Mattaayo 15 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Amurreti Waakh ichoow hugummeti enenyet a isbuusanyahiin

¹ Saahka Farissaayotoo ichoow tagaammetoo amurre ilkerengeetti weene Yeerusaleem katimiyye, Yeesso itimiyye wihi iche worsatte,

² “Abattitaah a iꞌdoh hugumme aacchinyeteen iraahine, geeddi icho igolossan dahano idikhan?” worsatte.

³ Yeesso wihi us ilaabe, “Atin la a iꞌdoh jeenteti hugunkiin u, amurreti Waakh ijebissaan?

⁴ A mehe Waakh mehe yidah ya, ‘Aabbahaah ichoow abartaah inkaanyit,’ ichoow ‘Eti tuummane aabbahiis ommos abartiis falo, a layigaase!’

⁵ Iꞌdaasenyi mehe elattaan ya, etoo a geeddi us aabbahiis ommos abartiis, ‘Gargaari atin ikasugtaan a siinti an Waakh ibahche,’ iyadeeh one,

⁶ us gargaaraas ka aabbahiis iinkaanyitin. Iꞌdaas ka jeenteti hugunkiin u, antohi Yeedi Waakh a ꞌdiiꞌddaan.

⁷ Iskaayyeessooy! Isaaya maanti us wori Waakhe atin miinsan kaayyeede a eysiiche.

⁸ “ ‘ꞌDooꞌda af on ka ikoolicha iꞌdaasenyi uuricho goyaka foga ileejiraan.

⁹ Immarah on iwahtaan. Hugummeti enenyet soouume iꞌdi amurreti Waakh u enenyet abchaan.’ ”

Wihi enenyét Waakh ortiis ka biꞌdirroocho

¹⁰ Yeesso urur isiwahe, wihi us iyidah, “Dagansada, waha la abda.

¹¹ Walah enenyet af tabo enenyet biꞌdirroocho mele. Iꞌdaasenyi yeedi enenyet af leeyamiit iche enenyet biꞌdirroocha.”

¹² Abatti ꞌdeerka itimiyye, wihi iche worsatte, “At saggi Farissaayo uus iche waha daagte ikaahollowte a garatta on a?”

¹³ Yeesso wihi us ilaabe, “Icho a iꞌdi geeyi Aabbaheeyki serey jiro rubeytiis il ikatoollinne, Aabbaheey bukkhicho.

¹⁴ Woricho ꞌdiicha! Icho a iꞌdi ꞌdooꞌdi indo laaye, toro enenyeti indo laa angaamicho. Etoo indo laa chuꞌus koo indo laa angaamicho, lammache ankhar a iskaleedihta.”

¹⁵ Beetero la wihi us iyidah, “Mammahti kootte oraat wihiche nah isoocheek.”

¹⁶ Yeesso wihi us icho worsate, “Atin laka uliba walah atin gelo mele?

¹⁷ Ma abattaan a walahbaaw enenyet af tabo holoolo on gelaane, sar kabahaan.

¹⁸ Iꞌdaasenyi wahanyeyyohi enenyet af kasoobaho uure kasoobahaane, waha la enenyet a biꞌdirroochaan.

¹⁹ A mehe enenyet uuriis goya iche mali suuje kayamiit iꞌdi maanta ogoossi dubunuunu lagelo, mejeli makhaabassi tiis ieheynan leeurꞌdo ichoow sohoꞌddarri ichoow hatto ichoow garti beenaat ichoow ham.

²⁰ Wahanyeyyohane enenyet biꞌdirroocha, iꞌdaasenyi dahanohi liidikhanne lakagolossati enenyet ma biꞌdirroochaan.”

Aranti Yaꞌhuud ieheynane Yeesso kakhuufte

²¹ Yeesso ili Gaalilaaya kakahe, ili ilkerengeetohi Tiiro ichoow Siidon isoodow irte.

²² Makhaabassoo Yaꞌhuud ieheynane ilaas taal, timiyye riirte, “Kamur, Inam Dawuud, uur isoonugleyso! Inanteey ginnati dakhatti ka weyti sina taham,” itidah.

²³ Yeesso la wohoo rucchul laka ma iidaahan. Abattitiis la itimiyye, hawwaassatte, “ꞌDubeenna kasoorirriirta laab,” itidah.

²⁴ Wihi us makhaabál ilaabe, “Ani Waakh a isooerge ꞌdee ꞌdooꞌdi Issiraayele iꞌdi iiyti baabaatee kalday yowda.”

²⁵ Makhaabale la timiyye ortiis ka jilbo il kaguꞌdubte, hawwaassatte, “Kamuraaw, igargaar!” tidah.

²⁶ Yeesso wihi us ilaabe, “Gololi nyaakhute lakhaato kararre liikhubo ma haaggan.”

²⁷ Iche la iitatte, “Aa, Kamuraaw! Iꞌdaasenyi kararre laka gololi eti kararre leh kasoodiddihe, a suunatta on.”

²⁸ Yeesso ꞌdeerka wihi us ilaabe, “Makhaabassa, at weyti ani ikakhuufta, nyaam, wihi at daahte a kiyeelaa.” Chirraas on inantiche samaatte.

Yeesso ꞌdooꞌdi ittaawe samaacha

²⁹ Yeesso intaas katabe, Beyti Buurenye Gaalilaaya afiche tabe, irte burroo kore, orronte.

³⁰ Ururoo buure iyimiyye, ꞌdooꞌdi luhlo laa ichoow ki indo laa ichoow ki maꞌdayyee ichoow ki af laa ichoow ꞌdooꞌdi addane khakkhannan sookhaate Yeesso ortiis keene, ulla icho tuumman samaache.

³¹ ꞌDooꞌd chuꞌus ꞌdooꞌdi af laaye yeyyeedo ichoow ki elyeenye sohti ichoow ki maꞌdayyeenye samaate ichoow ki indo laaye il argo arge ka weyti girmeeste Waakkhi Issiraayel saaꞌdeen.

Yeesso mejeli Yaꞌhuud ieheynane alif affare goollicha

³² Yeesso abattitiis wahe, wihi us iyidah, “An ꞌdooꞌda weyti uur isoonugleesda. Maan seyyah dakkhan ani on ileejire, wihi icho yamhiin la ma khabaan. Anihi ankaa khabaani laabo ma ꞌdoono. A mehe a geeddi icho jit ka sussuuhaan.”

³³ Abattitiis wihi iche ilaabte, “Yiba ka, gololi geeddaasenye urura yaakho intoh kaꞌhella?”

³⁴ Yeesso la, “Makaate geeddoh khabtaan?” worsate. Iche la wihi iche ilaabte, “Makaate teeba ichoow bahaggoor rurrucchul laka a khabna.”

³⁵ Ulla urur amur ibahche orrommiche.

³⁶ ꞌDeerka makaateyyohi teebee ichoow bahag khaate, Waakh kalaꞌd ilaabe, jejjebche, abattitiis ididdiibe, abatti la baꞌh gisse.

³⁷ Icho tuumman golossateene ichoowka dargeen. ꞌDaꞌddaboka abatti enjel teeba gololi jejjebane lasoowaache buuho soosuunte.

³⁸ Mejeli golossate deyyeho ichoow nyaakhut la liikekkaan, a elif affar.

³⁹ Yeesso inkoo us urur kahche ka, kooban gele, ili Magadaan irte.