Mattaayo 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Mammahti harrati yeerare

¹ Maalinkaas goya, Yeesso minki us kajire kabahe, irte beyti Gaalilaaya afiche orronte.

² Ururi Yeesso khaariche weyti buuraate, ꞌdeerka koobanhoo kore goya koorronte, enenyet la bey afiche tolossate dagansate.

³ Ulla mammaho ka wihi buure abche, wihi us yidah, “Etoo gos khabo, a irte ilmo harra kachibaa.

⁴ Ilmoha us taaꞌhicho gaasoo jit goya kadiheene, chimbiro la yimaateene, yumheen.

⁵ Gaasoo la ilassi ngꞌaajjeenye harrati rucchul khabto kadiheen. Wahaas dowwa on soobaheen, a mehe harra rucchulee.

⁶ Iꞌdaasenyi chiꞌ orrahe soobahte ka, orrahe geeyohaas soobahe gubte. Hiiyyaye laa yihiin gone angageen.

⁷ Gaasoo laka inti geeyohi rurrucchule kudah khabo kadiheen. Geeyohaas la geeyohi soobahe afcheen.

⁸ Gaasoo la inti harrati haaggan khabto kadiheene, gurnaan deleen. Gaasoo kol kudoo deleene, gaasoo kol tomon lih deleene, gaasoo la kol tomon seyyah deleen.

⁹ Eti dogo khabo a daago giꞌde!”

Yeesso wihi mammahtaas cheekto abattitiis kalday icheeka

¹⁰ Abatti Yeesso itimiyye, wihi iche usu worsatte, “At a iꞌdoh chirri at ꞌdooꞌd walah abisso mammaho ikaayyeedda?”

¹¹ Yeesso la wihi us ilaabe, “Waakh garanti wihi dagsane dakhi goobi Waakh miinsan lagarti a atin siiche. Iꞌdaasenyi ꞌdooꞌdi addan iꞌdaas mee.

¹² Eti tuummane wihi dahan lagesse mujjum woywoye a liikakhaya ichoowka wihi us khabo buuraataan. Iꞌdaasenyi eti wihi dahan lagesse mujjum iwoywoyin, wihi us khabo laka a lakakhaata.

¹³ Jeentetane icho mammah ka walah ikacheeka. “Walah a yeyaane eheet a ma argaan, wihi an eldi a daagaane eheet a ma abtaan.

¹⁴ Wori eti Waákh íyeyyeedo Isaaya layadeeh cheeke icho ka a labuuhiche. “‘Atin walah a dagansattaane, dagansattaane, iꞌdaasenyi jirtuu ma abattaan. Walah a yeytaane, yeytaane, iꞌdaasenyi jirtuu ma atin gelaan.

¹⁵ A mehe ꞌdooꞌda uurassicho a gaꞌdaale, dogohicho la a ꞌduuꞌdeene, toro la indohicho laka a ꞌduuꞌdeen. Chiꞌiche iꞌdaas ieheynan, indohicho a geeddi icho il argaane, dogo la khabaane, uurassicho la a geeddi icho walah abtaane, a geeddi icho ani isoourgiyaane anna samaacho.’

¹⁶ Iꞌdaasenyi Waakh indohiin a imaale a mehe il a argaane, dogohiin la walah a daagaan.

¹⁷ Rume atin icheeka, ꞌdooꞌdi ittaawenye Waákh íyeyyeedo ichoow ꞌdooꞌdi ittaawenye Waakhe fiffissan, wihi toolla atin agartaan argin a imooneene, iꞌdaasenyi ma argin. Wihi atin toolla daagtaan daagin a imooneene, iꞌdaasenyi ma daagin.”

Yeesso abattitiis wihi mammahtaas tahe icheeka

¹⁸ “Mammahti eti ilmo harra kachibo wihi iche miinsantahe dagansada giꞌde.

¹⁹ Chiꞌ etoo wori dakhi Waakh miinsan daago toro la wihiis iaban, Seytaanki uskeel leh a yamiite, woraas icho daageen uurassicho kabahcha. Waha a ilmohi jit lakachibo.

²⁰ ꞌDooꞌd gaasoo a iꞌdi ilassi ngꞌaajjeenye harrati rucchul khabo. Ilmohi harrata kadihe a iꞌdi eti uus Yeedi Waakh daago hamaadi buure ka khaatti.

²¹ Iꞌdaasenyi hiiyyay us khabo mele, mujjum ma tolossati. Maanti jeenteti Yeedi Waakh u sinatoo isoobahte ommos sina loomhiche dowwa on soodiha.

²² ꞌDooꞌd gaasoo a iꞌdi inti geeyohi rurrucchule kudah khabto. Ilmohi harrata kadiho a iꞌdi eti Yeedi Waakh daago, raaho, iꞌdaasenyi waꞌdwaaꞌdi harrata ichoow ꞌdamaanki kamurroon ba afchaane, gurnaan icho delaan mele.

²³ ꞌDooꞌd gaasoo a iꞌdi inti harrati haaggan khabto. Ilmohi harrata kadiho a iꞌdi eti Yeedi Waakh daago toro abti. Ulla gurnaan kol kudoo ommos kol tomon lih ommos kol tomon seyyah geeddi il lakachibe ꞌdirihiissa dela.”

Seytaan dakhi Waakh a ꞌdiiꞌddanyahe

²⁴ Yeesso mammahtoo addan ꞌdooꞌd ibahche, wihi us iyidah, “Dakhi goobi Waakh a iꞌdi etoo gos khabo irte gosiis ꞌdargaayyeti haaggan kachibe.

²⁵ Iꞌdaasenyi ibeenkoo ka geeddi enenyet tuumman urꞌdo, chiiytaankiiskoo yimiyye ilmohi haraameet, gosaas ꞌdargaayye goya kachibe, katabe.

²⁶ Chirri ꞌdargaayye soobahte gurnaan bissaate ka, haraame laka soobahte.

²⁷ “Ilbooyyeti eti gos leh timiyye, wihi iche tidah, ‘Kamur, at goorat ilmohi hahhaaggan gosaah goya ma kachibina? Haraanta gos goya kasoobahte la a tohe?’

²⁸ “Eti gos leh la wihi us ilaabe, ‘Chiiytaankoo iꞌdaas yeele.’ “Ilbooyye la wihi iche worsatte, ‘A iranna haraantaas gos goya kasoobahte soobbukkhinna?’

²⁹ “Ulla wihi us ilaabe, ‘Mele, chirri atin haraam soobukkhissaan a geeddi atin ꞌdargaayye laka leesoobukkhissaan.

³⁰ Lammacho ba ꞌdiicha a isleebaheene ichoowka ibeenki gurnaan lagoocho. Anna ibeenkaas ka ꞌdooꞌdi gurnaan goocho wihi icho yeelaan a icheeka. Koloo haraam soobbukkhicha, koobbino ka iskaahhida, ꞌdee a lagubo. ꞌDargaayye la soogoocha koondiheey kichiba.’ ”

Saggi dakhi Waakh iballaasti

³¹ Yeesso toro icho mammahtoo addan icheeke, “Dakhi goobi Waakh a iꞌdi ilinti weyti rucchule, etoo khaate gosiis goyaka il gesse.

³² Ilinta a ilinti ilmo tuumman goyaka weyti rucchul. Eheetteey laka maanti iche soobahte, gos goyaka geeyi geeyo tuumman kabuurenye tateehe, ꞌdee chimbirohi saraat yamiitiine liikhimohiis kafiddiyaan.”

³³ Yeesso toro mammahtoo addan ibahche, “Dakhi goobi Waakh a iꞌdi booddati makaate fuurisso makhaabassoo wohoor khaatte, ingangaanoti buure kakhayte ichoowka ingangaano tuumman fuurte.”

Yeesso a iꞌdoh mammah ikayeyyeeda

³⁴ Yeesso urur waha tuumman mammaho ikacheeke. Enenyet mammah on menye, wohoo addan walah ma kaabin.

³⁵ ꞌDeerka wihi goorat eti Waákh íyeyyeedo ka lacheeke labuuhiche. “Chirri an icho leeyeyyeedo, a imammahda, wahanyeyyohi uus an harra soouume dagsaneet icheeka.”

Yeesso wihi mammahti ꞌdargaayye ichoow haraame miinsantahe ꞌdooꞌd abcha

³⁶ Yeesso ꞌdeerka urur katabe min gele, abattitiis la itimiyye wihi iche itidah, “Wihi mammahti haraameet miinsantahe nah isoocheek.”

³⁷ Yeesso wihi us ilaabe, “Eti ilmohi haaggane ꞌdargaayye gos kachibe a Ínam Aadam.

³⁸ Gos la harra itoolla, ilinti haaggan la ꞌdooꞌdi dakhi Waakhe itolossa, haraame la a nyaakhuti ki uskeel leh.

³⁹ Chiiytanki haraam gos kachibe la a Seytaan. Gurnaanki lagoocho la ibeenki yomboote tusa, ꞌdooꞌdi gurnaan goocho la a herti Waakh.

⁴⁰ “Saggaas haraam liibukkhicho ꞌdab ka liigubo, ibeenki yomboot laka iꞌdaas on yateeh.

⁴¹ Ínam Aadam hertiis a sooerga, iche la ꞌdooꞌdi tuummane enenyet uskeel kalugꞌdo ichoow ki hugunꞌdarri kaassohti tuumman dakhiis goya kabahchaan.

⁴² Herta Waakh la ꞌdab goya kaluguꞌdda. Intaas ka la ooyaane ilko iskarobaan.

⁴³ ꞌDeerka ꞌdooꞌdi fiffissan la goob Aabbahicho goyaka iꞌdi banayhi orraheet u a ababa. Eti dogo khabo, a daago giꞌde.”

Dakhi Waakh weyti khummanyahe

⁴⁴ “Dakhi goobi Waakh a iꞌdi wohoo weyti gato miigenye gos goya lakadagche. Etoo chuꞌus soosuune ka, toro dagche. Eta hamaad ka irte wihi us khabo tuumman ororiche gosaas gatte.

Mammahti daakki gato miige

⁴⁵ “Toro dakhi goobi Waakh a iꞌdi daakki weyti gato miigenye eti bacchaarti yowti.

⁴⁶ Chirri us daakkoo weyti gato miige ꞌhele ka irti wihi us khabo tuumman ororicho daakkaas soogatti.

Berri ꞌdooꞌdi fiffissan ichoow ki sussuuje seleye lasaaha

⁴⁷ “Toro dakhi goobi Waakh a iꞌdi oroohti bahag lakakhabti bey liiseye, bahaggi fil ittaawe sookhabatti.

⁴⁸ Chirri oroohtaas buuhsante ka ꞌdooꞌdi bahag khabti bey afiche isoobahcho. ꞌDeerka orronti, bahaggi hahhaaggan enjelle kachibo, iꞌdaasenyi ki sussuuje rogo.

⁴⁹ Ibeenki yomboote Waakh enenyet tuumman hukkumo laka iꞌdaas on tateeh. Herti Waakh a tamiite ꞌdooꞌdi uskeel yeele ichoow ki fiffissan ba seley saahta.

⁵⁰ Ki uskeel yeele ꞌdab goya kachibta, intaas ka la weyti ooyaane ilko iskarobaan.”

Wihi husub ichoow wihi raagan

⁵¹ Yeesso la wihi us abattitiis worsate, “Atin waha tuumman a abatteen on a?” Icho la wihi icho ilaabeen, “Aa.”

⁵² Wihi us iyidah, “Maantaka eti tuummane tagaanki amurreenye wihi dakhi goobi Waakh miinsan laabche a iꞌdi eti minki us walah gessati ka wihi husub ichoow wihi raagan soobahcho.”

Yeesso ilkerengeetti Naasaret ka laꞌdiiꞌda

⁵³ Yeesso inkoo us mammahtaas massiche ka intaas katabe.

⁵⁴ Chirra us ilkerengeetti goobicheenye Naasaret yimiy ka, minki weysiite Yaꞌhuud ka enenyet Yeedi Waakh abin sookhabte, icho la girmeesteene, “Us eta kharata ichoow miigta us waha weeli enenyet yeelin iubaaꞌdan kayeelo intoh kaꞌhele?” worsateen.

⁵⁵ “Us eta aabbahiis eti tagaanki khoꞌdoommee menya? Magah abartiis Maariya menya? Yaakoobo ichoow Yuussuf ichoow Siimon ichoow Yuuda la walaalinyetiis menya?

⁵⁶ Albehi leedesse tuumman goyteen ma kijiro? Eta ꞌdeerka waha tuumman intoh kaꞌhele?”

⁵⁷ Icho la usu ꞌdiiꞌdeen. Iꞌdaasenyi Yeesso wihi us icho iyidah, “Eti Waákh íyeyyeedo, ꞌdooꞌdi goobicho ichoow ꞌdooꞌdi yaaftiise kalday on iinkaanyitin.”

⁵⁸ Ulla jeenteti icho usu ikakhuufin u, intaas ka wihi weeli enenyet yeelin iubaaꞌdan wohoo rucchul on yeele.