Mattaayo 12 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso a Kamuri Seeri Lanaso

¹ Maantoo Seeri Lanaso ka, Yeesso abattitiis khabaayi, gosase goya raaha. Abattitiis la a ankaaate, ilmohoo ꞌdargaayye guratte, tuhum.

² Farissaayo uus iche waha agarte ka, wihi iche Yeesso itidah, “Yey! Wihi abattitaah Seeri Lanaso ka yeesso ichoow amurre ma israahaan!”

³ Yeesso wihi us ilaabe, “Atin wihi Dawuud yeele maanti usu ichoow ꞌdooꞌdi us khabe ba raarahteen Yeedi Waakh ka ma soomin a?

⁴ Dawuud uranti minki Waakhe gele, usu ichoow ꞌdooꞌdi leejire makaateti Waakh liibahche yumheen. Amurreti laraaho ka kuhaaniyyo kaldaye makaatetaas yahame, icho ma kakhabaan.

⁵ Atin injire Amurre ka saggi kuhaaniyyo chiꞌicho minki Waakhe buure ka Seeri Lanaso hil haaggichaan, seera ibiꞌdirroochaane, iꞌdaasenyi icho uskeel iyeelin ma soomin a?

⁶ Wihi an atin icheeko, etoo inta kajiro, minki Waakhe buure laka a kussanyahe.

⁷ Chiirnaanneti Yeedi Waakh wahane kachiiran, ‘An soorriyoti at ibihisso menye, atihi ꞌdooꞌdi addan uur inugleysatti iche ꞌdoona.’ Chirri atin rumanka wihi yeeda essi garatteen, ꞌdooꞌdi uskeel iyeelin, uskeel ma igoossaan.

⁸ A mehe Ínam Aadam, a Kamuri Seeri Lanaso.”

Yeesso Seeri Lanaso ka etoo samaacha

⁹ Yeesso intaas katabe, minkichoki weysiite Yaꞌhuud gele.

¹⁰ Etoo dahane hanjaawte la intaas a kijire. Farissaayotoo la intaas goya kijirta, wohoo icho Yeesso kacheektaane yowtaane, ꞌdeerka wihi icho Yeesso worsateen, “Amurre ichoow eti Seeri Lanaso ka lasamaacho a israahaan?”

¹¹ Ulla wihi us icho iyidah, “Chirri etiinkoo naffoo iiyyaat khabo, naf la Seeri Lanaso ka ankhar kadihe ma sookhabatti ma soobihisso?

¹² Weeli enenyet geeddoo meheenye naffi iiyyaat kussanyahe? Maantaka wihi haaggane Seeri Lanaso ka layeelo ichoow amurreteen a israahaan.”

¹³ ꞌDeerka wihi us et iyidah, “Dahantaah fiti.” Et dahan ficche, dahane toro tuum haagsatte, iꞌdi ti addan titah.

¹⁴ Iꞌdaasenyi Farissaayo bahte, tossatte, jiti icho Yeesso kayagiisiin kamasseen.

Yeesso a falfati Waakh soobahsate

¹⁵ Yeesso saggi Farissaayo ogoos iyowatti garta, intaas katabe. Ururoo buure la raahe, Yeesso la ꞌdooꞌdichoki khakkhannan tuumman samaache.

¹⁶ Ulla ꞌdooꞌd tootooche, uus icho eti us yahe cheekin.

¹⁷ Ulla wahaas a yeele ꞌdee wihi eti Waákh íyeyyeedo Isaaya layadeeh ka lacheeke labuuhicha.

¹⁸ “Falfateeyti an soobahsade talla. A eti an weyti ꞌdoono, toro la an kahamaado. Anihi Waakhe la Rubeyti Munyee rubeytiis goya a buuhicha, ulla saggi us yaafo jiti fissan ka ihukkumo icheeka.

¹⁹ Us ma jaakho ommos ma rirriiro, et jitat ka hooyiis daago mele.

²⁰ Us koloo kalday laka balakki khollokhte ma jebcho, toro la ꞌdabi taahi uum bahcho ma jiccho. Iꞌdaas ka eti ꞌdabakhenye ꞌdaran jiti samacchaarenye kawoya, ma ꞌdiicho ichoowka ebba saggi jiti fissan ka liihukkumo iyeela.

²¹ Magahiis ka yaafo tuumman khajjeel a khabaan.”

Farissaayo Yeesso miigti karnati ginnayyoote hil kahaaggicha elatta

²² Saahka ꞌdooꞌdoo etoo ginna dakhatti indo laaye af laa Yeesso ikeene. Yeesso la et samaache, ꞌdee et a yeyyeedo toro il a argo.

²³ Enenyet tuumman girmeeste wihi us yidah, “Eta sarka a weel Dawuud a?”

²⁴ Iꞌdaasenyi Farissaayo chirri iche wahaas daagte ka, wihi iche tidah, “Miigti Beelsebuulhi karnati ginnayyoote kaldach on eta enenyet ginna kabahcha.”

²⁵ Yeesso wihi icho kamassaan garte, wihi us icho iyidah, “Yaafti tuummane seley goote isdihto a baabaata. Toro la ilkerengeet ommos minki seley gowe isdiho geed us fiddiyo mele.

²⁶ Chirri Seytaan on Seytaan bahcho, us seley a goggowe. Dakhiis saggoh orey ikasohta?

²⁷ Chirri an miig Beelsebuul ka ginnayyo enenyet kabahcho la, ꞌdooꞌdiin miig eyya ginnayyo kabahcha? Icho ꞌdeerka atin hukkuma.

²⁸ Iꞌdaasenyi chirri an Rubeyti Waakh ka ginnayyo bahcho, waha saggi dakhi goobi Waakh goytiin iyimiyye tusaan.”

²⁹ “Ommos etoo saggoh minki etoo miige igela, meehiis ihata sammata us koloo etaas miige ihidhidin? ꞌDeerka minkiis gela hata.

³⁰ “Eti tuummane ani ileejirin, a itirrima. Eti igargaarine walah ileesooholin a ileefida.

³¹ Toollaka wihi an atin icheeko, uskeel tuumman ichoow gaf tuumman a geeddi enenyet liikakuto. Iꞌdaasenyi eti Rubeyti Munyee igafe, uskeeliis ma liikakuto.

³² Eti Ínam Aadam igafe a geeddi uskeeliis liikakuto. Iꞌdaasenyi eti Rubeyti Munyee igafe, uskeeliis harrata ka ichoow harrati soosohatti ka ma liikakuto.

³³ “Geey haaggiche ulla gurnaanki haaggane delaa, ommos geey suujaache ꞌdee gurnaanki suuje a delo. A mehe geey ba gurnaanki us delo lakaabta.

³⁴ Dessi toof! Saggoh wihi haaggan itadeehiin chirri atin uskeel kajirtaan? Iꞌdi tahe wihi uuraah goya buuho iche afaah leeyamiit.

³⁵ Eti haaggan uuriis laka a haagganyahe gone, haaggaas on dela. Eti suuje la uuriis a suuj gone suujoonkaas on dela.”

³⁶ “Iꞌdaasenyi wihi an atin icheeko, ibeenki Waakh ꞌdooꞌd hukkumo, enenyet yeedi indigir laaye aficho kasoobahe iche cheekta.

³⁷ A mehe yeedi afaah ka a lakifura, toro yeedi afaahha uskeel liikaagoocha.”

ꞌDooꞌdi Yeesso ꞌdiiꞌdo sina latusa

³⁸ Farissaayotoo ichoow tagaammeti amurre wihi iche Yeesso itidah, “Eti ween, atihi wohoo miigti Waakh tuso nah tusso ꞌdoonna.”

³⁹ Yeesso wihi us ilaabe, “ꞌDooꞌdi iꞌdeenye uskeel lehe waakkhassi addan wahti on wohoo miigti Waakh tuso daaha. Iꞌdaasenyi wihi goorat Waakh eti Waákh íyeyyeedo Yoona layadeeh ka enenyet tuse on menye, walah addane lasiicho mele.

⁴⁰ A mehe Yoona maan seyyah ibeenkiche khabto uuri bahaggoo buurenye goya kajire. Ínam Aadam laka saggaase maan seyyah hawwaal ikabarya.

⁴¹ Ibeenki Waakh ꞌdooꞌd hukkumo, ꞌdooꞌdi ili Ninaawi a tolossata ꞌdooꞌdi iꞌdee cheekta. Iꞌdi tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira.

⁴² Ibeenki Waakh ꞌdooꞌd hukkumo la makhaabassi karnatenye ili Cheeba a kahta ꞌdooꞌdi iꞌdee uskeel igoossa. A mehe iche goorat harra ginꞌdohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay.

Saggi ginna toro isoonokhatti

⁴³ “Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, iꞌdaasenyi fur ma ꞌhesso.

⁴⁴ ꞌDeerka wihi iche tadeeh, ‘Fureeyki an kasootabe inokhda.’ Maanti iche tamiit, furi marahe, harane lamujjummooche ꞌhessa.

⁴⁵ Ginnataas ꞌdeerka iratta, ginna teeba addane iche laka kasuuje sookhaatatta etaas goya gelaane, fur yeessaan. Etaas la jirotiis, ti goorat oraat a kaꞌdarsatta. ꞌDooꞌda iꞌdeenye uskeel leh iꞌda on itateeh.”

Hiiy Yeesso ki rummaat

⁴⁶ Yeesso urur leeyyeedaayi, abartiis ichoow walaalinyetiis ba usu leeyeedin ꞌdoonaane, khar tolossateen.

⁴⁷ Etoo wihi us Yeesso iyidah, “Abartaah ichoow walaalinyetaah khare toollaane, ati kileeyeedin ꞌdoonaan.”

⁴⁸ Wihi us ilaabe, “Kamalda bal, abarteey ichoow walaalinyeteey a ayyo illeh?”

⁴⁹ Yeesso abattitiis dahan iooge, wihi us yidah “Abarteey ichoow walaalinyeteey kallaayo.

⁵⁰ A mehe eti tuummane wihi Aabbaheeyki serey jiro ꞌdoono yeelo, a walaalaaya, a walaassaaya, a abartaaya.”