꞌdee wihi rummaat mujjum a kakhuufeene,

¹⁴ hawweesseti Yaꞌhuude indigir ikhabin la iicho nabah isudine, amurreti ꞌdooꞌdi yeedi rummaat ꞌdiiꞌdo la iicho raahin.

¹⁵ ꞌDooꞌdi rubeyohicho ka eloo rucchul laka ikhabin, wahanyeyyohi jirota tuumman a leemunya. Iꞌdaasenyi ꞌdooꞌdi biꞌdirenye Kiriisto irummeysan ka, walah tuumman a biꞌdir. A mehe malassicho ichoow rubeyohichoki haag ichoow suujoon seley saaho a lakheerooche.

¹⁶ ꞌDooꞌda Waakh a garanna essa, iꞌdaasenyi jiroti icho jiraan ka Waakh a ꞌdiiꞌddanyahiin. Weyti laꞌdiiꞌddanyahe, yeed ma daagaane, haaggoo rucchul laka yeelin ma yabuuꞌdiin.