Mattaayo 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Farissaayo ichoow Sadukaayo girmohoo walah lakaabti maranta

¹ Farissaayotoo ichoow Sadukaayotoo Yeesso itimiy usu angey gelin ꞌdoontaa. ꞌDeerka wohoo goobi Waakh kayimiyye miigti Waakh tuso daahte.

² Yeesso wihi us ilaabe, “Chirra il gelebnowo, sereye la guꞌduuꞌdantahe, ‘Saahta hir ma ꞌdeyo,’ tadeehiin.

³ Chirdeer la, chirri sereye guꞌduuꞌdantahe toro il sooankubsame, ‘Hiri hafari buure khabo a sooꞌdeya,’ tadeehiin! Atin serey a yeytaane, wihi ꞌdeeka sooyateeh kaabattaan. Iꞌdaasenyi saggi weyꞌda il ijiro a yeytaane toro la walah atin kaabattaan mele.

⁴ ꞌDooꞌdi iꞌdeenye uskeel lehe waakkhassi addan wahti on wohoo miigti Waakh tuso yowta. Iꞌdaasenyi wihi goorat Waakh Yoona ka enenyet tuse on menye, walah addane lasiicho mele.” Yeesso ꞌdeerka icho katabe irte.

Yeesso abattitiis wihi Farissaayo ichoow Sadukaayo ꞌdooꞌd abisso katootoocha

⁵ Inkoo abatti beyti Gaalilaaya aficheki ꞌdiri imaahte ka, saggi iche makaate idabte kasse.

⁶ Yeesso la wihi us iyidah, “Yeedad Farissaayo ichoow yeedad Sadukaayo ki iꞌdi booddati makaate fuurissee yuubsada.”

⁷ Icho la iskaleehawwoocheene wihi icho yidaaheen, “Jeenteti inno makaate isookhaatanne iꞌdaas iessa.”

⁸ Yeesso la wihi iche kahawwoosso a garta, wihi us worsate, “Enenna iꞌdaaru marah on ikakhuuftaanee, a iꞌdoh goytiin ka makaatewaayyo ikayeyyeeddaan?

⁹ Atin uliba walah ma abanna? Atin makaate chanti an mejeli alif chane kagoolliche ma kasooꞌhessaan a? Atin la enjel geeddoh bubbuuhto soolaabteen?

¹⁰ Makaate teebati an mejeli elif affare kagoolliche la? Enjel geeddoh buuhto soolaabteen?

¹¹ A iꞌdoh saggi an wori golol atin ikaleeyyeedin iabanna? Iꞌdaasenyi isyaakhicha yeedad Farissaayo ichoow yeedad Sadukaayo ki iꞌdi booddati makaate fuurissee yuubsada.”

¹² ꞌDeerka abatti saggi us wori booddataas ikaayyeedine iꞌdaasenyi us wihi Farissaayo ichoow Sadukaayo ꞌdooꞌd abchaan yuubsada iessi abatte.

Waakh Beetero eti Yeesso yahe ibabbakkaahicha

¹³ Chirri Yeesso ili ilkerengeetti Kaaysareya Fiiliffi yimiy ka, wihi us abattitiis worsate, “ꞌDooꞌd Ínam Aadam a ayyo essa?”

¹⁴ Wihi icho ilaabeen, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka a Yeeremiya ommos ꞌdooꞌdi goorat Waákh íyeyyeedo a kichekoo iche essa.”

¹⁵ “Iꞌdaasenyi atin la? An a ayyo tadeehiin?” worsate.

¹⁶ Siimonhi Beetero layadeeh wihi us ilaabe, “At a Ki Lasubhe, a Weeli Waakkhi jirtuu tuumman jiro.”

¹⁷ Yeesso wihi us ilaabe, “Siimon inam Yoohana, ati Waakh a kimaale. Iꞌdi tahe runtaas at cheekte ti weeli enenyet katimiy menye, iꞌdaasenyi Aabbaheeyki serey jiro iche kisoobabbakkaahiche.

¹⁸ Wihi an kiadeeh la at a Beetero, iꞌdi minki daddaab sartiis lakadisuu, daddaabta sarcheeda urureey tuumman kadisa. Miigti omooteet la ma kahataatto.

¹⁹ Fureyyohi dakhi goobi Waakh a kisiicha. Walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”

²⁰ Yeesso ꞌdeerka abattitiis tootooche, uus iche saggi us Ki Lasubhe iyahe etoo kalday laka icheekine.

Yeesso sinati lakawaaricho ichoow omoottiis cheeka

²¹ Uuꞌ maalinkaas, Yeesso abattitiis saggi Waakh igooche us ilkerengeetti weene Yeerusaleeme iirti, ewweenki Yaꞌhuud ichoow kuhaaniyyohi wewween ichoow tagaammeti amurre dahanohicho ka sinati buure liituso, liiyagiise, ibeenki seyyahnaatteet ka omoot liikasookahcho ibabbakkaahiche.

²² Beetero la Yeesso ꞌdol geeche leejaakhe, “Waakh meesseen bujiiy! Kamur waha koloo kalday laka ma kiyateehiin,” iyidah.

²³ Yeesso la urgiye wihi us Beetero iyidah, “Seytaankaane fooleey buj! At a daakki itarraantarricho, at wahanyeyyohi Waakh menye, iꞌdaasenyi wahanyeyyohi weeli enenyete kamalatta.”

²⁴ Yeesso ꞌdeerka wihi us abattitiis iyidah, “Chiꞌ etoo isooraahin ꞌdoono, awtiis a ꞌdiiꞌdo toro la massalaabatiis barbar a sookorsati a isooraaho.

²⁵ Eti tuummane jirotiis ribin ꞌdoono, jiroti rummaat a waaya. Iꞌdaasenyi eti tuummane jirotiis ani iwaayo, jirotiisti rummaat a ꞌhela.

²⁶ Etoo maanta, a chirri us wohoo ꞌhele, chirri us wihi harrata tuumman ꞌhele, jiroti awtiissa Waakh siiche la waaye? Ommos weeli enenyet maanta mehe diibin yabuuꞌde jirotiis kadooricha?

²⁷ Iꞌdi tahe Ínam Aadam dowwanoha ka herti Waakh khabaayi anto Aabbahiissa leeyamiite, ꞌdee ebba wihi us yeele ka sina ommos kalaꞌd laguta.

²⁸ Rume atin icheeka, gaasiinkoo maanta inta kijiro, omoot ma argo geeddi icho Ínam Aadamhi dakhiis khabaayi yamiit iargin.”