Marko 15 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso Bilaatohi yaafti Roomeenye gaafanahi ili Yaꞌhuudiyee liigeecha

¹ Uun il barye, kuhaaniyyohi wewween ichoow ewweenki Yaꞌhuud ichoow tagaammeti amurre ichoow Jaldaabti Weene Yaꞌhuud tuumman wihi icho Yeesso yeelaan goocheen. Yeesso hidhideene, khaateene, dahan Bilaato gesseen.

² Bilaato wihi us worsate, “Karnati Yaꞌhuud a ati?” Yeesso wihi us ilaabe, “A rum, a iꞌdaas at elatti on.”

³ Kuhaaniyyohi wewween wihi ittaawenye Yeesso kacheekteen.

⁴ Bilaato ꞌdeerka toro Yeesso wihi us worsate, “At wahanyeyyoha ma soolaabto? Bal waha ittaawenye icho kaacheektaan yey!”

⁵ Iꞌdaasenyi Yeesso walah uliba us laabe mele, Bilaato la girmeeste.

Yeesso omoot liigoocha

⁶ Hugum ka Bilaato daawti Baasakka ka etoo hidane enenyet usuhi lasoofuro daahe a soofura.

⁷ Etoo Barraba layadeeh ichoow ꞌdooꞌdoo sirgaal ꞌdiiꞌdo diho ka enenyet dubunuunu bakkiche jeela kijiraan.

⁸ Urur yimiyye Bilaato usuhi iꞌdi orrankateet u etoo hidan isoofuro daahe.

⁹ Bilaato la, “Anihi Karnati Yaꞌhuud atin isoofuro a ꞌdoontaan?” urur worsate.

¹⁰ A mehe us saggi kuhaaniyyohi wewween jeenteti kalꞌdarri on u Yeesso dahanohiis igesseen a garta.

¹¹ Iꞌdaasenyi kuhaaniyyohi wewween urur leeyeedeene, ꞌdee Bilaatohi Yeesso menye, Barraba soofuro a daaheen.

¹² Bilaato wihi us urur worsate, “ꞌDeerka ki atin Karnati Yaꞌhuud tadeehiin iꞌdoh idaahe?”

¹³ Riireene, “Massalaaba kakaah!” yidaaheen.

¹⁴ Bilaato wihi us worsate, “A iꞌdoh? Mehe suujenye yeele?” Iꞌdaasenyi geeddi kootteet ꞌdirihiis riireene, “Massalaaba kakaah!” yidaaheen.

¹⁵ Jeenteti us icho ihamaadin ꞌdoonuu, Bilaato Barraba icho isoofure, amuri Yeesso lakadoocho toro massalaaba lakakaaho bahche.

Iskare Yeesso ranta

¹⁶ Iskare Yeesso uranti minki buurenye gaafana igelo geesse, rabittoo iskareet tuumman isiwahte.

¹⁷ Dafartoo muggee iꞌdi karnat u korisse, ꞌduuboo kudaheet iskayuubte matah korisse.

¹⁸ Icho la usu, “Karnati Yaꞌhuudoow jiroti deer ꞌhel!” idowte.

¹⁹ Wussoo ka matah jajjahte, hanjuf kaattufte, a kachaaratta dubunuunu ortiis ka jilbo il kaguꞌdubte iꞌdoo iche inkaanyit tussuu.

²⁰ Inkoo icho kachaarteen ka, kabuuꞌdi muggee kabahcheene gaaddiis gesseen. ꞌDeerka leebaheene woyeen massalaaba kakaahaanee.

Yeesso massalaaba lakakaaha

²¹ Etoo ilkerengeetti Kureene Siimon layadeehe gosiis kayimiyye intaas leeyimiy massalaaba Yeesso sinnaan ihosseen. Siimonha la a aabba Alekisaanda ichoow Ruufo.

²² Yeesso meessoo Golgooꞌda layadeeh keeneen. Golgooꞌda la a mehe ya, Meessi Lafohi Matahe Enenyet.

²³ Farsoti sabiibe hanjati halalle lakawarse Yeesso siisse, iꞌdaasenyi ma khaatan.

²⁴ Icho la Yeesso massalaaba kakaaheen. Goycho ka gaaddiis gisante, kura guꞌddateene ebba wihi us ꞌhelo yeyeen.

²⁵ Chirra iche massalaaba kakaahto, il a geeddi sahaꞌd seyyahti chirdeereet.

²⁶ Wihi lakayigisye, massalaaba sarche lakachiire la a mehe ya, Karnati Yaꞌhuud.

²⁷ Reeroo lammeenye hatto leh leekaaheen. Koo ankiiski miigeet lakakaahe, ki addan la ankiiski gurro lakakaahe.

²⁹ ꞌDooꞌdi intaas tabo a leeabaarrama, ꞌdarraaw ka matah moroogicha. “Aaꞌheey! Atihi minki Waakhe buure jejjebisso, toro orrah seyyah on ka disso,

³⁰ bal isribe, massalaaba kasooyag giꞌde!” iche idowaan.

³¹ Saggaas on u kuhaaniyyohi wewween ichoow tagaammeti amurre laka a kachaartaane, wihi icho goycho ka esseen, “Us ꞌdooꞌdi addan a ribe, iꞌdaasenyi isribin ma yabuuꞌd!

³² Kan Lasubhe, Karnata yaafohi Issiraayele bal toolla massalaaba a kasooyago, ꞌdee a agarro, a rummeysanni giꞌde!” ꞌDooꞌdi laleekaahe laka weyti usu leeabaarrame.

Omoot Yeesso

³³ Sahaꞌd lihti maalimeet ka, il tuumman mugꞌdi yitahye, ichoowka sahaꞌd saagaale eleesse.

³⁴ Sahaꞌd saagaal ka Yeesso hooyi buure ka riire, “Elooy, Elooy, laama sabakhtani?” yidah. Wahaas la a mehe ya, “Waakkhaayaaw, Waakkhaayaaw, a iꞌdoh ikatabte?”

³⁵ ꞌDooꞌdoo intaas hagga toollo la, baabule daage, wihi icho yidaaheen, “Daaga, usu eti Waákh íyeyyeedo Eliiya layadeeh iche waha.”

³⁶ Koo la nyaame, haaruggoo khaate, farsoti sabiibe birrakhe buuhiche. Khoꞌdoonkoo deer kahide, Yeesso iyooge, ꞌdee a yubhaabe. “ꞌDiicha, usu Eliiya yamiite, sooyagcho, a agarro,” yidah.

³⁷ Yeesso weyti riire, rubey gooche.

³⁸ Dafarti weyti yobbeenye minki Waakhe buure seley goosso meel lamma seley igoote, sereye kasookharradde ichoowka iliche kabahte.

³⁹ Chirri eti koobbintoo iskareet itoollo Yeesso ortiis toollo riiritiis daage saggi us imassate arge ka mehe yidah ya, “Rumanka eta Weeli Waakhe eheet.”

⁴⁰ Deyyehotoo fogaka a ꞌdeyꞌdoossa. Goycho ka a Maariyati ilkerengeetti Magdaala ichoow Maariyati Yaakoobohi nugul ichoow Yoosse desse ichoow Saloome.

⁴¹ Maanti Yeesso boroofenhi Gaalilaaya kijire, deyyehotane usu raahte, gargaarte. Deyyehoti addane ittaawenye ilkerengeetti weene Yeerusaleem kaleetimiy laka intaase tolossa.

Sar Yeesso goꞌddoo lakahawwaala

⁴² Maantaas a Ibeenki Latannabti. Waha la a maanti Seeri Lanaso ortiise. Chirri il gelebnowe ka,

⁴³ Yuussufhi ilkerengeetti Arimaꞌdaaya Bilaato roorro laan iirte sar Yeesso daahe. Yuussufha la a etoo Jaldaabti Weene Yaꞌhuud goyaka magah khabo toro la dakhi Waakh laka sugo.

⁴⁴ Bilaato Yeessohi geeddaas ka yumuy kagirmeeste, eti koobbintoo iskareet itoollo wahe usu Yeesso ꞌhor yumuy worsate.

⁴⁵ Chirri us eti koobbintoo iskareet itoollo woraas kaabte ka, sar Yeesso Yuussuf siiche.

⁴⁶ Yuussuf dafartoo soogate, sar Yeesso massalaaba kasooyagche, dafartaas kaayyuube. Goꞌddoo daddaab ka lakhute hawwaal lakayeele goya kareeche, daddaabtoo buure ꞌdembeleeliye hawwaal afiche gesse.

⁴⁷ Maariyati ilkerengeetti Magdaala ichoow Maariyati abar Yoossee, goꞌddaas sar Yeesso lakareeche a argeen.