Mattaayo 19 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso wori mindischoti seley labaho ꞌdooꞌd abcha

¹ Inkoo Yeesso yeedaas massiche ka, boroofenhi Gaalilaaya kakahe, anki beri ili Yaꞌhuude hawti Yoordane ꞌdusso ꞌdirihiise irte.

² Ururoo buure la raahe, ulla intaas ka ꞌdooꞌdi khakkhannan samaache.

³ Farissaayotoo la timiy, Yeesso angey gelin ꞌdoontaa. Wihi iche worsatte, “Eti makhaabassiis walahbaaw us ꞌdoono ka tuum riho ichoow amurreteen a israahaan?”

⁴ Yeesso wihi us ilaabe, “Atin saggi uumaccho ka Waakkhi walah tuumman soouume ‘labo ichoow deyyeho isoouume’ ma soomin a?

⁵ Wihi chiiran, ‘Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine, lammacho ba sartoo kalday yateehiin.’

⁶ ꞌDeerka kola et lamma menye, a sartoo kalday. Maantaka wihi Waakh isikeene uus weeli enenyet seley bihin.”

⁷ Iche la wihi iche worsatte, “A iꞌdoh Muusa amurreti us inno siiche ka, ‘Eti makhaabassiis tuum riho khadaabi saggi us iriho tuso a siicho,’ iyidah?”

⁸ Yeesso wihi us ilaabe, “Jeenteti matahmiigtiinna Muusa amuri atin oboorrihiin tuum karihtaan atin isiiche. Iꞌdaasenyi uumaccho ka iꞌda ma eheynan.

⁹ Wihi an atin icheeko, eti tuummane makhaabassiis tuum rihe makhaabassoo addan diste, chiꞌiche mejeloo addan leeuꞌdurte on menye, makhaabalaas uskeeli us makhaabassi tiis ieheynan leeurꞌdo, iche gele.”

¹⁰ Abatti wihi iche Yeesso itidah, “Chirri makhaabal jeenteti makhaabassiis etoo addan ileeuꞌdurto kalday on seley ibahaan, eti min idisan gon deefa.”

¹¹ Yeesso wihi us ilaabe, “Eti Waakh gargaaro on menye, enenyet tuumman mee yeeda raaho.

¹² Iꞌdi tahe ꞌdooꞌdoo usuhi sangꞌeenye ladele, gaasoo laka enenyete sangꞌa kayeele, gaasoo laka wihi icho minan kadisawwaayaan, a jeenteti icho dakhi goobi Waakh igelaane icho wihi Waakh ꞌdoono iyeelaan. Eti yeeda khaannaan yabuuꞌd a khaatti.”

Yeesso nyaakhuti rurrucchul iweesta

¹³ ꞌDeerka nyaakhuti rurrucchul Yeesso liikeene, ꞌdee ulla dahano korcha iweesta. Iꞌdaasenyi abatti ꞌdooꞌdi nyaakhut sookhaate leejaakhte.

¹⁴ Yeesso la wihi us abatti iyidah, “Nyaakhuti rurrucchul ajeyinna ꞌdiicha ani a iyimaatee, a mehe dakhi goobi Waakh a ki ꞌdooꞌdi iꞌdee.”

¹⁵ Inkoo us dahanohiis korche iweeste ka, intaas katabe.

Eti nugule kamure ichoow dakhi Waakh

¹⁶ Etoo Yeesso iyimiyye wihi us worsate, “Eti ween mehe haaggane yeela ꞌdee jiroti jirtuu imassan ꞌhela?”

¹⁷ Yeesso wihi us ilaabe, “A iꞌdoh wihi haaggan iworsatta? Waakh kalday on haaggan. Chirri at jiro ꞌhelin ꞌdoonto, amurreti Waakh raah.”

¹⁸ Ulla, “Amurretoh?” worsate. Yeesso wihi us ilaabe, “ ‘Weeli enenyet dubunuunu iigaasan, makhaabali kaah ieheynan ommos makhaabassi taah ieheynan aleeurꞌdin, hatto iiran, garti beenaat ayeedin,

¹⁹ aabbahaah ichoow abartaah inkaanyit, ollokkaah geeddi at isꞌdoonto ꞌdoon.’ ”

²⁰ Et la wihi us yidah, “Wahaas tuumman koo an iraahin mala. Mehe uliba ikaankhan?”

²¹ Yeesso wihi us ilaabe, “Chaꞌat tuum jiroti el ikhabin jirin ꞌdoonto, nyaame, wihi at khabto tuumman ororiche, chilimme miskiin siiche, ꞌdee kamurroonki goobi Waakh ꞌhele, ꞌdee kaale isooraah.”

²² Etaas nugul chuꞌus waha daage ka, usuhi fool ribowe nokhte, a mehe hoolahi buurenye khabe.

²³ Yeesso ꞌdeerka wihi us abattitiis iyidah, “Rume atin icheeka, weyti ꞌhooltahe chiꞌ eti kamure dakhi goobi Waakh gelo.

²⁴ Toro wihi an atin iadeeh, naffi gaale issi irbi kakhaduutti weyti ꞌhooltahe. Eheet a, ꞌhoossi eti kamurenye dakhi Waakh gelo iche weyti kutta.”

²⁵ Chirri abatti waha daagte ka, weyti girmeysatte, “Ayyo ꞌdeerka lariba?” worsatte.

²⁶ Yeesso icho yeye, wihi us iyidah, “Weeli enenyet ka waha a wihi koloo kalday laka iitaahan. Iꞌdaasenyi Waakh ka walah tuumman a geeddi icho yateehiin.”

²⁷ Beetero wihi us ilaabe, “Nah weheenyo tuumman a kasootabne ꞌdee ati kiraahna. Waakh berri mehe nah siicha?”

²⁸ Yeesso la wihi us icho iyidah, “Rume atin icheeka, maanti Waakh walah tuumman husubnaacho, Ínam Aadam kombortiisti antoote ababto koorronti, atinhi isooraahteen laka komborohi antoote tomon ichoow lammeenye koorrommattaane, yaafoheenki Issiraayele tomon ichoow lammee anattaan.

²⁹ Eti tuummane minan ommos walaalinyetiis ommos albehi leedesse ommos aabbahiis ommos abartiis ommos nyaakhutiis ommos gosiis jeenteti us abattiteey iyahuu kasootabe la, kol kude wahaas us kasootabe ꞌdirihiis ꞌhela, toro la jiroti jirtuu imassan laka a ꞌhela.

³⁰ Iꞌdaasenyi ꞌdooꞌdi ittaawenye oraate ki ꞌduboot yateehe, ki ꞌduboot la ki oraat yateeh.”