Marko 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso saggi minki Waakhe buure liisuujaacho cheeka

¹ Chirra us minki Waakhe buure kabaho, abattitiis koo wihi us yidah, “Eti ween, haaggi minassa ichoow daddaabohi burbuurenye lakadise, yey!”

² Yeesso wihi us ilaabe, “Minassa tuummane burbuure yeya! Berri daddaabtoo kaldaye ti addan fuusso lakatabo mele. Icho tuumman a lasookhuba.”

Wahanyeyyohi miigti Waakh tuso ibeenneti ꞌdaꞌddaboot tuso

³ Chirra Yeesso Hali Geeyohi Oolife minki Waakhe buure yeyo koorronte ka Beetero ichoow Yaakoobo ichoow Yoohana ichoow Andereeya la iyimaateene dagsi ka usu wohoo worsateen,

⁴ “Nah isoocheek wahanyeyyoha maantoh yateehiin? Toro mehe yateehe ꞌdee saggi dowwanoha ka waha tuumman liisoobuuhicho tusa?”

⁵ Yeesso la wihi us iyidah, “Yuubsada, uus etoo kalday laka atin ekkeysan!

⁶ ꞌDooꞌdi ittaawenye ani iskaayyeelo yamiite, ‘An a Ki Lasubhe’ essi, a agartaane, ꞌdooꞌdi ittaawenye ekkeestaan la.

⁷ Maanti atin yaafohi isdiho ichoow worassi ibuuhine dihoyyoot daagteen, anahina. Wahanyeyyoha a sooyateehiine, iꞌdaasenyi ibeenki yomboot uliba a ankhanyahe on.

⁸ Sirgaalle a isdihta, karnato laka isdihaan. Ilassi ittaawe ka harra sesseehta, nabhayye laka tamiit. Wahaas a chiis birriissa on.

⁹ “Atin rubeytiin laka yuubsada. Jaldaabohi Yaꞌhuude atin liidiiba, minassi weysiite Yaꞌhuud ka atin lajaha. Jeenteteey u, gaafanayyo ichoow karnatte atin liigeecha atin liicheekta, atin la garti Wori Haaggan tateehiin.

¹⁰ Wihi Waakh gooche, koloo Wori Haaggane ꞌdooꞌdi harra tuumman liicheeka.

¹¹ Maambaaw atin lakhabte dahanohicho atin lagesse, orey on wihi atin sootadeehiin akawaꞌdwaaꞌdina. Wihi chirraas atin lasiiche on daha. A mehe atin mee yeyyeeddaan, iꞌdaasenyi Rubeyti Munyeenye yeyyeedda.

¹² “Etoo walaaliissa ꞌdub goocha dahanohi nahab gessa ꞌdee layagiis. Ooyo laka weeliis iꞌdaas yeela. Nyaakhut ꞌdooꞌdi dele yeedicho ꞌdiiꞌda, dahanohi ꞌdooꞌdoo addan gessaane ꞌdee layagiis.

¹³ Enenyet tuumman a atin ꞌdiiꞌda jeenteti atin abattiteey itahiin u. Iꞌdaasenyi, eti garrahsate ichoowka sinata ꞌdubiche eleele a lariba.

Iyookkoti laꞌdiiꞌdo minki Waakhe buure lagessa

¹⁴ “Maanti atin ‘iyookkoti weyti biꞌdirenye ꞌdooꞌd keehisso’ inti ikamalin katolosso agarteen, ꞌdooꞌdi ili Yaꞌhuudiya fiddiyo tuumman halal a ifirdo. Atihi yeeda soonto yeeda a kigelo.

¹⁵ Eti minkiis sartiis fuulo uus min geline wohoo rucchul laka khaatin.

¹⁶ Eti gos goya kijiro, uus nokhanne kabuuꞌdiis sookhaatan.

¹⁷ Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure.

¹⁸ Waakh waho, uus maanassaas sinayyoot, maanti il weyti roffo yahe hir ꞌdeyo eheynan.

¹⁹ A mehe sinati maantaas jirto, ti geeddaase uus uumaccho ka Waakh harra soouume ma laargine, ichoow uliba. Toro wihi iꞌdicheenye lasooargo ba ma jiraan, jirtuu tuumman.

²⁰ Chiꞌ Kamur ibeennetaas igaabin, etoo kalday laka ma sooꞌhado. Iꞌdaasenyi iroonoti ꞌdooꞌdiiski us soobahsatuu, ibeennetaas a gaabiche.

²¹ Maantaas chiꞌ etoo, ‘Yeya, Ki Lasubhe kalla,’ ommos, ‘Yeya Kuulla!’ kiyidah, arummeysan.

²² A mehe ꞌdooꞌdoo Ki Lasubhe iskaayyeelo ichoow ꞌdooꞌdi ꞌdooꞌdi Waákh íyeyyeedo iskaayyeelo a soobaha. Icho la wahanyeyyohi ittaawenye nane miigti Waakh tuso ichoow girmo yeelaane, ꞌdee chiꞌiche tateeh ꞌdooꞌdi Waakh soobahsate ekkeestaan.

²³ Isyaakhicha giꞌde! Walah dakkhan geeddi il ankhayyahe a atin isoocheekee.

Soonokhan Ínam Aadam

²⁴ “Iꞌdaasenyi maanassaas sinayyohaas buure kuteen, “ ‘orrahe a daayatta, yeyyah la banayhiis ma soobahcho,

²⁵ yiyyihimo serey a kasookhubtaane, miigti saraat la lakorkokicha.’

²⁶ “Maantaas Ínam Aadam usuhi mirso goyaka yamiite, miig ichoow antohi buure khabo weeli enenyet tuumman a arga.

²⁷ Herti Waakh harra ꞌdollohiche affarcho ierga, ꞌdooꞌdi Waakh soobahsate harra ꞌdubiche ichoow sereyta daayan ꞌdubiche kasoobaayissa.

Wihi geeyi fiig soonokhan Kiriisto inno abcho

²⁸ “Taba geeyi fiig yeeda kaabda. Uuꞌ liikhimohiis ulhawtaane seeb bahchaan, saggi ꞌdaato isoodowwaatte a garattaan.

²⁹ Saggaas on u maanti atin wahanyeyyoha ibeenki ꞌdaꞌddaboot tuso agarteen, saggi soonokhantiis isoodowwaatte kola ititah a garattaan!

³⁰ Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin.

³¹ Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.

Maan ichoow sahaꞌddi wahanyeyyoha yateehiin ma lagarti

³² “Aabbaheey on menye, et maantaas ommos sahaꞌddaas garti mele. Herti Waakhe goobi Waakh fiddiito ommos Ínam Aadam laka ma gartaan.

³³ Taba isyaakhicha! Toorribda! Ibeenki sahaꞌddaas tateeh ma garattaanee.

³⁴ Waha iyookkoka, a iꞌdi etoo sulhaal irti. Minkiis katabo, bowꞌdayyohiis anto siicho, kooba hili us haaggicho ikatabo, eti arit fiddiyo la amuri us meel yaakhicho ibahcho.

³⁵ “Maantaka toorribda, a mehe sahaꞌddi ooyohi goob leh soonokhti ma garattaanee. Usu geleb ommos naanokho ommos geeddi lukki kariiro ommos baryo yamiit ma garattaan.

³⁶ Chuꞌus dog laan yamiit, uus atinhi uꞌdurtaan atin ꞌhelin.

³⁷ Wihi ani atin iadeeh an enenyet tuummane iadeehe, ‘Taba isyaakhicha!’”