Mattaayo 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso bur sartiis ka ꞌdooꞌd Yeedi Waakh icheeka

¹ Yeesso inkoo us ururi buure arge ka, irte burroo kore, orronte. Abattitiis la isookhayte.

² Yeesso ꞌdooꞌd walah abinnaan sookhabte.

Yeesso ꞌdooꞌdi Waakh imaalo cheeka

³ “ꞌDooꞌdi Waakh imaalo a ki wahanyeyyohi Waakh ka miskiine, a mehe dakhi goobi Waakh a kichooda.

⁴ ꞌDooꞌdi Waakh imaalo, a ki toolla uskeeli weeli enenyet bolkhicho, Waakh icho uur a khoboochaa.

⁵ ꞌDooꞌdi Waakh imaalo, a ki samacchaare, Waakh harrati husub icho a siichaa!

⁶ ꞌDooꞌdi Waakh imaalo, a ki fissanoon iankayo toro isubgaati, Waakh icho a dargichaa.

⁷ ꞌDooꞌdi Waakh imaalo, a ki uur nugul, Waakh icho uur a inugleestaa.

⁸ ꞌDooꞌdi Waakh imaalo, a ki uurassicho ka eloo rucchul laka ikhabin, icho Waakh a argaanee.

⁹ ꞌDooꞌdi Waakh imaalo, a ki enenyet isineybicho, a mehe nyaakhuti Waakhe layadeeh.

¹⁰ ꞌDooꞌdi Waakh imaalo, a ki jeenteti icho ifissanyahiin u sina loomhicho, dakhi goobi Waakh a kichoodaa.

¹¹ “Waakh a atin imaala maanti enenyet jeenteteey u atin abaaro, sina atin omhicho, been ka suujoonki nool atin kacheekti.

¹² Girꞌdaama weyti hamaada giꞌde. Waakh goobiis ka kalaꞌddi buurenye atin gutaa. A mehe ꞌdooꞌdi Waákh íyeyyeedo goorat saggaas on sina liiomhiche.

ꞌDooꞌdi Yeesso raaho a iꞌdi magaaꞌdeet ichoow banay

¹³ “Atin a magaaꞌddi weeli enenyet tuumman. Iꞌdaasenyi magaaꞌde chiꞌiche gimbatiche waayte, saggoh toro liigimbaacha? Kola walah iche iroontahe mele, khubnaanki lakhubo enenyet yabti on menye.

¹⁴ “Atin iꞌdi banay u, enenyeti harratane jiti Waakh tussaan, ilkerengeetti hal sartiis kadisan la ma ladabo.

¹⁵ Toro la et taa bolkhicho baakhuul kaankubo mele. Taa a labolkhicha kombor lakorcha, ꞌdee eti tuummane min goya kajiro il kaarga.

¹⁶ Taba giꞌde atin laka iꞌdaasu, haaggi atin yeessaan weeli enenyet tuumman a argo, ꞌdee enenyet tuumman Aabbahiinki serey jiro a inkaanyito.

Yeesso a yimiyye ꞌdee Amurre ichoow wihi ꞌdooꞌdi Waákh íyeyyeedo cheeke buuhicha

¹⁷ “Kol an harra imiyye ꞌdee Amurre ommos wihi ꞌdooꞌdi Waákh íyeyyeedo enenyet abcho baabiicho akoogeynana. An baabiin ma imaatane, iꞌdaasenyi a imiyye wihi icho enenyet abchaan buuhicha.

¹⁸ Rume atin icheeka, chirri sereyta daayan ichoow harra massataan laka, aytoo rucchul laka amurre Muusa goya ma lakabahcho, ichoowka wihi lachiire tuumman labuuhicha.

¹⁹ Eti tuummane amuri amurreti Waakh goyaka rucchul laka jebche, toro la ꞌdooꞌdi addan laka iꞌdaas yeela iyadeeh, dakhi goobi Waakh ka walah us yahe mele. Iꞌdaasenyi eti tuummane amurretaas raahe, ꞌdooꞌdi addan iꞌdi iche ichiirantahe abche la, dakhi goobi Waakh ka a weenyahe.

²⁰ A mehe wihi an atin iadeeh, sammata fissanoonkiin ki tagaammeti amurre ichoow Farissaayo ikutin rumanka dakhi goobi Waakh ma gessaan.

Yeesso wori hol kaayyeeda

²¹ “Saggi goorat Waakh aacchinyeteen, ‘Weeli enenyet dubunuunu iigaasan, eti tuummane enenyet yigis la a lahukkuma,’ iyidah a daagteen.

²² Iꞌdaasenyi wihi an atin iadeeh, eti tuummane etoo keeye ihollowe, a lahukkuma. Toro la eti tuummane etoo keeye abaare Jaldaabti Weene Yaꞌhuude liikeena, hukkunta. Iꞌdaasenyi eti tuummane etoo addan, ‘ꞌDalanki marah,’ iyidah, a geeddi meessi ꞌdabi armaanjireen lakalugꞌdo.

²³ “Maantaka chirri at soorriyotaah chalagti Waakh soorriyo liikabahcho keente, at intaas ka saggi etoo keeye wohoo ikaakhabo kasooꞌhesse,

²⁴ soorriyotaas chalag orche katab. Koloo iro, eteeykaas isineyba, ꞌdee amiite soorriyotaah Waakh ibihi.

²⁵ “Chirri etoo kootiin kigeecho wohoo kaacheekti, etaas dowwa isineyba. Geeddi atin kootiin isohattaan isineyba. Chirri at iꞌdaas iyeelin, etaas eti ꞌdooꞌd hukkumo kicheekta, eti ꞌdooꞌd hukkumo la dahanti iskareet kigessa, iche la jeela kigelissa.

²⁶ Rume atin icheeka, jeelataas goya ma kasoobahto ichoowka mogtiis tuumman hiyyaayta.

Yeesso wori makhaaballeti oboorrihi kicho ieheynan leeuꞌdurto kaayyeeda

²⁷ “Saggi Waakh Chiirnaanne ka, ‘Makhaabassi taah ieheynan aleeurꞌdin,’ iyidah a daagteen.

²⁸ Iꞌdaasenyi wihi an atin iadeeh, eti tuummane makhaabassi tiis ieheynan yeye, maanjeerte uuriis ka uskeeli us makhaabassi tiis ieheynan leeurꞌdo iche gele.

²⁹ Maantaka chirri issaahti miigeet uskeel kaaluguꞌddo, issaas bihiche, rog! Atihi sartaah tuumman khabtaayi meessi ꞌdabi armaanjireen lakaalugꞌdo ka, atihi miilaahkoo waayto deefta.

³⁰ Chiꞌ dahantaahti miigeet uskeel kaaluguꞌddo la, dahantaas gooche, rog! Atihi sartaah tuumman khabtaayi meessi ꞌdabi armaanjireen lakaalugꞌdo ka, atihi miilaahkoo waayto deefta.

Yeesso wori eti arantiis tuum riho kaayeyyeeda

³¹ “Chiirnaanneti Waakh wihi kachiiran, ‘Chiꞌ etoo arantiis tuum riho, khadaabi saggi us iriho tuso a siicho.’

³² Iꞌdaasenyi wihi an atin iadeeh, eti tuummane makhaabassiis tuum rihe chiꞌiche mejeloo addan leeuꞌdurte on menye, makhaabalaas makhaabassaas uskeeli iche mejeloo kiche ieheynan leeuꞌdurto iche kalugꞌda. Eti makhaabassi tuum larihe disti la, uskeeli us makhaabassi tiis ieheynan leeurꞌdo iche gela.

Yeesso daatoti Waakh liidaatti woriche kaayyeeda

³³ “Amuroo addane aacchinyeteen liicheeke a daagteene, wihi us yidah, ‘Wihi at ayyisse yeele, wihi at Kamur idaatatte la yeel.’

³⁴ Iꞌdaasenyi wihi an atin iadeeh, adaatanna ba. Goobi Waakh akadaatanna, iꞌdi tahe goobi Waakh a komborti buurenye antoote Waakh.

³⁵ Ommos harra laka akadaatanna, iꞌdi tahe harra a komborti rucchule Waakh luhlohiis korcho ommos ilkerengeetti weene Yeerusaleem laka akadaatanna, iꞌdi tahe a ilkerengeetti Waakkhi karnatenye weene.

³⁶ Matakkaah laka akadaatan, iꞌdi tahe at tintaahtoo kalday laka ma dakhnaasso ommolla ma daayisso.

³⁷ Chirri at, ‘Aa,’ tidah, iꞌdaas on a eheetti. Chirri at, ‘Mele,’ tidah la, iꞌdaas on a eheetti. Wihi addane at kakhayto, ki uskeel lehe kayamiitiin.

Yeesso wori aassi lagutti kaayyeeda

³⁸ “Amuri, ‘Eti il kibahche at laka il bihi. Eti ilah kibahche la at laka ilah bihi,’ yidah a daagteen.

³⁹ Iꞌdaasenyi wihi an atin iadeeh, eti suuje aleetirrimin. Chirri etoo fodoori miigeet kiguꞌdde, fodoori addan laka siiche a kiguꞌddo.

⁴⁰ Chirri etoo kootiin kigeen ꞌdoono ꞌdee us ubbaaraahki deer kaakhaato, kabuuꞌdaah laka iduumi.

⁴¹ Chirri etoo iskareet meehiis kihosse, ‘Kiilomittatoo kalday siꞌd,’ kiyidah, at la kiilomittatoo kalday menye, kiilomitta lamma isiꞌd.

⁴² Eti walah kidaahe siiche, toro la eti wohoo amah ka kidaahe, wihi us kidaahe atiran.

Yeesso ꞌdooninti chiiy laꞌdoono kaayyeeda

⁴³ “Saggi goorat ꞌhor amur, ‘Ollokkaah ꞌdoone, chiiytaah la ꞌdiiꞌd,’ iyidah a daagteen.

⁴⁴ Iꞌdaasenyi wihi an atin iadeeh, chiiytiin ꞌdoona, ꞌdooꞌdi sina atin omhicho la iweesda.

⁴⁵ Iꞌdaakka nyaakhuti Aabbahiinki serey jiro tateehiin. Us ꞌdooꞌdi sussuuje ichoow ki hahhaaggan ba orrah a isookorcha, ꞌdooꞌdi fiffissan ichoow ki khokkhollokkhan ba hir siicha.

⁴⁶ Chirri atin ꞌdooꞌdi atin ꞌdoono kalday on ꞌdoontaan, kalaꞌd atin sugtaan mele. A mehe ꞌdooꞌdi kooddi goocho laka iꞌdaas on yeela.

⁴⁷ Chirri atin ꞌdooꞌdiinna on bariitissaan la walah addane atin ꞌdooꞌdi addan ꞌdirihiis yeesseen mele. ꞌDooꞌdi Waakh igaran laka iꞌdaas a yeela on.

⁴⁸ Maantaka saggi Aabbahaahki serey jiro ꞌdooꞌdiis tuum isikasoobahchuu, at laka tuum issoobihiche, ꞌdee wihi Waakh kaaꞌdoono yeel.”