Luuka 18 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Mammahti makhaabassi muunkhee ichoow eti ꞌdooꞌd hukkumo

¹ Yeesso toro abattitiis mammahtoo saggi icho kol dakkhan iweestaane toro icho weysi ka igarrahsataan tusso ibahche,

² wihi us iyidah, “Goorat ilkerengeettoo ka, etoo ꞌdooꞌd hukkumo Waakh ikaroorine toro etoo kalday laka ikabaalin a jire.

³ Ilkerengeettaas ka la makhaabassoo muunkhee a jirte. Iche la kol dakkhan eta a itamiite hawwaassatta, ‘Igargaare ayta chiiytankeey miinsan jiti fissan ka ani igooy,’ idowta.

⁴ “Geeddoo dakkhan leeꞌdiiꞌde. Iꞌdaasenyi saahka wihi us uuriis goyaka yidah, ‘Chirri an Waakh ikaroorine an weeli enenyet ikabaalin laka,

⁵ jeenteti makhaabassa geeddi deer sina ikawaarissuu, aytiche jiti fissane igoocha uus iche kol dakkhan isoononnokhanne sina ikawaarinne kansi itiranne!’ ”

⁶ Kamur toro wihi us yidah, “Bal etaas khollokkhane ꞌdooꞌd hukkumo wohoo kaabda.

⁷ Maantaka Waakh ꞌdooꞌdiiski us soobahsate ibeen ichoow maalim ba usu iooyo wihi fissan ma igoocho? Wihi icho ꞌdoonaan dowwa ma iyeelo?

⁸ Wihi an atin icheeko, Waakh ꞌdooꞌdiis wihi fissane igoocha, toro la ma malmalo. Iꞌdaasenyi maanti Ínam Aadam soonokhti ꞌdooꞌdi harrata usuhi usu kakhuufo a sooeleela?”

Mammahti etoo Farissaayo ichoow etoo kooddi goocho

⁹ Yeesso toro ꞌdooꞌdoo saggi us ififfissanyahe iskakhuufo wihi us yeelo ka ꞌdooꞌdi addan ꞌdarraawo mammahta ibahche wihi us yidah,

¹⁰ “ꞌDooꞌdoo lammee minki Waakhe buurenye weysi kiirte. Koo a Farissaayo, ki addan la a etoo kooddi goocho.

¹¹ Ki Farissaayee tolossate, awtiissa on Waakh wahte wihi us yidah, ‘Okkhoow weyti kalaꞌd kisoolaaba ani iꞌdi ꞌdooꞌdi addane hatto lehe ommos iꞌdi ꞌdooꞌdi uskeel kajiro ommos eti makhaabassi tiis ieheynan leeurꞌdo ommos laka iꞌdi eta kooddi goocho menye.

¹² Ani teebatoo goyaka maan lamma af hiida toro la wihi an ꞌhelo tuumman goyaka miili Kamur kisoobahcha.’

¹³ “Iꞌdaasenyi eti kooddi goocho foga tolossate. Ulla serey laka ma yeyine, iꞌdaasenyi kach isguꞌdde, ꞌdee saggi us uskeeliis ka suujoon iargo tuse, wihi us yidah, ‘Okkhoow aniha uskeel leh uur isoonugleyso.’

¹⁴ “Wihi an atin icheeko, inkoo icho goob inokhteen, eti addan menye, etane Waakh ortiis ka eti fissan liiekkaache. A mehe eti tuummane isweynaacho a lanuglaacha, eti isnuglaacho la a laweynaacha.”

Yeesso nyaakhuti rurrucchul iweesta

¹⁵ ꞌDooꞌd la nyaakhuti nahaso nuugo laka a sookhaata, Yeesso ikeena ꞌdee ulla dahano korcha iweesta. Chirri abatti waha agarte ka ꞌdooꞌdaas leejaakhte.

¹⁶ Iꞌdaasenyi Yeesso nyaakhut isiwahe wihi us yidah, “Nyaakhuti rurrucchul ajeyinna ꞌdiicha ani a iyimaatee, a mehe dakhi Waakh a ki ꞌdooꞌdi iꞌdee.

¹⁷ Rume atin icheeka, eti dakhi Waakh saggi weeli rucchul ikakhaatan, koloo kalday laka goobi Waakh ma gelo.”

Eti kamure goobi Waakh a irta?

¹⁸ Etoo Yaꞌhuude ween wihi us Yeesso worsate, “Eti weene haaggan, mehe yeelo ꞌdee jiroti jirtuu imassan ꞌhelo?”

¹⁹ Yeesso wihi us ilaabe, “At a iꞌdoh ani, ‘Eti haaggan,’ ikawahta? Etoo kaldaye haaggan laka ma jiro Waakh on menye.

²⁰ Amurre Muusa a garatta, ‘Makhaabali kaah ieheynan ommos makhaabassi taah ieheynan aleeurꞌdin, weeli enenyet dubunuunu iigaasan, walah ahatin, garti beenaat ayeedin, aabbahaah ichoow abartaah inkaanyit.’  ”

²¹ Et la wihi us yidah, “Wahaas tuumman koo an iraahin mala uuꞌ goorat an weel eheet.”

²² Chirri Yeesso waha daage ka wihi us et iyidah, “At uliba wohoo kaldaye kaankhan. Nyaame wihi at khabto tuumman ororiche, chilimme la miskiin siiche, kamurroonki goobi Waakh ꞌhele, ꞌdee kaale isooraah.”

²³ Chuꞌus waha daage ka, weyti fool ribowe, a mehe eti hoolahi buure khabe eheet.

²⁴ Yeesso la et yeye wihi us yidah, “A ꞌhoossoo geeddohe chiꞌ kamurre dakhi Waakh gesso!

²⁵ Rumanka naffi gaale issi irbi kakhaduutti weyti ꞌhooltahe. Eheet a, ꞌhoossi eti kamurenye dakhi Waakh gelo iche weyti kutta.”

²⁶ ꞌDooꞌdi waha daage la wihi us worsate, “Ayyo ꞌdeerka lariba?”

²⁷ Yeesso wihi us ilaabe, “Wihi weeli enenyet ka koloo kalday laka iitaahan, Waakh ka a geeddi icho yateehiin.”

²⁸ Beetero wihi us yidah, “Nah wihi nah khabne tuumman a kasootabne, ꞌdee ati kiraahna.”

²⁹ Yeesso la wihi us iyidah, “Rume atin icheeka, eti tuummane jeenteti dakhi Waakh u goobiis ichoow makhaabassiis ichoow walaalinyetiis ichoow aabbahiis ichoow abartiis ichoow nyaakhutiis ba kasootabe,

³⁰ jiroti toolla us jiro ka wihi ittaawenye wihi us kasootabe kussane ꞌhela, toro la jiroti yomboot ka, jiroti jirtuu imassanne ꞌhela.”

Yeesso koli seyyahnaatteet omoottiis kaayyeeda

³¹ Yeesso abattitiisti tomon ichoow lammee ꞌdol iwahe wihi us iyidah, “Ilkerengeetti weene Yeerusaleeme ikorra ꞌdee wihi goorat ꞌdooꞌdi Waákh íyeyyeedo chiire Ínam Aadam miinsan tuumman labuuhicha.

³² Usu dahanohi ꞌdooꞌdi Waakh igaranne lagessa. Icho la usu a kachaartaane, leeabaarramaane, hanjuf laka katufaane,

³³ laajja ka doochaane, ꞌdaꞌddaboka yagiisiin. Ibeenki seyyahnaatteet ka toro omoot kasookaha.”

³⁴ Abatti la waha dakkhan kichokoo kalday laka ma garan. Iꞌdi tahe wihi yeeda miinsanyahe icho a lakadagche, icho la wihi us kaayyeedo tuumman foolicho ma khabaan.

Yeesso etoo indo laa samaacha

³⁵ Chirra Yeesso ilkerengeetti Yeeriko isoodowwaate ka, etoo indo laa jit afiissa fiddiya walah daddaaha.

³⁶ Chirri us kowdoti ururi ꞌdulo daage ka wihi yitah enenyet worsate.

³⁷ Wihi icho usu iyidaaheen, “Yeessohi ilkerengeetti Naasarete kuta.”

³⁸ Et la riire, “Yeesso, Inam Dawuud, uur isoonugleyso,” yidah.

³⁹ ꞌDooꞌdi orey raaho usu leejaakhe gammadi iyidah. Iꞌdaasenyi geeddi kootteet laka ꞌdirihiis riire, “Ínam Dawuud, uur isoonugleyso” yidah.

⁴⁰ Yeesso la tolossate, amur bahche et a liikeeno. Chirri us soodowwaate ka Yeesso wihi us worsate,

⁴¹ “Mehe kiyeelo ꞌdoonta?” Wihi us ilaabe, “Kamur anihi toro il argo ꞌdoona.”

⁴² Yeesso la wihi us iyidah, “Indo bihi. Kakhuufnaanki at ikakhuufte a kisamaachee.”

⁴³ Et chirraas on indo ꞌhele, Yeesso raahe usuhi Waakh saaꞌdo. Chirri enenyet tuumman waha arge ka, icho laka Waakh saaꞌdeen.