Mattaayo 26 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jaldaabe saggi iche Yeesso itagiis yowatta

¹ Inkoo Yeesso yeedaas tuummane saggi us isoonokhti miinsan massiche ka, abattitiis mehe iyidah ya,

² “Saggi atin igarattaan u, ibeen lamma on ankhane ꞌdee daawti Baasakka lagela, Ínam Aadam la ladiiba massalaaba lakakaaha.”

³ Maanassaas on kuhaaniyyohi wewween ichoow ewweenki Yaꞌhuud ba uranti kuhaanihi weyti weene magahiis Kayaafa layadeeh ka kulmeen.

⁴ Icho la saggi icho ekkeysi ka Yeesso ikhabtaane ꞌdee iyagiisiin, iche rerreegaan.

⁵ Wihi icho isiyidaaheen, “Iꞌdaasenyi uus inno daawta goyaka khaban, enenyet a geeddi us hol ka il baabiicho.”

Yeesso ilkerengeetti Beꞌdaaniya ka lasubha

⁶ Yeesso ilkerengeetti Beꞌdaaniya ka minki etoo Siimonhi Ki Buꞌda Khabe layadeeh kijiraayi,

⁷ makhaabassoo kurunkoo daakki alabaasta lakahaaggiche miricchihoo weyti gato miige kijiro leetimiyye, Yeessohi komborti ballaaddane lakagolossati ka dikkil kajiifo golossati matakkiis kakhubte.

⁸ Abatti chiꞌiche waha agarte ka weyti hollowte, “Miricchiha a iꞌdoh immarah labaabiicho?” worsatte.

⁹ “Miricchiha kootte chilimmeti buurenye lakoororicha, chilimme la miskiin lasiicha!”

¹⁰ Yeesso la wihi icho essaan a garta, wihi us iyidah, “A iꞌdoh makhaabassa imalalissaan? Wihi iche iyeesse a haaggi weyti buure.

¹¹ Miskiin kol dakkhan goytiinna kakhabtaane, iꞌdaasenyi ani kol dakkhan ma ikhabtaan.

¹² Miricchiha iche sarteey kakhubte ka, ani hawwaal itannabissa.

¹³ Rume atin icheeka, meelbaaw Wora Haaggan harra tuumman ka lacheeko ka, wihi iche yeesse laka a lacheeka, iche la lakasooꞌhela.”

Yuuda Yeessohi us ꞌdub soogoocho ka ayye khaatta

¹⁴ Yomboka abatti Yeessoti tomon ichoow lammee kichekoo, ki Yuuda Iskaariyoot layadeeh, kuhaaniyyohi wewween iirte,

¹⁵ wihi us worsate, “Chirri an Yeesso dahantiin soogesse, mehe isiissaan?” Iche la chilimmeti lahaageete tomon seyyahe iekkaasse.

¹⁶ Uus chirraas, Yuuda inti leemujjumenye us Yeesso dahanohicho kagesso yowte.

Yeesso gololi daawti Baasakka abattitiis leeyaham

¹⁷ Ibeenki oraate Daawti Makaateti Liikhasin, abatti Yeesso itimiyye wihi iche worsatte, “Intoh ꞌdoonta iranna katannabanna, ꞌdee gololi daawti Baasakka kataham?”

¹⁸ Wihi us ilaabe, “Nyaama, ilkerengeet gela, etoo iirda wihi atin itadeehiin, ‘Eti Ween mehe essa ya, ibeenki ani liigooche a soodowwaate. Abattiteey khabaayi, minkaahha daawti Baasakka kagella.’ ”

¹⁹ Abatti ꞌdeerka iꞌdi kootte Yeesso iyidah on yeesse, gololi daawti Baasakka haaggisse.

²⁰ Chirri il gelebnowe ka, Yeesso ichoow abattitiisti tomon ichoow lammee komborti ballaaddane lakagolossati ka dikkille kajiifaan.

²¹ Golossataani, Yeesso wihi us yidah, “Rume atin icheeka, etiinkoo ꞌdub igoocha.”

²² Icho tuumman fool ribowe, kooba ki addan ꞌdubiis ka, “Kamur rumanka ani mee menya?” yidah.

²³ Yeesso wihi us ilaabe, “Eti toolla karam dahan ikaleelugꞌde, iche ꞌdub igoocha.

²⁴ Ínam Aadam iꞌdi usu miinsane lachiiruu, a yamuut. Iꞌdaasenyi eti Ínam Aadam ꞌdub goocho, sinati sugto eenna a buure! Usuhi goorat idelanne deefta.”

²⁵ Yuudahi ꞌdee Yeessó ꞌdub soogoocho la, “Eti ween, rumanka ani mee menya?” iyidah. Yeesso wihi us ilaabe, “Aa a ati.”

Gololi Kamur

²⁶ Golossataani Yeesso makaate khaate Waakh kalaꞌd ilaabe, jejjebche abattitiis ididdiibe, wihi us yidah, “Khaata, amha waha a sartaayaa.”

²⁷ Toro kokkoob khaate, Waakh kalaꞌd ilaabe, abatti idiibe, wihi us yidah, “Atin tuumman isleeanguunda.

²⁸ Waha a diiggeeyki ayyinti husube Waakh enenyet igoocho, a diiggi iroonoti enenyeti buure liikhubo, ꞌdee uskeelicho liikakuto.

²⁹ Wihi an atin icheeko, uus toolla kakhabatti, an farsoti sabiib toro ma damo, ichoowka ibeenkaas an wihi husub goob Aabbaheey ka atin leedamo yateeh.”

³⁰ Inkoo icho geeyoo Waakh dowteen ka, Hali Geeyohi Oolif ibaheen.

Yeesso Beeterohi sooꞌdiiꞌdo orey on cheeka

³¹ Yeesso wihi us abatti iyidah, “Ibeenka goya rubeytiis, atin tuumman jeenteti wihi liiyeeluu, a ikafiriddaan, a mehe wihi chiiran, “ ‘An ersime guꞌdda, woyhi iiyyaat la seley baaba.’

³² Iꞌdaasenyi inkoo an omoot kasookahe, boroofenhi Gaalilaaya ortiin a irda.”

³³ Beetero wihi us ilaabe, “Chirri iche tuumman jeenteti wihi lakiyeeluu kaafiridde laka, an jirtuu ma kaafirdo.”

³⁴ Yeesso wihi us ilaabe, “Rume kisoocheeka, ibeenka goya rubeytiis, geeddi lukki iriirin at kol seyyahe ma igaratti tadeeh.”

³⁵ Iꞌdaasenyi Beetero wihi us yidah, “Chaꞌan kileeamuut laka, jirtuu ma kigardi ma adeeh!” Abattiti addan tuumman laka iꞌdaas tidah.

Yeesso meessoo Gesseemane layadeeh ka Waakh wahta

³⁶ Yeesso ꞌdeerka abattitiis khabaayi, meessi Gesseemane layadeeh irte, wihi us icho iyidah, “Inta orronda, geeddi an intuus irdi Waakh wahdi.”

³⁷ Beetero ichoow yeele Sebedaayoti lammee khaatte. Yeesso weyti bolkhe toro mali uskul gele.

³⁸ ꞌDeerka wihi us seyyahche iyidah, “Huleesi rubeyteey kijiro, huleesi omooteet laka a ikeena. Inta fiddiya, ileetoorribda la.”

³⁹ Iꞌdaaru orey isohte, il isiꞌdiiche, fool harra kaꞌdaare, Waakh wahte wihi us yidah, “Aabbahaaw, chiꞌiche tateeh kokkooba sinayyoot a liikakhaato! Iꞌdaasenyi in an ꞌdoono menye, in at ꞌdoonto on a titaahe.”

⁴⁰ ꞌDeerka abattitiis inokhte, ichehi uꞌdurto ꞌhele, Beetero leeyeede, “Atin geeddi sahaꞌddoo kalday laka ma ileetoorribattaan a?” iyidah.

⁴¹ “Toorribda Waakh wahda, ꞌdee kajmeti uskeel atin kaluguꞌddo akidihina. Rubeyohiin wihi mujjumenye ꞌdoonaane, iꞌdaasenyi sartiinna ꞌdabakhe.”

⁴² Toro koli lammaatteet nokhte, irte Waakh wahte, “Aabbahaaw, kokkooba sinayyoot chirri sammata an idamin liikakhaatin, in at ꞌdoonto on a titaahe,” yidah.

⁴³ Chuꞌus soonokhti, ichehi uꞌdurto, indo hulees kore toro ꞌhele.

⁴⁴ Toro koli seyyahnaatteet katabe, irte Waakh wahte. Wihi kootte us yidah on inokhte yidah.

⁴⁵ ꞌDeerka abatti inokhte wihi us iyidah, “Atin uliba a uꞌdurtaane nassaan? Yeya, sahaꞌddi Ínam Aadam ꞌdub lagoocho, dahanohi ꞌdooꞌdi uskeel leh lagesso a soodowwaatte.

⁴⁶ Sookaha a iranni! Eti ꞌdub igoocho kalla soosohtaa!”

Urur Yeesso khabta

⁴⁷ Yeesso yeyyeedaayi, Yuudahi ullaka abattiti tomon ichoow lammee kichekoowe yimiy. ꞌDooꞌdi sooraahe, a ururoo buurenye birlabbe ichoow khokkhoomme khabo, kuhaaniyyohi wewween ichoow ewweenki Yaꞌhuud sooergate.

⁴⁸ Eta Yeesso ꞌdub goocho la mehe urur iskakhabeen ya, “Eti ꞌdee an dongade, a usu, khabda.”

⁴⁹ Yuuda chirraas on Yeesso iirte, bariitiche, “Eti weenoow!” iyidahye dongate.

⁵⁰ Yeesso wihi us ilaabe, “Aalaaw, wihi at itimiy yeel.” ꞌDooꞌd la orey isookute, Yeesso khabte hide.

⁵¹ Geeddaas on ka, etoo ullaka wahal Yeessee, birlabiis sootogte, sooꞌhiire falfati kuhaanihi weyti ween guꞌdde, nabah ngꞌure.

⁵² Yeesso la wihi us iyidah, “Birlabaah min ilaab, iꞌdi tahe eti tuummane birlab ka enenyet yagiis, ullaka birlabe lakayagiis.

⁵³ At saggi chirri an Aabbaheey gargaar idaahe, us herti Waakhe aliffe goosso koloo kalday isooergo ma garatti?

⁵⁴ Iꞌdaasenyi chirri an iꞌdaas yeele, saggoh ꞌdee wihi Chiirnaanneti Waakh kachiirane sooyateeh liibuuhicha?”

⁵⁵ Yeesso chirraakka wihi us urur iyidah, “Chaꞌatin khokkhoomme ichoow birlabbe leetimaateene ikhabattaan, an a etoo enenyet walah saro? Maan tuumman ani uranti minki Waakhe buure a fiddiye Yeedi Waakh atin abche, atin la ma ikhaban.

⁵⁶ Iꞌdaasenyi wahanyeyyoha a yitaaheene ꞌdee wihi ꞌdooꞌdi Waákh íyeyyeedo chiire labuuhicha.” ꞌDeerka abatti tuumman usu katabte firidde.

Jaldaabe Yeesso hukkunta

⁵⁷ ꞌDooꞌdi Yeesso khabte Yeesso khaate min Kayaafahi kuhaanihi weyti weene geeche. Tagaammeti amurre ichoow ewweenki Yaꞌhuud la intaase kakulme.

⁵⁸ Iꞌdaasenyi Beetero fogaka Yeesso ꞌdubiis sooraahe, ichoowka uranti kuhaanihi weyti ween goya gele. Uus uram goya gele ka, irte, iskarti meel yaakhisso leeorronte, wihi Yeesso layeelo suge.

⁵⁹ Kuhaaniyyohi wewween ichoow Jaldaabti Weene Yaꞌhuud tuumman, garti beenaate iche yeeddo, ꞌdee icho Yeesso omoot ikagoochaan, yowteen.

⁶⁰ Iꞌdaasenyi walah icho ꞌheleen mele, chiꞌ ꞌdooꞌdi ittaawenye garti beenaat cheeko soobahe laka. ꞌDaꞌddaboka ꞌdooꞌdoo lammee sookahe,

⁶¹ wihi icho yidaaheen, “Reenka mehe yidah ya, ‘An minki Waakhe buurenye an jejjebcho, toro maan seyyah goyaka diso a abuuꞌd.’ ”

⁶² Chirraakka kuhaanihi weyti ween kahe, wihi us Yeesso iyidah, “Walah at soolaabto mele? Yeeda enenyet kaacheekti, mehe jira?”

⁶³ Iꞌdaasenyi Yeesso gammadiche. Kuhaanihi weyti ween la wihi us iyidah, “Magahi Waakkhi jiro ka daato, usu at Ki Lasubhe toro Weeli Waakh tahe, nah isoocheek”

⁶⁴ Yeesso wihi us ilaabe, “Aa! A iꞌdaas maanta at tidah on. Iꞌdaasenyi wihi an atin tuumman atin iadeeh, ꞌdee berri Ínam Aadam usuhi Waakkhi Miig Leh anki dahantiisti miigeet fiddiyo toro mirsohi saraat fuulaayi yamiit a agartaan.”

⁶⁵ ꞌDeerka kuhaanihi weyti ween hol on ka gaaddiis kharradiche wihi us yidah, “Wihi us yidah ka a gafe! A iꞌdoh ꞌdooꞌdoo addane gar laabo iyowanna? Yeya, toolla saggi us igafe a daagteen.

⁶⁶ Mehe goosseen?” enenyet worsate. Wihi icho ilaabeen, “Omoote imasse.”

⁶⁷ ꞌDeerka Yeesso fool hanjuf katufeene, khomhoyyo ka guꞌddeen. Gaasoo fodoorre jahte,

⁶⁸ “Ki Lasubheey, Waakh iyeyyeed. Ayyo kiguꞌdde?” idoween.

Beetero Yeesso ma garti yadeeh

⁶⁹ Beetero la geeddaka uram goya fiddiya. Inantoo falfee la itimiyye, wihi iche itidah, “At laka Yeessohi boroofenhi Gaalilaaya a leejirte.”

⁷⁰ Iꞌdaasenyi ꞌdooꞌd tuumman ortiis ka ꞌdiiꞌde, “An wihi at elatti ma gardi,” iyidah.

⁷¹ Chirraakka bahe aritti uram lakagelo irte. Inantoo addan agarte, ꞌdooꞌdi intaas kajiro wihi iche itidah, “Reenka Yeessohi Naasaret a leejire.”

⁷² Ulla toro ꞌdiiꞌde, daatte, “An et ma gardi!” yidah.

⁷³ Inkoo geeddoor lafiddiye ka ꞌdooꞌdoo intaas toollo Beetero iirte, wihi us iyidah, “Rumanka at a kichekoo. A mehe saggi at iyeyyeeddo a tussa.”

⁷⁴ ꞌDeerka Beetero isabaare, Waakh dowe, wihi us yidah, “An et ma gardi!” Chirraas on lukki riire.

⁷⁵ ꞌDeerka Beetero yeedi Yeesso iyidah kasooꞌhele. “Geeddi lukki iriirin, at kol seyyah, ‘Ma kigardi!’ tadeeh.” Ulla khar ibahe, bolokh ka ooye.