Rooma 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo urur Kiriistoki Rooma bariito ierga

¹ Haaggi noole walaasseenti Fiibi layadeehe too Kiriistee miinsane an atin icheeko a jira. Iche laka urur Kiriistoki ilkerengeetti Kenkereeya ifassa.

² A atin daaha, jeenteti atin ichoow Kamur ba wohoo kalday itahiin u, nyaama soodowweesda toro la wihi iche atin kaꞌdoonto kagargaara. Iꞌda yeela iꞌdi ꞌdooꞌdi Waakh isiyeeluu. Iꞌdi tahe Fiibi rubeyche ꞌdooꞌdi ittaawenye gargaarte, toro la ani laka a igargaarte.

³ Birisiila ichoow Akiila bariitoteey eleelicha. Hil Yeesso Kiriisto ka a iswalhinna.

⁴ Lammacho ba la goorat a igargaareene ichoowka jeentetaas u liigaasan leheet. Ani kalday la menye, ururre Kiriistoti yaafohi Yaꞌhuud ieheynan tuumman icho weyti kalanneestaan.

⁵ Urur Kiriistoki minkicho ka isꞌhelo bariiticha. Aaleeyki an weyti ꞌdoono Ebeeneta layadeeh bariiticha. Us a eti oraate ili Aassiya ka Kiriisto rummeeste.

⁶ Maariyati goorat jeentetiin u weyti hol dowte bariiticha.

⁷ Andirooniko ichoow Yuuniya bariiticha. Icho goorat jeela ikaleejireene toro la a yaaftaaya. Lammacheba la a ergaanoti weyti lagarti, toro la ortaaya Kiriisto rummeesteen.

⁸ Aaleeyki an weyti ꞌdoono Kamur ka ani ichoow usu ba wohoo kalday nahe, Ambiliyaanto layadeeh bariiticha.

⁹ Urbaanohi ullaka hil Kiriisto ka inno walhicho bariiticha. Aaleeyki an weyti ꞌdoono Isitaaku layadeeh bariiticha.

¹⁰ Abeelehi kakhuufnaanki us Kiriisto kakhuufo ka lakaje bariiticha. Goob Ariistobulo bariitoteey eleelicha.

¹¹ Heroodiyonhi yaafteeye bariitoteey eleelicha. ꞌDooꞌdi goob Narkiise Kamur rummeeste bariiticha.

¹² Tirafeenna ichoow Tirafoossa bariiticha. Deyyehota weyti Kiriisto hol idowta. Beersiti weyti aaleeyenye hili buure Kamur ihaaggisse bariitoteey eleelicha.

¹³ Ruufohi Kamur soobahsate kiis kayeesse ichoow abartiisti ani laka saggi weeliche iwoywoyte bariiticha.

¹⁴ Assinkiriito ichoow Fileegon ichoow Hermes ichoow Baatirooba ichoow Hermas ichoow ꞌdooꞌdi Kiriisto rummeeste icho iskhabaan tuumman bariiticha.

¹⁵ Filoologaas ichoow Yuuliya ichoow Neereya ichoow walaassiis ichoow Oliimbaas ichoow ꞌdooꞌdi Waakhe tuummane icho iskhabaan bariitoteey eleelicha.

¹⁶ Taba ꞌdoonin Kiriisto iskabariiticha. Urur Kiriisto tuumman a atin soobariitiche.

Waansihi ꞌdaꞌddaboote Baawulo ꞌdooꞌd Kiriistoki Rooma ikhabo

¹⁷ ꞌDooꞌd Kiriistokaaw, a atin hawwaasdee taba, ꞌdooꞌdi seley atin fido ichoow ꞌdooꞌdi halgo atin gelo, wihi icho atin idowaan wihi atin laabche buusanyahiin yuubsada. ꞌDooꞌda dakkhan kaseeha.

¹⁸ A mehe ꞌdooꞌdaas Kiriistohi Kamureene ma ifalaane, awtichooda on ifalaan. ꞌDooꞌdaas afe chinniyahe, enenyet af on kakoolichaan. Jita ka la malassi ꞌdooꞌdi dowwa luhlo lakakhaato ekkeestaan.

¹⁹ Enenyet tuumman saggi atin Kamur iraahtaan a garta. Anna weyti atin kahamaada. Iꞌdaasenyi wihi an atin kaꞌdoono kallaayo, taba giꞌde, wihi haaggan ka kharaawa, anki suujoon ka la, iꞌdi eti wohoo igaran ateeha.

²⁰ Waakkhi nebey tuumman leh Seytaan a baabiicha, ulla luhlohiin ilicho ka yabta. Yeesso Kiriistohi Kamureene ba atin imaala.

²¹ Timootihi ullaka hil Kiriisto ka iwalhicho a atin soobariitiche. Luukiyo ichoow Yaason ichoow Soosibatiro laka a atin soobariiticheen. Icho a yaaftaaya.

²² Anihi magaheey Teertiyo yahe, wihi Baawulo cheeke dahanteey ka khadaaba kachiire, bariitoti Kamur ka weyti atin soobariiticha.

²³ Gaayohi an leefiddiye urur Kiriisto minkiis ka kulmo a atin soobariitiche. Eraastahi chilimmeti ilkerengeeteet khuccho ichoow eteenki koo Kiriisteenye Kuwaarto layadeeh a atin soobariiticheen.

Baawulo ꞌdaꞌddaboka Waakh saaꞌda

²⁵ Waakh saaꞌdno! Us kakhuufnaanki atin Kiriisto kakhuuftaan ka atin miigoon a yabuuꞌd. Ulla Wori Haaggane Yeesso Kiriisto miinsane an cheeko ka waha yeelin a yabuuꞌd. Wora Haaggan la a ki inno awteen u iabanne, Waakh kalday on inno isoofura. Runta la a ti Waakh guꞌhassi ittaawe dagche.

²⁶ Iꞌdaasenyi runta dagsan toolla weyti lasoobabbakkaahiche. Runtaas la Chiirnaanneti Waakhe ꞌdooꞌdi Waákh íyeyyeedo ka a lacheeke. Waha la saggi Waakkhi jirtuu tuumman jiro iꞌdoono inno isoocheeke, iche liiyeele. Amuri us inno ibahche la a mehe ya, nyaama runtaas yaafohi harra tuumman abcha, ꞌdee Kiriisto a kakhuufeene, toro la a raaheen.

²⁷ Yeesso Kiriisto ka, Waakkhi kaldaye khara tuumman leh, jirtuu tuumman a lakoolicho. Aamiin.