Mattaayo 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Makhaaballetoo bakkaalle yeyto Yeesso yowatta

¹ Yeesso ilkerengeetti Beꞌdeleheeme boroofenhi Yaꞌhuudiya kijirto iche lakadele. Maantaas la, ꞌHeroode karnati ilaase. Inkoo Yeesso desse, makhaaballetoo bakkaalle walah kaabatti iloo beri katimiyye, ilkerengeetti weene Yeerusaleem timiy.

² Iche la wihi iche worsatte, “Weeli desse karnati Yaꞌhuud yateeh mee? Iꞌdi tahe bakkaali delmaattiis tuso usuhi beri kasookore a agarre, nah la usu nimiyye wahannaa.”

³ Karnati ꞌHerood layadeeh uus yeedaas daage, weyti mal gele, ꞌdooꞌdi ilkerengeetti weene Yeerusaleem kijiro tuumman laka mal gele.

⁴ Inkoo us kuhaaniyyohi wewween ichoow tagaammeti amurre tuumman tol iwahe ka, inti Ki Lasubhe lakadelo worsate.

⁵ Icho la wihi icho ilaabeen, “Ilkerengeetti Beꞌdeleheeme boroofenhi Yaꞌhuudiya kijirto iche lakadela. Iꞌdi tahe waha a wihi goorat etoo Waákh íyeyyeedo chiire.

⁶ “‘Iꞌdaasenyi atihi ilkerengeetti Beꞌdeleheemenye boroofenhi Yuuda kijirto, ilkerengeetohi addane Yuuda ma karucchul. A mehe berri karnat intane lakadela, ki ꞌdooꞌdeeyki Issiraayel yaakhicho.’”

⁷ ꞌHerood ꞌdeerka makhaaballeti bakkaalle yeyto dagsi ka wahe, ibeenki bakkaal soobahe kaabte.

⁸ Ilkerengeetti Beꞌdeleheem ierge, toro la wihi us iyidah, “Nyaama, weel mujjum soohiisda. Maanti atin ꞌhesseen, amiita ani laka isoocheeka, ꞌdee an laka a irdi a wahdi.”

⁹ Inkoo icho yeedi karnat daageen ka, jit khabteene, bakkaali kootte beri kasokoore icho sooraaheen la orcho raahe, ichoowka meessi weel kijiro sartiis ka tolossate.

¹⁰ Chirri icho toro bakkaal argeen ka weyti hamaadeen.

¹¹ Chirri icho min geleen ka, weel ichoow Maariyati abartiise argeene, jilbo il kaguꞌddeene weel wahteen. Urgohicho fureene, gaalkahsihi weyti gato miigenye icho sookhaateen soobahcheene, siicheen. Gaalkahsiha la a ꞌdahab ichoow halalle ichoow miricchinye.

¹² Inkoo Waakh issillo ka tootooche, ꞌHerood iinokhanna iyidah ka, jitoo addan tabeene, ilicho inokhteen.

Yuussuf Maariya ichoow Yeesso khaata ili Miissiri ifirda

¹³ Inkoo makhaaballeti bakkaalle yeyto nokhatte ka, hertoo Kamur Yuussuf issillo ka isoobahte. Wihi iche itidah, “Kahe weel ichoow abartiis ba khaate ili Miissiri ifirid. Intaas fiddiye ichoowka ani a kisoocheeko. A mehe ꞌHerood dowwanoha weel ogoose yowtaa.”

¹⁴ Yuussuf ꞌdeerka ibeen on kahe, weel ichoow abartiis ba leefirde ili Miissiri leemiinsate.

¹⁵ Intaas on fiddiyeene ichoowka ꞌHeroodhi karnate yumuy. ꞌDeerka wihi goorat Kamur etoo Waákh íyeyyeedo ka cheeke labuuhiche, “Weeleey ili Miissiri kasoowahe.”

Ilkerengeetti Beꞌdeleheem ka nyaakhuti lallab labakkicha

¹⁶ Inkoo ꞌHerood saggi makhaaballeti bakkaalle yeyto iekkeysatte kase ka, weyti hollowe. Amur bahche nyaakhuti lallabe guꞌh lamma khabo ichoow ki guꞌh lamma ieleelinne, ilkerengeetti Beꞌdeleheem ichoow ilkerengeetohi isoodow kajiro tuumman a labakkicho yidah. Guꞌhassa lammee ichoow maanti makhaaballeti bakkaalle yeyto karnat icheekte a israahaan.

¹⁷ ꞌDeerka wihi eti Waákh íyeyyeedo Yeeremiya layadeeh ka lacheeke labuuhiche,

¹⁸ “Hooyoo ilkerengeetti Raamah ka a ladaage. Hooyi etoo ooyo, weyti uuwwicho. Raaccheel nyaakhuticheeda ooyta, ichehi uur lakhoboocho ꞌdiiꞌdda. Iꞌdi tahe icho tuumman kola a tuumeen.”

Yuussuf ichoow Maariya ichoow Yeesso ili Miissiri kasoonokhtaan

¹⁹ Inkoo ꞌHerood yumuy ka, hertoo Kamur ili Miissiri ka Yuussuf issillo goyaka isoobahte,

²⁰ wihi iche itidah, “Kahe, weel ichoow abartiis ba khaate, ili Issiraayel inokho. Iꞌdi tahe ꞌdooꞌdi goorat weel ogoos yowti, a tuume.”

²¹ Yuussuf ꞌdeerka kahe, weel ichoow abartiis ba khaate, ili Issiraayel inokhte.

²² Iꞌdaasenyi Yuussuf chirri us saggi inam ꞌHeroodhi Arkeelawus layadeeh boroofenhi Yaꞌhuudiya ka karnat iyitahye meel aabbahiis igele daage ka, intaas iran karoore. Yuussuf issillo ka latootooche, ꞌdeerka boroofenhi Gaalilaaya irte,

²³ ilkerengeettoo Naasaret layadeeh furte. Iꞌdaas ka wihi goorat ꞌdooꞌdi Waákh íyeyyeedo ka lacheeke labuuhiche, “Usu berri eti Naasarete layadeeh.”