Rooma 14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Eti kakhuufnaanki us Waakh kakhuufo ka ꞌdabakhe aꞌdarraawin

¹ Taba, eti kakhuufnaanki us Waakh kakhuufo ꞌdabakhyahe soodowwaacha, toro la mali us khabo wahanyeyyohoor mammarah miinsan, aleeiriirina.

² Iyookkoka, etoo kolossoo wihi us kakhuufo a mehe ya, suujoon kijiro mele chuꞌus gololbaaw us ꞌhele ka us yaham. Iꞌdaasenyi etoo addane Kiriisto kakhuufe, kakhuufnaankiiis la ꞌdaranyahe, imboogati gos kalday on yaham.

³ Eti golol tuumman yaham, uus ki imboogati gos kalday yaham ꞌdarraawin giꞌde. Eti imboogati gos kalday on yaham la, uus eti addane golol tuumman yaham uskeel igoon giꞌde. Iꞌdi tahe Waakh kan walah tuumman yaham laka a khaatte.

⁴ Atihi bowꞌdati etoo addan uuraah ka hukkunto a ayyo? Kamuriissa gon usu uskeel khabo kufe ommos usu uskeel ikhabine toollo goocha. Ulla ꞌdee rumanka a toolla, a mehe Kamur toollin a yabuuꞌde.

⁵ Toro la etoo ka seeroo seerassi addan a kamunya. Etoo addan ka la seerar tuumman a ekka on. Ebba ayta ka wihi leemujjume a goocho.

⁶ Eti tuummane seeroo munyaacho, iꞌdane yeela ꞌdee Kamur inkaanyita. Eti jid yaham la iꞌdane yeela ꞌdee Kamur inkaanyita. A mehe ullaka gololaas ka Waakhe kalaꞌd ilaaba. Eti gololletoo bujo laka iꞌdane yeela, ꞌdee Kamur inkaanyita, toro la Waakh kalaꞌd ilaaba.

⁷ A mehe eteen keley isijiro mele toro eteen keley isiyamuut mele.

⁸ Chiꞌinno jirro, Kamure ijirra. Chiꞌinno tuunne la, Kamure ituunna. Maantaka jirreey ommos tuunneey ka ba, inno a ki Kamur on.

⁹ Jeentetuu Kiriisto a yumuyye toro la toolla a jira, ꞌdee Kamuri ꞌdooꞌdi jiro ichoow ki ꞌdooꞌdi tuume yateeh.

¹⁰ Atihi imboogati gos kalday taham etaahkoo Kiriisto rummeeste uuraah ka ahukkumin giꞌde. Toro la atihi golol tuumman taham etaahkoo Kiriisto rummeeste aꞌdarraawin. Iꞌdi tahe inno tuumman berri komborti Waakh enenyet kahukkumo orcheeda tolossanna, inno lahukkuma.

¹¹ Wihi chiiran, “Kamur mehe essa ya, ‘An rumanka a jira gone, weeli enenyet tuumman orteey ka jilbo il a kaguꞌdda, ꞌdooꞌd tuumman la saggi an Waakh iahe ꞌdow ka a cheeka.’ ”

¹² ꞌDeerka ꞌdee eteemba berri wori jirotiis tuumman Waakh a idowdowa.

Etoo koo Kiriistee akufín

¹³ Maantaka taba giꞌde uus inno uskeel isigoon. Fiddihi inno fiddiino ka waha goonno, koloo kalday laka etaahki Kiriisto rummeeste daakki tarraantarricho iitaahane, ommos uskeel goya akalugꞌdin.

¹⁴ Jeenteti ani ichoow Kamureenki Yeessee koo kalday inahuu, wihi an tissibo kallaayo, golol awtiis u biꞌdire mele. Iꞌdaasenyi, chirri etoo gololoo biꞌdir leeyahe, ꞌdeerka gololaas etaas ka a biꞌdir gon.

¹⁵ A mehe chirri at gololi at taham ka etaahki Kiriisto rummeeste bolokh ikeento, wihi kiwoyo ꞌdoonin mee gon. Tab giꞌde, gololi at taham uus etaahki Kiriisto rummeeste Kiriisto jeentetiis iyumuy uskulaan!

¹⁶ Wihi kileehaaggan, uus etoo addan iꞌdi wohoo suuje ikhaatin.

¹⁷ A mehe dakhi Waakh ka wihi khumman golol ichoow wihi ladamo menye, a innohi fiffissane nebey khabno. Jeenteti inno ichoow Rubeyti Munyee wohoo kalday inahuu la hamaad a ꞌhella.

¹⁸ Eti tuummane iꞌdaasu Kiriisto ifalo la, Waakh a kahamaada, weeli enenyet laka a jilhaata.

¹⁹ Maantaka taba giꞌde wihi nebey keeno ichoow wihi inno iskamiigoonno hol a kadowno.

²⁰ Jeenteti golol on u hili Waakh uuskulaanna. Golol biꞌdire mele, iꞌdaasenyi a suuj chiꞌ walahbaaw at taham etoo addane koo Kiriistee tarraantarrichaan.

²¹ A deefta chirri jid liiumhane ommos farsoti sabiib liidamine ommos wohoo addane etaahki Kiriisto rummeeste tarraantarricho liiyeelin.

²² Wihi wahanyeyyohaas miinsane at rummeysatti, ati ichoow Waakh on isleegarda. Eti Waakh imaalo a ki haaggi us gooche ka uskeel isikagoon.

²³ Iꞌdaasenyi eti wohoo us yaham uurlammaal kakhabo chuꞌus wahaas yuhum, Waakh uskeele igoocha, a mehe wihi us yaham ka Waakh ma kakhuufo. A mehe wihi inno garanni, chaꞌat walahbaaw at yeesso ka Waakh ikakhuufin, at uskeele yeessa.