Mattaayo 28 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso omoot kasookaha

¹ Inkoo Seeri Lanaso kute, baryoti ibeenki oraate teebataas ka, Maariyati ilkerengeetti Magdaala ichoow Maariyati addan irteene, goꞌddi Yeesso lakahawwaale sooyeyeen.

² Harra weyti sesseehte, a mehe hertoo Kamur goobi Waakhe katimiyye goꞌd iratte, daddaab ꞌdembeleeliite, daddaab sarche koorrommatte.

³ Herta fooliche iꞌdi ankhad u a ababa, darfohiche la a waha dakhane iꞌdi yooleete.

⁴ Iskarti meel yuubisso Herta Waakh karoorte nahtim ka hamarte sussuuhte.

⁵ Herti Waakh wihi iche deyyeho itidah, “Roorro akhabina! A mehe saggi atin Yeessohi goorat massalaaba lakakaahe iyowattaan a gardaa.

⁶ Inta ma kijiro, iꞌdi goorat us yidah u, omoot a kasookahe. Kaaleya, inti goorat us jiife yeya.

⁷ ꞌDeerka dowwa irda, abattitiis mehe itadeehiin ya, ‘Us omoot a kasookahe, ortiin ili Gaalilaaya a irta. Intaas ka la a agartaan.’ Toolla an a atin isoocheeke.”

⁸ ꞌDeerka oboorri usuhi roorro khabo iꞌdaasenyi hamaado goꞌd kabahe, oryeen abattitiissa icheekaanee.

⁹ Chirraas on Yeesso icho ꞌhele, “Waakh ba nebey atin kakaala,” iyidah. Icho la soonyaameene, luhlohiis khabteene, usu wahteen.

¹⁰ Yeesso ꞌdeerka wihi us icho iyidah, “Roorro akhabina! Nyaama ꞌdooꞌdi irummeeste wihi atin itadeehiin, ‘Gaalilaaya irda, intaas ka ꞌdee a iagartaan.’ ”

Iskare wihi yitah kuhaaniyyo icheekta

¹¹ Oboorri ꞌdulaayi, iskarti kootte hawwaal yaakhisso ilkerengeet goya iratte, kuhaaniyyohi wewween wihi yitah tuumman icheekte.

¹² Kuhaaniyyohi wewween ichoow ewweenki Yaꞌhuud ba tossateene, iskar chasteene, chilimmeti buure siicheen.

¹³ Wihi icho iyidaaheen, “ꞌDooꞌd mehe itadeehiin ya, ‘Abatti Yeesso ibeen uꞌdurraayi timiyye sartiis hatte!’

¹⁴ Chirri gaafana waha daage la, uus ꞌdee sina atin kawaarinne, nahe yeed tuumman haagginna, atin ribna.”

¹⁵ Iskare ꞌdeerka chilimme khaatte, wihi kootte yeela liiyidah yeesse. Yeedaas beenaate sartiisti lahate miinsan la ichoow uliba laka, yaafohi Yaꞌhuud goyaka a sohta.

Yeesso abattitiis isoobaha

¹⁶ Abattiti tomon ichoow koowe iratte hali goorat Yeesso boroofenhi Gaalilaaya ka idowdowe iratte.

¹⁷ Chirri icho usu argeen ka, usu wahteene, iꞌdaasenyi gaasichokoo usu kamalaleen.

¹⁸ Yeesso la icho iyimiyye wihi us iyidah, “Serey ichoow harra ka anto tuumman a liisiiche.

¹⁹ Maantaka nyaama ꞌdooꞌdi harra tuumman abattiteey kayeela. Magah Aabba ka ichoow ki Weel ka ichoow ki Rubeyti Munyee ka baattissiya.

²⁰ Toro la amuri tuummane an atin ibahche abcha a raaheen. Rumanka la an a atin leejira ichoowka ibeenki ꞌdaꞌddaboot yateeh.”