Luuka 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Delmaat Yeesso

¹ Goorat maantaas Kaaysarhi Agaasta layadeeh amuri ꞌdooꞌdi ili Rooma tuummane us anti lakeekkaacho iche bahche.

² Waha a maanti oraate ꞌdooꞌd leekkaache geeddi Kiriiniyas gaafanahi Siiriya eheet.

³ Ebba la ilkerengeetti goorat aacchinyetiis fiddiite irte ꞌdee sirgaal magahiis a chiiro.

⁴ Yuussuf ꞌdeerka ilkerengeetti Naasarete boroofenhi Gaalilaaya kajirto kakahe, boroofenhi Yaꞌhuudiya ka, ilkerengeetti Beꞌdeleheem layadeehe goorat karnati Dawuud layadeeh kadesse irte. Yuussuf la jeenteti us hiiy Dawuud iyahe, iche ilkerengeettaas iirte.

⁵ Yuussuf la Maariyati goorat us alkume leeirte, ꞌdee sirgaal magahenyeticho a chiiro. Maariya la chirraas a hulees.

⁶ Ilkerengeetti Beꞌdeleheem kajiraani, Maariya hayohiche massateene, chiisse.

⁷ Maariya la huuratiche ka inankoo desse, darfo kaayyuubte, ꞌdari haanki hoolaat lakachibo goya kareeyisse. Iꞌdi tahe looj ka meel a waayeen.

Ersimo irtaane Yeessohi desse sooargaan

⁸ Ilaas ka la ersimohoo adihicho fooricho ibeen toorribti a jiraan.

⁹ Hertoo Kamur la icho isoobahte, ababnaanki Kamur la il isooyage, intaas iifche. Ersimo dakkhan la weyti naheen.

¹⁰ Iꞌdaasenyi herti Waakh wihi iche ersimo itidah, “Roorro akhabina. Iꞌdi tahe ani Wori Haaggane ꞌdooꞌd tuumman kahamaadicho atin ikeene.

¹¹ Ibeenka goya, ilkerengeet Dawuud ka ꞌDoorribe a atin liidele, ulla a Ki Lasubhe Kamure!

¹² Wihi eti us yahe atin tuso a waha, weeli rucchule darfo lakaayyuube ꞌdar goya jiifo a agartaan.”

¹³ Chirraas on herti Waakhe ittaawenye serey kijirto geeyo dowto Waakh saaꞌddaayi soobahte, herta Waakh isookhayte, wihi iche tidah,

¹⁴ “Waakkhi saraat a lasaaꞌdo. ꞌDooꞌdi harrata ka Waakh kahamaado la nebey a lakakaalo!”

¹⁵ Inkoo herti Waakh nokhatte serey ikorte ka, ersimo wihi icho isiyidaaheen, “Kaha bal ilkerengeetti Beꞌdeleheem a iranni waha yitahye Kamur inno isoocheeke a sooagarro.”

¹⁶ Ersimo ꞌdeerka dowwa on irteene, Maariya ichoow Yuussuf ꞌheleene, weeli ꞌdar goya jiifo la argeen.

¹⁷ Inkoo ersimo weel argeen ka, wori kootte weel miinsane icho daageen ꞌdooꞌd icheekeen.

¹⁸ ꞌDooꞌdi tuummane wihi ersimo yidaaheen daage la, weyti girmeeste.

¹⁹ Iꞌdaasenyi Maariya waha tuumman kasooꞌhesse, weyti kamalatte.

²⁰ Ersimo ichohi wihi icho daageen ichoow wihi icho argeen ka Waakh weynaacho toro saaꞌdo nokhteen. Wihi icho argeen la a iꞌdi kootte herti Waakh itidah on.

Yeesso magah liibahcha

²¹ Inkoo teebatoo kutte ibeenki weel lakhandiyo yitah ka, weel magah liibahche, Yeesso layidah. Magaha la a ki goorat geeddi us uur laka igelin, herti Waakh ibihisse.

Yeesso minki Waakhe buure lageecha

²² Iꞌdi Amurre Muusa liikachiiruu, maanti abarti weel desse daawti isladikho massisse ka, Yuussuf ichoow Maariya ba weel khaateene ilkerengeetti weene Yeerusaleem geecheen, Yeesso Kamur ibahchaanee.

²³ Iꞌdi Amurreti Kamur liikachiiruu, “Inanki huraate tuumman Kamure liibahcha.”

²⁴ Soorriyoti Amurreti Kamur kachiiran bahcheen, waha la a “kutukuurrug lamma burbuure ommos kutukuurrug lamma rurrucchul.”

Siimiyon Waakh saaꞌda

²⁵ Maantaas la makhaabaloo Siimiyon layadeeh ilkerengeetti weene Yeerusaleem a kijira. Ulla a eti fissane Waakh karooro. Ulla yaafohi Issiraayele uur lakhoboocho iche suga. Rubeyti Munyee la usu a leejirte.

²⁶ Rubeyti Munyee la goorat wihi iche usu ibabbakkaahisse a mehe ya, geeddi us Ki Lasubhe koo Kamure iargin ma yamuut.

²⁷ Siimiyon Rubeyti Munyee soowoyte uranti minki Waakhe buure gele. Chirri Yuussuf ichoow Maariya ba Yeesso minki Waakhe buure goya leesoogeleene icho wihi Amurre ꞌdoonto yeelaan ka,

²⁸ Siimiyon weel okhsate, Waakh kooliche wihi us yidah,

²⁹ “Kamuri Miig Tuumman Leh, saggi at iayyissuu, anihi falfataahe toolla an nebey khabo ikhaat.

³⁰ A mehe eti ꞌdoorribo indoheey ka a arge.

³¹ At la usu a tannabissa enenyet tuumman arga.

³² Usu yaafohi Yaꞌhuud ieheynane banay ibabbakkaahicha, ꞌdooꞌdaahki Issiraayel la inkaanyit ikeena.”

³³ Ooyo ichoow abarti weel ba wihi Siimiyon yidahye weel miinsan weyti kagirmeesteen.

³⁴ Siimiyon ꞌdeerka icho iweeste, Maariyati abarti weele la wihi us iyidah, “Weela Waakhe soobahsate, ꞌdee ꞌdooꞌdi Issiraayel gaasoo riba gaasoo la bar tira. Ulla miigti Waakhe enenyet tusa, iꞌdaasenyi ꞌdooꞌdi buure usu a tirrima.

³⁵ Waha a yitaaheene ꞌdee Waakh wihi icho uurassicho goyaka dowtaan soobabbakkaahicha. Ati la bolokkhi rubeytaah ꞌhuno a iꞌdi bolokkhi birlabi af leh.”

³⁶ Maantaas la toro makhaabassoo Waákh íyeyyeeddo magahiche Aanna layadeeh laka a jirta. Iche la a inanti makhaabaloo Faanuwel layadeehe yaafticho la Aacha layadeeh. Iche la weyti araarrowte. Aanna la inkoo ladise, guꞌh teeba on makhaabal leejirte,

³⁷ makhaabaliche buje. ꞌDeerka muunkho eheete ichoowka guꞌh tomon siyyeet ichoow guꞌh affar eleesse. Iche la injire minki Waakhe buure ma kabahine, iꞌdaasenyi ibeen ichoow maalim ba Waakh on wahatta, af hidatta toro weysatta.

³⁸ Iche laka chirraas on timiyye jeenteti Yeessohi dessuu Waakh kalaꞌd ilaabte, toro la ꞌdooꞌdi Waakkhi ꞌdooꞌdi ilkerengeetti weene Yeerusaleem furo sugo laka weel woriis icheekte.

³⁹ Chirri Yuussuf ichoow Maariya ba wihi Amurreti Kamur ꞌdoonto massicheen ka, goobichoki Naasarete boroofenhi Gaalilaaya kajiro inokhteen.

⁴⁰ Yeesso la weynaate toro miigowe, weyti kharaawe, haaggi Waakhe buure la usu a leejire.

Yeesso minki Waakh buure ka ꞌhada

⁴¹ Guꞌhi soomaro tuumman Yuussuf ichoow Maariya ba ilkerengeetti weene Yeerusaleeme irtaane daawti Baasakka gelaan.

⁴² Maanti Yeesso guꞌh tomon ichoow lamma eleele ka, iꞌdi orrangateet u irteene daawti Baasakka geleen.

⁴³ Inkoo daawe massatte ka, anki goob miinsateene Yeessohi inankichee la ilkerengeetti weene Yeerusaleem kaꞌhade. Iꞌdaasenyi Yuussuf ichoow Maariya saggi us iꞌhade ma kasin.

⁴⁴ Kol us ꞌdooꞌdi addan goya sooraaho on koogyahiine maalinki nool sohteen. Yomboka Yeesso ꞌdooꞌdicho ichoow aalassicho goya kayowteen.

⁴⁵ Chirri icho waayeen ka ilkerengeetti weene Yeerusaleem inokhteene intaas ka yowteen.

⁴⁶ Ibeenki seyyahnaatteet inkoo icho Yeerusaleem kakaheen ka, Yeessohi uranti minki Waakhe buure ka ꞌdooꞌdi Yeedi Waakh ꞌdooꞌd abcho goycho fiddiyo, wihi icho essaan dagansati toro walah wowworsati ꞌheleen.

⁴⁷ ꞌDooꞌdi wihi laworsate us soolaabe daage tuumman la kharatiis weyti kagirmeeste.

⁴⁸ Aabbahiis ichoow abartiis la chirri icho argeen ka weyti girmeesteene, abartiis la wihi iche itidah, “Inankaaw a iꞌdoh iꞌda nah iyeessa? Ani ichoow aabbahaah ba weyti nahne geeddi nah kiyowanni on.”

⁴⁹ Yeesso la wihi us worsate, “A iꞌdoh iyowattaan? Saggi an min Aabbaheey ifiddiyo ma garattaan a?”

⁵⁰ Iꞌdaasenyi icho wihi us idowo wihi icho miinsanyahiin ma aban.

⁵¹ Yeesso ꞌdeerka aabbahiis ichoow abartiis raahe ilkerengeetti Naasaret ikhubteene, wihi icho iyidaaheen la weyti raahe. Iꞌdaasenyi abartiis wihi us essi tuumman uur on ilaabatte.

⁵² Yeesso la weynaate toro weyti kharaawe, Waakh ichoow weeli enenyet ba jilhaateen.