Mattaayo 24 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wihi berri sooyateeh, minki Waakhe buurenye laajjebcha

¹ Yeesso minki Waakhe buure kabahe, orey isohtaayi, abattitiis minassi minki Waakhe buure kaaddagsan tusse.

² Ulla wihi us iyidah, “Wahanyeyyoha tuumman yeya! Rume atin icheeka, berri daddaabtoo kaldaye ti addan fuusso lakatabo mele, icho tuumman a lasookhuba.”

Wihi berri sooyateeh, ꞌdooꞌd Yeesso sina latusa

³ Geedda Yeesso Hali Geeyohi Oolif ka fiddiyo, abattitiis dagsi ka itimiyye wihi iche itidah “Waha maantoh yateehiin? Toro la mehe yateehe emeettaah ichoow ibeenki ꞌdaꞌddaboot tusa?”

⁴ Yeesso wihi us ilaabe, “Yuubsada, uus etoo kalday laka atin ekkeysan!

⁵ A mehe ꞌdooꞌdi ittaawenye ani iskaayyeelo yamiite, ‘Ani a Ki Lasubhe,’ essi, a agartaane, ꞌdooꞌdi ittaawenye ekkeestaan la.

⁶ Yaafohi isdiho ichoow worassi ibuuhine dihoyyoot a daagtaan, iꞌdaasenyi taba iicho atin kanahin. Wahanyeyyoha a sooyateehiine, iꞌdaasenyi ibeenki yomboot uliba a ankhanyahe on.

⁷ Sirgaalle a isdihta, karnato laka isdihaane, ilassi ittaawe ka nabhayye tamiite, harra laka sesseehta.

⁸ Wahaas tuumman a chiis birriissa on.

⁹ “Maantaas a atin ladiiba, ꞌdee sina atin loomhicha, toro atin layagiis. ꞌDooꞌdi harra tuumman la a atin ꞌdiiꞌda jeenteti atin abattiteey itahiin u.

¹⁰ Maantaas ꞌdooꞌdi buure kakhuufnaanki icho ani ikakhuufaan a kanokhta, dahanohi chiiyeet isgessa, toro la isꞌdiiꞌdaan.

¹¹ ꞌDooꞌdi ittaawenye ꞌdooꞌdi Waákh íyeyyeedo iskaayyeelo a buuraata, ꞌdooꞌdi ittaawe ekkeesta.

¹² Toro la jeenteti hugunꞌdarri ibuuraattuu, ꞌdooꞌdi ittaawe ꞌdooninti us Waakh ꞌdoono a nuglaatta.

¹³ Iꞌdaasenyi eti garrahsate ichoowka sinata ꞌdubiche eleele a lariba.

¹⁴ Wora Haaggane dakhi Waakh miinsan la harra tuumman ka a lacheeka, garti ꞌdooꞌdi harra tuumman yateehe, ꞌdee ꞌdeerka ibeenki yomboot yateeh.

Wihi berri sooyateeh, iyookkoti laꞌdiiꞌdo minki Waakhe buure lagessa

¹⁵ “ꞌDeerka maanti atin iyookkoti ‘weyti biꞌdirenye, ꞌdooꞌd keehisso,’ meessi lagan katolosso Daaniyelhi goorat Waákh íyeyyeedo cheeke agarteen,

¹⁶ ꞌdeerka ꞌdooꞌdi ili Yaꞌhuudiya fiddiyo tuumman halal a ifirdo. Atihi yeeda soonto yeeda a kigelo.

¹⁷ Eti minkiis sartiis fuulo uus min geline wohoo rucchul laka khaatin.

¹⁸ Eti gos goya kijiro, uus nokhanne kabuuꞌdiis sookhaatan.

¹⁹ Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure.

²⁰ Waakh waho uus maantaas lafirdo maanti il weyti roffo yahe hir ꞌdeyo ommos Seeri Lanaso eheynan.

²¹ A mehe sinati buurenye maantaas jirto, ti geeddaase uus uumacchoti harra ka ma laargine ichoow uliba. Toro wihi iꞌdicheenye lasooargo ba ma jiraan, jirtuu tuumman.

²² “Chiꞌ ibeennetaas liigaabin, etoo kalday laka ma sooꞌhado. Iꞌdaasenyi iroonoti ꞌdooꞌdiiski us soobahsatuu, ibeennetaas a lagaabicha.

²³ Maantaas chiꞌ etoo, ‘Yeya, Ki Lasubhe kalla,’ ommos, ‘Kuulla!’ kiyidah, arummeysan.

²⁴ A mehe ꞌdooꞌdoo Ki Lasubhe iskaayyeelo ichoow ꞌdooꞌdi ꞌdooꞌdi Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, ꞌdee chiꞌiche tateeh ꞌdooꞌdi Waakh soobahsate laka ekkeestaan.

²⁵ Yeya, geeddi il ankhayyahe waha a atin isoocheekee.

²⁶ “ꞌDeerka chirri ꞌdooꞌdoo, ‘Kaaleya Ki Lasubhe kuulla hidaad kajiraa,’ atin iidah iiranna, ommos chiꞌicho, ‘Inta yeya, usu kalla min goyaka meelassi goyaatteet kijira,’ atin iyidaaheen arummeysanna.

²⁷ Iꞌdi tahe saggi ankhadhi beri kaankhado bahay ka liiarguu, Ínam Aadam laka emeettiis iꞌdaase tateeh.

²⁸ Inti golfof jiifo, intaase raꞌd kawara.

Wihi berri maanti Ínam Aadam soonokhti yateeh

²⁹ “Uus sinayyohi maanassaas kutaan, “ ‘Orrahe a daayatta, yeyyah la banayhiis ma soobahcho, yiyyihimo serey a kasookhubtaane, miigti saraat la lakorkokicha.’

³⁰ “Maantaas wihi emeetti Ínam Aadam tuso serey ka a soobahaane, yaafohi harra tuumman la ooyaan. Ínam Aadam usuhi mirsohi saraat fuulo miig ichoow weynaanti buure khabaayi yamiit argaan.

³¹ Ulla Herti Waakhe arabi fallee afuufto harra ierga, iche la ꞌdooꞌdi Waakh soobahsate harra ꞌdollohiche affarcho ichoow sereyta daayan ꞌdollohiche tuumman kasoobaayissa.

Wihi berri sooyateeh, runti geeyi fiig lakaabti

³² “Taba geeyi fiig yeeda kaabda. Uuꞌ liikhimohiis ulhawtaane seeb bahchaan, saggi ꞌdaato isoodowwaatte a garattaan.

³³ Saggaas on u maanti atin wahanyeyyoha tuummane ibeenki ꞌdaꞌddaboot tuso agarteen, saggi soonokhantiis isoodowwaatte kola ititah a garattaan!

³⁴ Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin.

³⁵ Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.

Wihi berri sooyateeh, et maan ichoow chirri us soonokhti garti mele

³⁶ “Aabbaheey on menye, et maantaas ommos sahaꞌddaas garti mele. Herti Waakhe goobi Waakh fiddiito ommos Ínam Aadam laka ma gartaan.

³⁷ Iꞌdi goorat ibeenne Noowa eheet, iche ibeenki Ínam Aadam yamiit laka yateeh.

³⁸ Iꞌdi tahe geeddi goorat ꞌduley harra ikhaatin, enenyet iꞌdi orrankateet u a golossate one, minan laka laaddiste ichoowka Noowa koobanhi buure goya gele.

³⁹ Wihi sooyateeh ma abanne ichoowka icho tuumman ꞌduley khaate. Emeet Ínam Aadam ka laka iꞌdaas on tateeh.

⁴⁰ Et lamma gose kijirta, koo lakhaata ki addan la lakataba.

⁴¹ Deyyehotoo lammeenye golol isleetunto, too lakhaata ti addan la lakataba.

⁴² “Maantaka toorribda, a mehe ibeenki Kamuriin yamiit ma garattaanee.

⁴³ Iꞌdaasenyi waha abda. Chirri ooyohi min leh sahaꞌddi ibeen eti hatto leh yamiit garti, ma urꞌdo miinkiis ma ꞌdiicho ma lajebcho.

⁴⁴ ꞌDeerka atin laka toorribda giꞌde iꞌdi tahe Ínam Aadam sahaꞌddi liikamurine yamiite.

Wihi berri sooyateeh, falfati lakakhuufo a ti hiliche mujjum haaggisso

⁴⁵ “Kamalda bal, ilbooyi lakakhuufo toro kharee a ayyo? A ki kamuriis goobiis iweynaache, toro la geeddi mujjume ka ilbooyye kamuriis gololicho.

⁴⁶ Ilbooyi liimaalo a ki kamuriis usuhi hiliis mujjum haaggicho sooeleelo.

⁴⁷ Rume atin icheeka, kamuriis wihi us khabo tuummane dahantiis gessa, iweynaacha.

⁴⁸ Iꞌdaasenyi eemba ilbooya a suuje, ‘Kamureey geeddi deere foga kijira,’ isiyidahye,

⁴⁹ ꞌdeerka ilbooyyeti wahalhiise sina kawaariyye, meleefuyyo leegolossayye, toro la farso leeyubhub.

⁵⁰ Kamuri ilbooyaas, maanti us ikamurine soonokhta toro sahaꞌddi us igaranne soonokhta.

⁵¹ Usu seleye goggoocha, toro ꞌdooꞌdi iskaayyeelo goya gata. Intaas ka ooya, bolokh ka ilko iskaroba.”