Luuka 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Seytaan Yeesso kaja

¹ Yeesso usuhi Rubeyti Munyee buuhisse hawti Yoordane ꞌdusso kasoonokhte, Rubeyti Munyee la woyte hidaad geesse.

² Seytaan la hidaad ka ibeen tomon affar Yeesso kajmeti uskeel kaluguꞌddo ikeene, ulla ibeennetaas tuumman ma golossanne, ꞌdaꞌddaboka ankaye.

³ Seytaan la wihi us Yeesso iyidah, “Chirri at Weeli Waakh tahe, daakka leeyeede makaate a yitaahe.”

⁴ Yeesso wihi us ilaabe, “Chiirnaanneti Waakh wihi kachiiran, ‘Weeli enenyet golol kalday mee kanoolyahe!’ ”

⁵ Seytaan toro Yeesso intoo deer iwoye, koloo kalday on yaafohi harra tuumman tuse.

⁶ Seytaan la wihi us Yeesso iyidah, “Anto ichoow kamurroonki yaafoha tuumman a kisiicha. Iꞌdi tahe ani liisiiche, eti an siin ꞌdoono la ani on siicha.

⁷ ꞌDeerka chirri at iwahatte waha tuumman wahaahha yateehiin.”

⁸ Yeesso wihi us ilaabe “Wihi chiiran, ‘Kamuri Waakkhaahe waho, toro la usu kalday on ihil!’ ”

⁹ Seytaan toro Yeesso ilkerengeetti weene Yeerusaleem iwoye, minki Waakhe buure guutiis korche, wihi us iyidah, “Chirri at Weeli Waakh tahe, inta kanyaam.

¹⁰ Iꞌdi tahe Chiirnaanneti Waakh wihi kachiiran, “ ‘Waakh hertiis amure ibahcha, iche la mujjum kiyaakhissa.

¹¹ Iche la dahanohiche ka serey kiokkhissa, uus ꞌdee luhtaah dagah guꞌddine.’ ”

¹² Yeesso wihi us ilaabe, “Chiirnaanneti Waakh mehe tadeeh ya, ‘Kamuri Waakkhaahe kajme agelin.’ ”

¹³ Inkoo Seytaan Yeesso kajmeta uskeel kaluguꞌddo tuumman kakaje ka, katabe ibeenki leemujjume leesuge.

Yeesso boroofenhi Gaalilaaya ka hiliis sooumha

¹⁴ Yeesso miigti Rubeyti Munyee siisse khabaayi, boroofenhi Gaalilaaya inokhte. Wor Yeesso la harrataas tuumman kataaꞌhe.

¹⁵ Ulla minassi weysiite Yaꞌhuud ka ꞌdooꞌd wori Waakh abche, ꞌdooꞌdi daage tuumman la Yeesso saaꞌde.

Yeesso ilkerengeetti us kasooweynaate ka laꞌdiiꞌda

¹⁶ Yeesso ilkerengeetti Naasarete lakasooweynaache inokhte. Seeri Lanaso ka iꞌdi orrangateet u minki weysiite Yaꞌhuud irte. Ulla tolossate Yeedi Waakhe ꞌdooꞌd isoomaa.

¹⁷ Khadaaboo yuubane etoo Waákh íyeyyeedo Isaaya layadeeh chiire liidiibe. Ulla khadaab furfure, inti waha kachiiranyahiin ꞌhele.

¹⁸ “Rubeyti Kamur a ileejirta, iꞌdi tahe usu a isubhe ꞌdee Wori Haaggan miskiino icheeka. Kamur a isooergate, ꞌdee ꞌdooꞌdi uskeel hide saggi Kamur isoofuro icheeka, ꞌdooꞌdi indo laa la Kamur indo a fura, ꞌdooꞌdi sina lakawaaricho la Kamur sina a kabahcha.

¹⁹ A isooergate ꞌdee guꞌhi Kamur haaggiis ꞌdooꞌd tuso icheeka.”

²⁰ Yeesso ꞌdeerka inkoo us waha soome ka, khadaab yuube, ilbooyi minki weysiit idiibe, orronte. ꞌDooꞌdi minki weysiit goya kajire tuumman la Yeesso indo katoolliche.

²¹ Yeesso la wihi us ꞌdooꞌd iyidah, “Chiirnaanneta Waakhe toolla an soome atin daagteen maalinka a labuuhiche.”

²² ꞌDooꞌd tuumman haaggiis kaayyeede toro yeeda haaggane afiis kasoobahe kagirmeeste, wihi icho isworsateen, “Waha inam Yuussuf menya?”

²³ Yeesso la wihi us ꞌdooꞌd ilaabe, “Rumanka mammahta a isoocheektaan, ‘Ilkitarri issamaay! Wihi weeli enenyet yeelin iubaaꞌdane nah daagne at ilkerengeetti Kafarnaaꞌhum ka yeesse, ilkerengeettiin ka yeel.’ ”

²⁴ Wihi addane us yidah “Rume atin icheeka, et Waákh íyeyyeedo goobicho ka lakhaatti mele.

²⁵ Rumanka maanti eti Waakh íyeyyeedo Eliiya layadeeh jire, muunkhoyyohi ittaawe ili Issiraayel a kijireen. Maanassaas guꞌh seyyah ichoow nyuus tuumman hir ili Issiraayel ma ꞌdeyine, abaarti uskul harra tuumman gesse.

²⁶ Waakh Eliiya icho ma iergine, iꞌdaasenyi makhaabassoo muunkheenye ilkerengeetti Sarefaate boroofenhi Siidon kijirto taal iche ierge.

²⁷ Maanti goorat eti Waákh íyeyyeedo Eliicha layadeeh jire laka, ꞌdooꞌdi ittaawenye ili Issiraayel ka buꞌdá sar kakhabo a jire. Iꞌdaasenyi Waakh kichekoo kaldach laka ma samaanne, eti kaldache us samaache, a etoo ili Siiriya kayimiyye magahiis Naaman layadeeh.”

²⁸ ꞌDooꞌdi kootte minki weysiit goya kajiro tuumman chirri us waha daage ka, weyti hollowe.

²⁹ Kaheene, Yeesso jiiteene, hali ilkerengeete kadisantahe tahariis geecheen, usu ankhar gaataanee.

³⁰ Iꞌdaasenyi urur goya iskaguꞌdde katabe.

Yeesso etoo ginna dakhatti ginna kabahcha

³¹ Yeesso ꞌdeerka ilkerengeetti Kafarnaaꞌhume boroofenhi Gaalilaaya kajirto ikhubte, Seeri Lanaso ka enenyet Yeedi Waakh abin sookhabte.

³² Icho la saggi us ꞌdooꞌd walah iabcho kagirmeesteen. A mehe woriis anto khaba.

³³ Etoo ginnatoo uskul dakhatti la chirraas minki weysiite Yaꞌhuude goya kijira. Ulla weyti riire,

³⁴ “Wooy! Yeessohi Naasaret, nah katab!” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy,” yidah.

³⁵ Yeesso ginna leejaakhe, “Gammadiche etaas goya kasoobah!” iyidah. Ginna ꞌdeerka ꞌdooꞌd tuumman ortiis ka et lagaꞌdde, iꞌd addane iche tidah mele, et kasoobahte.

³⁶ ꞌDooꞌd tuumman girmeeste wihi us isiyidah, “Ayta weyti a girma. A yeedi anto ichoow miig khabo, a mehe ginnayyo amur on ibahcha, icho la soobahaan.”

³⁷ Wori usu miinsan la ilassaas soodow tuumman kataaꞌhe.

Yeesso ꞌdooꞌdi buure samaacha

³⁸ Yeesso minki weysiit kabahe min Siimon irte. Seyyoh Siimon la sare weyti kululaatta, Yeesso gargaar daaheen.

³⁹ Ulla kagulguubsate, sarti kululaatti leejaakhe lakabukkhe. Chirraas on sookahte, icho goollin sookhabatte.

⁴⁰ Chirra orrahe dihto, ꞌdooꞌdi khakkhannane sugeerreti yeerare khabo tuumman Yeesso liikeene. Yeesso la kooba dahano korche samaache.

⁴¹ Ginnayyo ꞌdooꞌdi ittaawe goya kabaheen ichohi riiro, “Ati Weeli Waakhe” essi. Iꞌdaasenyi Yeesso ginnayyo leejaakhe, amuri icho kaayyeedaan la tirte. Iꞌdi tahe saggi us Ki Lasubhe iyahe a gartaan.

Yeesso Yeedi Waakh minassi weysiit ka cheeka

⁴² Baryo ka Yeesso inti enenyet ikajirin irte. ꞌDooꞌd la usu yowta, chirri icho inti us kijiro yimaateen ka, usuhi icho katabo tirteen.

⁴³ Iꞌdaasenyi wihi us ꞌdooꞌd iyidah, “Wihi Waakh gooche, an a irda ilkerengeetohi addan ka laka Wori Haaggane dakhi Waakh miinsan ꞌdooꞌd icheeka. Iꞌdi tahe wahaase ani liisooergate.”

⁴⁴ Ulla ili Yaꞌhuud ka minassi weysiite Yaꞌhuud ka Yeedi Waakh cheeke.