Rooma 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Weynaanti sirgaal afiche akutina

¹ Taba, weynaanti sirgaal afiche akutina. A mehe weynaanti Waakh soobahche on menye, too addan ma jirto. Weynaanti jirto la Waakhe intaas gesse.

² Maantaka eti tuummane weynaanti sirgaal tirrimo, amuri Waakh soobahche tirrima. ꞌDooꞌdi iꞌdaase la, hukkunki lahukkumo sina liigoocho iche isikeena.

³ Iꞌdi tahe weynaane ꞌdooꞌdi iche kanahisso ki haag yeelo menye, ki suujoon yeelo kanahissa. Atinhi weynaantiin ikaroorine ꞌdoontaan? Taba giꞌde wihi haaggan yeela. Iꞌda ka la weynaane a atin saaꞌdda.

⁴ A mehe weynaane a falfayyohi Waakhe haag atin iyeesso. Iꞌdaasenyi chaꞌat suujoon yeesse, roorro a khabta gon, a mehe miigti iche sirbi kaagelisso a khabta. Weynaane a falfati Waakhe, iche holi Waakh ka eti uskeel yeelo sirbi gelissa.

⁵ Maantaka, wihi lakaaꞌdoono a atihi weynaanti sirgaal afiche ikutin. Waha la jeenteti holi Waakh kalday on menye, iꞌdaasenyi uus ꞌdee rubeyoheen suujoon inno kacheekan.

⁶ Jeentetane kooddi laka iguttaan, iꞌdi tahe weynaanti sirgaal a falfati Waakhe, icho la geeddi noole hil haaggichaane, wihi lakaꞌdoono buuhichaan.

⁷ Taba giꞌde, ebba wihi miinsan siicha. Taba eti kooddi goocho kooddi iguta, eti chilim liiguto la chilim iguta. Eti inkaanyit imale inkaanyita, eti roorro imasse la karoora.

Ollokkiin ꞌdoona

⁸ Mogti kaldaye atin iskakhabtaan, ti atin isꞌdoontaan on menye, too addan iiskakhabina. Iꞌdi tahe eti etoo addan ꞌdoono, rumanka amurre Muusa wihiche a buuhicha.

⁹ A mehe amurreta, “Makhaabali kaah ieheynan ommos makhaabassi taah ieheynan aleeurꞌdin, ogoos dubunuunu agelin, walah ahatin, walah amaanjeeran,” tadeeh tuumman ichoow chiꞌ too addan jirto, amuroo kaldach on kakulanta. Amura la mehe yadeeh ya, “Ollokkaah geeddi at isꞌdoonto ꞌdoon.”

¹⁰ Chaꞌat ollokkaah ꞌdoonto wohoo suuje ma iyeesso gon. A mehe ꞌdooninti rummaat, amurre tuumman a buuhissa gon.

Ibeenki Kamur atin ribo a soodowwaate

¹¹ Waha tuumman yeela, iꞌdi tahe ibeenneti luurꞌdo kola a kutte, ꞌdeerka urꞌdummetiin kasooneybaada! A mehe ibeenki Kamur inno ribo, maanti goorat inno Kiriisto rummeysanne ichoow toolla, toollane soodowwaate.

¹² Ibeen kola a kute, il a soobarya. Maantaka taba, wihi suujenye mugꞌdi kasootaba. Birti haaggane banayeet okhsada, ꞌdee uskeel diha.

¹³ Jirotiin tuumman wihi mujjumenye saggi fiddihi ꞌdooꞌdi banay goya fiddiyo a eheetti. Taba giꞌde, daawohi biꞌdire ommos meleefu uus goytiin kijirine, ommos uus ꞌdooꞌdi isidisanne isleeurꞌdo ommos sohoꞌddarri goytiin kijirine, ommos uus jihit ommos inaaf laka goytiin kijirin.

¹⁴ Taba giꞌde sagag tuumman ka Yeesso Kiriistohi Kamure iꞌdiis ateeha, toro la wihi uurassiin goya kijiro uskeel imoono koloo kalday laka araahina.