Mattaayo 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso saggi ꞌdooꞌdi miskiine liigargaaro kaayyeeda

¹ Yeesso toro wihi us ꞌdooꞌd iyidah, “Chirri atin ꞌdooꞌd haag iyeessaan, wahaas saggoo ꞌdee enenyet atin ikoolicho iiyeelina. Chirri atin iꞌdaas yeessaan Aabbahiinki serey jiro kalaꞌd us atin guto mele.

² “Maantaka kolbaaw at etoo miskiine wohoo siisso, enenyet iistuttusin iꞌdi orran ꞌdooꞌdi iskaayyeelo minassi weysiite Yaꞌhuud ichoow jitat ka yeelo ꞌdee ꞌdooꞌd iinkaanyituu. Rume atin icheeka, icho kalaꞌddicho tuum a ꞌheleen.

³ Iꞌdaasenyi geedda at etoo miskiine wohoo siisso, uus etoo kalday laka saggi at isiisse garanne,

⁴ ꞌdee wihi at siisso dagsi on a eheetti. ꞌDeerka Aabbahaahki wihi dagsi ka layeelo argo, kalaꞌd a kiguta.

Yeesso saggi liiweesti ꞌdooꞌd abcha

⁵ “Kolbaaw atin weysattaan, iꞌdi ꞌdooꞌdi iskaayyeelo iitaahana. Iꞌdi tahe icho wihi icho ꞌdoonaan, a ichohi minassi weysiite Yaꞌhuud ichoow inti enenyet tuumman kaargo ka tolossati weestaane, ꞌdee ꞌdooꞌd tuumman saaꞌdo. Rume atin icheeka, icho kalaꞌddicho tuum a ꞌheleen.

⁶ Iꞌdaasenyi kolbaaw at weysatti, meessi liikaargin gele, Aabbahaahki indo ka liiargin waho, ꞌdee Aabbahaahki wihi at dagsi ka yeesso argo kalaꞌd a kiguto.

⁷ Kolbaaw atin weysattaan la iꞌdi ꞌdooꞌdi Waakh igaran yeeluu, yeedassi ittaawenye indigir laa eelanna. Wihi tahe icho kol waakkhassicho jeenteti yeedassaas ittaawe u weysihicho daagaane koogyahiin.

⁸ Saggi icho iweestaan iiweysanna, wihi tahe, Aabbahaah wihi at ꞌdoonto geeddi at isooidaahan laka a garta.

⁹ “Chaꞌatin weysattaan, sagga iweesda, “‘Aabbaheenyoki serey jiro, magahaahki munyee a liinkaanyito.

¹⁰ At ba enenyet tuumman dakhatta. Saggi goobaah ka in at ꞌdoonto liiyeeluu, harrata ka laka in at ꞌdoonto a layeelo.

¹¹ Gololeenyoki maan dakkhan nah sii.

¹² Uskeeli nah yeelle nah ikakut, saggi nah laka ꞌdooꞌdi uskeel nah iyeele uskeel ikakunnuu.

¹³ Kajmeti uskeel nah kaluguꞌddo nah kajeyiche, iꞌdaasenyi Seytaanki uskeel leh nah karib!’

¹⁴ A mehe chaꞌatin ꞌdooꞌdi uskeel atin iyeele uskeel ikakuttaan, Aabbahiinki serey jiro laka uskeeliin a atin ikakuta.

¹⁵ Iꞌdaasenyi chirri atin ꞌdooꞌdi uskeel atin iyeele uskeelaas ikakutin, Aabbahiin uskeeliin ma atin ikakuto.

Yeesso wori afi lahiiti kaayyeeda

¹⁶ “Kolbaaw at af hidatti, iꞌdi ꞌdooꞌdi iskaayyeeluu fool ariboon. A mehe icho fool a dakhnaata, ꞌdee saggi icho af ihiiteen tusaan. Rume atin icheeka, icho kalaꞌddicho tuum a ꞌheleen.

¹⁷ Iꞌdaasenyi geedda at af hidatti subakki geeyi oolif matah kasubho, foolaah dikho,

¹⁸ ꞌdee ꞌdooꞌdi addan menye, Aabbahaahki indo ka liiargin kalday on saggi at af ihidatte a abti, ꞌdee Aabbahaahki wihi dagsi ka layeelo argo, kalaꞌd a kiguto.

Yeesso wori kamurroonki goobi Waakh kaayyeeda

¹⁹ “Kamurroonkiin harrata ka meel iisigelinna. A mehe inta ka gubaal ichoow kuuttu a suujaachaane ꞌdooꞌdi walah hato la min a jebcha hata.

²⁰ Iꞌdaasenyi goobi Waakh ka kamurroonkiin meel isigessa. Intaas ka gubaal ichoow kuuttu ma suujaachaane, toro la ꞌdooꞌdi walah hato min ma jebchaane ma hataan.

²¹ A mehe inti kamurroonkaah kajiro, iche uuraah laka kajira.

Yeesso wori banayhi sareet kaayyeeda

²² “Ile iꞌdi taa u sar banaye ikeenta. Chirri indohaah haagganyahiin sartaah tuumman banaye buuha.

²³ Iꞌdaasenyi chirri indohaah suujyahiin sartaah mugꞌdi buuha. ꞌDeerka chirri banayhi at khabto lajicche at mugꞌdihi reebenye goya kijirta.

Koloo dakhi Waakh ꞌdonꞌdoon

²⁴ “Et kamur lamma ifalo mele. A mehe koo a ꞌdiiꞌdda ki addan la ꞌdoonta, toro la koo inkaanyitta ki addan la ꞌdarraawta. Waakh ichoow chilimme ba koloo kalday ma ifasso.

²⁵ “Maantaka wihi an atin iadeeh, jirotiin akawaꞌdwaaꞌdina, wihi atin tamhiin ommos wihi atin dantaan, ommos sartiin ka wihi atin gessattaan. Jiro golol ma kussan a? Sare la gaad ma kussan a?

²⁶ Chimbirohi saraat kamalda bal. Ilmo icho gos kachibaan mele, gurnaan bissaate icho meel gessataan la mele. Iꞌdaasenyi Aabbahiinki serey jiro on goollicha! Atin icho weyti kussantahiin gon.

²⁷ Etiinkoo maanta waꞌdwaaꞌdi us waꞌdwaaꞌdo ka jirotiis sahaꞌddoo kalday kakhayaayi?

²⁸ “A iꞌdoh jeenteti gaadeet u waꞌdwaaꞌd ikhabtaan? Bal fiikhti bahto yeya. Hil iche haaggisso gaad isikayowatti mele.

²⁹ Iꞌdaasenyi wihi an atin iadeeh, karnati goorat Soolomon layadeeh laka, kamurroonkiis tuumman khabaayi, gaaddiis geeddi fiikhta ma haaggan.

³⁰ Chirri Waakh hoosi keley baho, toolla jiro saahta ꞌdab lakalugꞌdo gaado, atin geeddaas ꞌdirihiis weyti ma atin gaado? Atin eenna geeddoo rucchul on Waakh kakhuuftaane!

³¹ ꞌDeerka awaꞌdwaaꞌdina, ‘Mehe numhe?’ eelanna, ommos, ‘Mehe nubhaabe?’ eelanna, ommos ‘Mehe gessanni?’ eelanna.

³² Iꞌdi tahe ꞌdooꞌdi Waakh igaranne wahanyeyyohaas kaallooꞌda. Aabbahiinki serey jiro saggi atin waha dakkhan iꞌdoontaan a garta.

³³ Iꞌdaasenyi koloo dakhi Waakh ichoow fissanoonki Waakh ꞌdonꞌdoon, ulla wahanyeyyoha dakkhan a ikaasookhayaa.

³⁴ Maantaka wihi at saahta ꞌdoonto akawaꞌdwaaꞌdin. Iꞌdi tahe maane ba wihicheki lakawaꞌdwaaꞌdo a khabta. Walah at sinati ibeen ba keeno sinatoo addan ikakhayto mele.