Mattaayo 9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso etoo sare hanjaawte samaacha

¹ Yeesso koobanhoo kore, beyti Gaalilaaya maahe nokhte ilkerengeetti us fiddiyo irte.

² ꞌDooꞌdoo etoo khannane sar tuumman hanjaawte ilaal kasoosiꞌde, ikeene. Chirri Yeesso saggi ꞌdooꞌdaas usu ikakhuufo arge ka, wihi us etaas sare hanjaawte iyidah, “Inankaaw, aburꞌdowin! Uskeelaah a liikaakutee!”

³ Tagaammetoo amurre uus iche waha daagte ka wihi icho uurassicho ka esseen, “Eta a gafe.”

⁴ Yeesso malassicho garte, wihi us worsate, “Mehede mala suuje uurassiin ka idowattaan?

⁵ Mehe maanta ki addan kaꞌdabakhe, chirri an, ‘Uskeelaah a liikaakute,’ iadeeh a ommos an, ‘Kahe soho’ iadeeh?

⁶ Iꞌdaasenyi saggi Ínam Aadam antohi us harrata ka enenyet uskeel ikakuto ikhabo a abattaan.” ꞌDeerka wihi us eti sare hanjaawte iyidah, “Tolosso ilaalaah okkhiche, goob iro!”

⁷ Et la tolossate, goob irte.

⁸ Urur uus waha arge weyti roorro gesse, Waakkhi enenyet antohaas geeddee siiche koolicheen.

Yeesso etoo kooddi goocho Mattaayo layadeeh waha

⁹ Yeesso intaas ka orey isohtaayi, etoo Mattaayo layadeeh usuhi meessi kooddi lakagoocho goya fiddiyo arge. Yeesso la, “Isooraahe abattiteey ateeh,” iyidahye, Mattaayo la kahe usu raahe.

¹⁰ Yeesso min Mattaayo kagolossataayi, ꞌdooꞌdoo kooddi goocho ittaawe ichoow ꞌdooꞌdoo ꞌdooꞌdi uskeel leh liiekkaacho ittaawe yimiyye Yeesso ichoow abattitiis ba leegolossate.

¹¹ Farissaayo chirri iche waha agarte ka, wihi iche abattitiis worsatte, “Eti atin iween a iꞌdoh ꞌdooꞌdi kooddi goocho ichoow ki uskeel leh ileegolossata?”

¹² Yeesso la wihi icho essaan daage, wihi us ilaabe, “ꞌDooꞌdi ilkitárri yowti ki feffeyyan menye a ki khakkhannan.

¹³ Iꞌdaasenyi taba wihi yeeda essi wihiis abda, ‘An soorriyoti at ibihisso menye, atihi ꞌdooꞌdi addan uur inugleysatti iche ꞌdoona.’ A mehe ꞌdooꞌdi an iimiyye an waho, ki ꞌdooꞌdi fiffissan isiekkaacho menye, iꞌdaasenyi a ki uskeel leh.”

Yeesso woroo husub enenyet abcha

¹⁴ ꞌDeerka abatti Yoohanahi Enenyet Baattissiyo Yeesso itimiyye wihi iche worsatte, “A iꞌdohe nah ichoow Farissaayo af ihidanna, iꞌdaasenyi abattitaah af ihidan?”

¹⁵ Yeesso wihi us ilaabe, “ꞌDooꞌdi mindischo yimiy ma ooyo geeddi eti min disti intaas kijiro menya? Maane a tamiit ti ꞌdooꞌd eti min disti lakakhaato, ꞌdeerka ꞌdooꞌd af hiiti.”

¹⁶ Yeesso la yeed orey iwoye wihi us yidah, “Et goonankoo dafareete husub gaaddiisti raagane kharradde kadaddabo mele. A mehe goonankaas husub a isinyaama kharradiche la orey isohta.

¹⁷ Ommolla et farsoti sabiibe husub, urgohi uktoote raagan kachibo mele. Chiꞌicho iꞌda yeeleen, urgo a dowaane, farso khubatta, urgo laka lawaaya. Iꞌdaasenyi farsoti sabiibe husub urgohi uktoote husub on lakachiba. Iꞌdaas ka farso ma khubatti, urgo laka ma dowaan.”

Yeesso inanti bujje sookahcha, makhaabassi khannan samaacha

¹⁸ Yeesso urur leeyyeedaayi, etoo minki weysiite Yaꞌhuud iween yimiyye, ortiis ka jilbo il kaguꞌdde wahte wihi us yidah, “Inanteey toolla dow on bujje, iꞌdaasenyi kaale dahantaah kaꞌdaare, ꞌdee jiro a ꞌhesso.”

¹⁹ Yeesso tolossate, abattitiis khabaayi makhaabal raahe.

²⁰ Chirraas on makhaabassoo khannane geeddi guꞌh tomon ichoow lamma ba diigte Yeesso ꞌdubiis leetimiyye, laddi kabuuꞌdiis ꞌdaarte.

²¹ Uuriche goyaka mehe tidah ya, “Chirri an kabuuꞌdiis on ꞌdaare, a samaada.”

²² Yeesso la urgiye makhaabál arge, wihi us iyidah, “Inantaay, aburꞌdowin! Kakhuufnaanki at ikakhuufte a kisamaache.” Makhaabale chirraas on samaatte.

²³ Chirri Yeesso minki eti minki weysiit iween gele ka, ꞌdooꞌdi indulle afuufo ichoow ururi kowdooti ba arge.

²⁴ Wihi us iyidah, “Khar ibaha, iname ma umaatane, iꞌdaasenyi a uꞌdurta.” Icho tuumman la usu kareyteen.

²⁵ Chirri urur bahe ka, Yeesso minki iname jiifto gele, inám dahan sookhabte, iche la sookahte.

²⁶ Wahaas us yeele ilaas tuumman ka taaꞌheen.

Yeesso ꞌdooꞌdoo lammeenye indo laa samaacha

²⁷ Chirra Yeesso intaas kabaho ka, et lamma indo laa usu raahte. Lammache ba riirte, “Ínam Dawuud, uur nah isoonugleyso,” tidah.

²⁸ Chirri Yeesso minki us fiddiyo gele ka, reeri kootte lammeenye indo laa laka min leegele. Yeesso chirraakka wihi us worsate, “Atin anihi atin samaacho a rummeysattaan?” Iche la wihi iche ilaabte, “Aa Kamur.”

²⁹ Yeesso ꞌdeerka indohicho ꞌdaare, “Saggi an atin isamaacho a kakhuufteen gone, a atin samaacha,” iyidah.

³⁰ Chirraas on indo bahcheen. Yeesso icho weyti tootooche wihi us iyidah, “Etoo kalday laka uus waha aban!”

³¹ Iꞌdaasenyi iche la iratte, wor Yeesso ilaas tuumman ka cheekte.

Yeesso etoo af laa samaacha

³² Chirra reeri kootte lammee baho ka, ꞌdooꞌdoo etoo ginna dakhatti yeyyeedin iubaaꞌdan Yeesso ikeene.

³³ Chirri Yeesso et ginna kabahche ka, eti kootte yeyyeedin iubaaꞌdan yeyyeede, ꞌdooꞌd la weyti girmeeste, “Nah injire wihi iꞌdee ili Issiraayel goyaka ma argin,” yidah.

³⁴ Iꞌdaasenyi Farissaayo wihi iche tidah, “Miigti karnati ginnayyoote enenyet ginna kabahcha.”

Gurnaanki Waakh a buure iꞌdaasenyi ꞌdooꞌdi hil haaggicho a koo rucchul

³⁵ Yeesso ilkerengeeto ichoow goobab tuumman goya tabe minassichoki weysiite Yaꞌhuud ka ꞌdooꞌd wori Waakh abche. Wori Haaggane dakhi Waakh miinsan icheeke, sugeerre ichoow khannaatte tuumman ꞌdooꞌd kabahche.

³⁶ Chirri us urur arge ka, weyti uur inugleeste, a mehe iꞌdi iiyti ersim ikhabin u, a waꞌdwaaꞌdaane, toro la et gargaaro mele.

³⁷ ꞌDeerka wihi us abattitiis iyidah, “Gurnaan a buure, iꞌdaasenyi ꞌdooꞌdi hil haaggicho a koo rucchul.

³⁸ Maantaka Kamuri gurnaan leh daaha, ꞌdee ꞌdooꞌdi ittaawenye gurnaan soogoocho a sooergo.”