Mattaayo 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yoohanahi Enenyet Baattissiyo usu Yeesso Ki Lasubhe yahe worsata

¹ Inkoo Yeesso abattiisti tomon ichoow lammee wihi iche yeesso icheeke ka, intaas katabe, ilkerengeetohi addan irte enenyet wori Waakh abche, toro la Yeedi Waakh icheeke.

² Yoohanahi Enenyet Baattissiyo jeela kajiraayi, wihi Kiriisto yeelo daage, abattiistoo Yeesso iergate.

³ Wihi icho Yeesso sooworsateen, “At a Ki Lasubhe lasugo bal etoo addane sugna?”

⁴ Yeesso la wihi us ilaabe, “Nyaama nokhda Yoohana waha atin daagtaan ichoow waha atin agartaan icheeka.

⁵ ꞌDooꞌdi indo laa kola indo a bahcha, ki luhlo ikhabin luhlo a bahcha. ꞌDooꞌdi buꞌdayyo sar kakhabe a lasamaacha, ki dogo laa la dogo a bahcha. ꞌDooꞌdi tuume la omoot a lakasookahcha. ꞌDooꞌdi wahanyeyyohi Waakh miinsan ka miskiine la Wori Haaggan a liicheeka.

⁶ Eti Waakh imaalo a ki jeenteteey u kakhuufnaanki us ikakhuufo iꞌdiin.”

Yeesso wor Yoohanahi Enenyet Baattissiyo kaayyeeda

⁷ Chirra abatti Yoohana nokhatti ka, Yeesso Yoohana woriis urur kaleeyyeede wihi us yidah, “Bal wihi atin hidaad ka iratteene sooagarteen kamalda. Etoo ꞌdabakhenye iꞌdi hoosi hafar sesseehicho mee iratteene agarteen.

⁸ Bal wihi atin iratteene sooagarteen kamalda. A etoo gaaddi haaggan khabo? Mele! ꞌDooꞌdi gaaddi weyti hahhaaggan khabo a ꞌdooꞌdi minassi karnatoot fiddiyo.

⁹ ꞌDeerka mehe iratteene agarteen? Eti Waákh íyeyyeedo agarteen? Aa, rumanka eti atin agarteen, eti Waákh íyeyyeedo laka a kussanyahe.

¹⁰ Eti woriis lachiire a kan. “ ‘Yeya, ergattiteey ortaahha erga, iche rubeyohi enenyete tannabissa.’ ”

¹¹ Rume atin icheeka, weeli enenyet goyaka, eti Yoohanahi Enenyet Baattissiyo kaween ma jiro. Iꞌdaasenyi eti dakhi goobi Waakh ka ꞌdaran laka, us Yoohana a kaweenyahe.

¹² Uus ibeenneti Yoohanahi Enenyet Baattissiyo jire kasookhabatti ichoowka toolla, dakhi goobi Waakh sina a kawaarte. ꞌDooꞌdi sussuuje la usuhi goobi Waakh khabti marma.

¹³ Iꞌdi tahe Chiirnaanneti ꞌdooꞌdi Waákh íyeyyeedo ichoow ti Amurre ba, wori dakhi goobi Waakhe kaayyeedeene ichoowka Yoohana yimiy.

¹⁴ Chirri atin wihi icho yidaaheen khaatattaan la, Yoohana a Eliiyahi dowwanoha yamiit.

¹⁵ Eti dogo khabo a daago giꞌde!

¹⁶ “Kamalda bal, ꞌdooꞌdi weyꞌda mehe iokkanaacho? Icho a iꞌdi nyaakhuti sokkoyyo goyaka nyaakhutoo addan kariiro,

¹⁷ “ ‘Nah a gurroonne, atin la gurro ma nah leeokkhin. Nah geeyi maanti enenyet buje ladowo atin isoodowne, atin la ma ooyin,’ isidowo.

¹⁸ A mehe maanti Yoohana yimiy, us afe hiite toro la farsotoo rucchule sabiib laka ma ubhaabane, ꞌdooꞌd la toro mehe yidah ya, ‘Usu alah ginna dakhatta.’

¹⁹ Ínam Aadam a yimiyye, golossate, farsoti sabiib laka dame icho la mehe essaan ya, ‘ꞌDamaanki toro meleefeenye ꞌdooꞌdi kooddi goocho ichoow ki uskeel leh aal kabahsati kalla.’ Iꞌdaasenyi kharati Waakh runtiche wihi iche yeesso lakaarga.”

Ilkerengeetohi ꞌdooꞌdicho Yeesso irummeysan enenna sinati sugto a buure

²⁰ ꞌDooꞌdi ilkerengeetohi us wihi weeli enenyet yeelin iubaaꞌdan buurche kayeele uskeelicho ma kasoonokhan. ꞌDeerka Yeesso icho uskeel kacheekan sookhabte.

²¹ “Atinhi ilkerengeetti Choorasin taalliin sinati atin sugto eenna a buure! Atinhi ilkerengeetti Bessaayda taalliin sinati atin sugto eenna a buure! Iꞌdi tahe chirri wihi ittaawenye weeli enenyet yeelin iubaaꞌdane goytiin ka layeele goorat ilkerengeetti Tiiro ichoow ti Siidon ka layeele, ꞌdooꞌdaas arraagane uskeelicho kasoonokhte, ꞌdeerka ingaꞌdaaꞌdiyyo gessate, bombey kadowte.

²² Iꞌdaasenyi wihi an atin icheeko, ibeenki Waakh ꞌdooꞌd hukkumo, sinati Waakh ꞌdooꞌdi ilkerengeetti Tiiro yiil ichoow ꞌdooꞌdi ilkerengeetti Siidon yiil tuse iche deefta sinati Waakh atin tuso ka.

²³ Atinhi ilkerengeetti Kafarnaaꞌhum taalliin la kol serey atin liiokkhicho koogtahiin? Mele, meessi ꞌdooꞌdi tuume kijiro iche ikhubattaan. Chirri wihi ittaawenye weeli enenyet yeelin iubaaꞌdane an goytiin ka yeele ilkerengeetohi Soodom lakayeele, ilkerengeettaas kootte uliba laka a jirta on.

²⁴ Iꞌdaasenyi wihi an atin icheeko, ibeenki Waakh ꞌdooꞌd hukkumo, sinati Waakh ꞌdooꞌdi ilkerengeetti Soodom yiil tuse iche deefta sinati Waakh atin tuso ka.”

Yeesso ꞌdooꞌdi kurme a nascha

²⁵ Yeesso chirraakka weeste wihi us yidah, “Aabbahaaw, Kamuri serey ichoow harra ba iween, a kikoolicha. Iꞌdi tahe at wahanyeyyoha ꞌdooꞌdi kharayyeenye toro la weyti soome a kadagisse, ꞌdooꞌdi iꞌdi nyaakhutenye wohoo igaran la tusse.

²⁶ Aa! Aabbahaaw wihi kaahamaadicho gon wahaase.”

²⁷ Yeesso toro wihi us ꞌdooꞌd iyidah, “Aabbaheey walah dakkhan dahantaaya soogesse. Aabbahaaya on menye et Weeliis garti mele. Toro la Weeliis ichoow ꞌdooꞌdi Weeliis ibabbakkaahin ꞌdoono on menye, et rumanka eti Aabbaheey yahe garti mele.

²⁸ Kaaleya ani iamiita, atinhi tuummane geeddi atin huleesi nool siꞌddaan on kuranteen. An a atin naschaa.

²⁹ Kaaleya, hil ileesoogela, walah ikaabda. Iꞌdi tahe ani uureey ka a etoo samacchaarenye, toro isnuglaacho, ani la a atin naschaa.

³⁰ Iꞌdi tahe hili an atin korcho a ꞌdabakhe, huleeseey la a ꞌdabakh.”