Luuka 17 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wihi uskeel kaalugꞌdo

¹ Yeesso wihi us abattitiis iyidah, “Wahanyeyyohi enenyet uskeel kalugꞌdo a yamiitiine, iꞌdaasenyi eti icho leeyamiitiin sinati sugto eenna a buure!

² Wihi deefo a usuhi daddaabti buurenye gurnaan lakatumo lukhum lakahido beyti buure goya lakalugꞌdo usuhi ꞌdooꞌdaar tarraantarricho ka.

³ Taba giꞌde isyaakhicha! “Chirri walaalaah uskeeloo kajiro, leejaakh. Chirri us uskeel kasoonokhte la ikakut.

⁴ Chirri us orrahtoo goyaka laka kol teeba uskeel kiyeele, kolal teebaccho ba la uskeelaas kisoocheekte, ‘Uskeeleey a kasoonokhda, iileeraahin,’ kiyidah, uskeelaas ikakut.”

Miigti Waakh lakakhuufo

⁵ Maantoo ergaano wihi iche Kamur itidah, “Kamur, nah gargaare ꞌdee weyti Waakh a kakhuufno.”

⁶ Wihi us ilaabe, “Chiꞌ kakhuufnaanki atin Waakh kakhuuftaan rucchuleel ka geeddi ilinti geeyi dahar yahe, a geeddi atin geeya inta katoollo, ‘Hiiyyay khabtaayi inta kabukkhe beyti buure goya kasoobah,’ itadeehiine, geey la wihi atin itidaaheen yeelo.”

Saggi ilbooyi haaggan ijiro

⁷ “Ayyo goytiin ka ilbooy khaba, chirra ilbooy gos khunnaan kayimiyye ommos adi goya kayimiy, ‘Kaale orrommo golosso’ iyadeeh?

⁸ Wihi us ilbooyaas iyadeeh, ‘Gololeeyki gelebeet kariche, gaaddi hil gesso, igoolli. Inkoo an golossade golosso.’

⁹ Ilbooyaas wihi us yeele ka kalaꞌd liilaabo mele, iꞌdi tahe us hiliissa on buuhiche.

¹⁰ Iꞌdaasu atin laka chirra atin wihi yeela atin liidah yeesseen, wihi atin tadeehiin, ‘Nah a ilbooyyeti wihi iche yeesse ka kalaꞌd isugin. A mehe nah hilaanya on buuhinne.’ ”

Yeesso reeroo tomone samaacha

¹¹ Yeesso anki ilkerengeetti weene Yeerusaleem fool siiche, sohtaayi boroofenhi Saamariya ichoow boroofenhi Gaalilaaya dahcho eleele.

¹² Chuꞌus gooboo hagga eleele ka, reeroo tomonenye buꞌdatoo sar kasoobahte or kasoodowe. ꞌDooꞌda la foga tolossate,

¹³ riire, “Yeesso! Eti ween! Uur nah isoonugleyso!” yidaaheen.

¹⁴ Inkoo us icho arge ka, wihi us iyidah, “Nyaama kuhaaniyyo iirda istusa.” Sohtaani icho dakkhamba samaateen.

¹⁵ Kichokoo chuꞌus saggi us isamaate arge ka, usuhi hooyi buure ka Waakh saaꞌdo soonokhte.

¹⁶ Yeesso hagga ka jilbo il kaguꞌdde kalaꞌd ilaabe. Eta la ili Saamariya kayimiy.

¹⁷ Yeesso wihi us worsate, “ꞌDooꞌdi kootte an samaache et tomon menya? Et saagaassi addan meete?

¹⁸ Eta yeelan kalday on menye et addane soonokhte Waakh kooliche mele?”

¹⁹ Yeesso la wihi us etaas iyidah, “Kah iro, kakhuufnaanki at ikakhuufte a kiribee.”

Saggi dakhi goobi Waakh iyamiit

²⁰ Maantoo Farissaayo maanti dakhi Waakh yamiite Yeesso worsatte. Yeesso wihi us ilaabe, “Emeetti dakhi Waakh ti indo lakaargo mee.

²¹ Et keley argo, ‘Yeya kalla soosohta,’ ommos, ‘Kuulla soosohta’ yadeeh mele. Iꞌdi tahe dakhi Waakh goytiinna kajira.”

²² Wihi us abattitiis iyidah, “Ibeen a yamiit ki atin Ínam Aadamhi soonokhti harra dakhti imoontaan argin ꞌdoontaan, iꞌdaasenyi argin ma tabuuꞌdiin.

²³ ꞌDooꞌd mehe atin iyadeeh ya, ‘Ínam Aadam kuulla,’ ommos ‘Ínam Aadam kalla.’ Icho akaallooꞌdina.

²⁴ Iꞌdi tahe Ínam Aadam maanti us soonokhti iꞌdi ankhadhi ankhado sereyta daayan guꞌddo ichoowka anki ꞌdiri ikabaho yateeh.

²⁵ Iꞌdaasenyi koloo Ínam Aadam sinati buurenye kawaarta, ꞌdooꞌdi weyꞌda la usu ꞌdiiꞌda.

²⁶ “Iꞌdi goorat ibeenne Noowa eheet, iche ibeenki Ínam Aadam yamiit laka yateeh.

²⁷ Maantaas la ꞌdooꞌd saggi orrankateet on sukuuku igele, minan laka laaddiste ichoowka Noowa koobanhi buure goya gele. Chirraas on ꞌduley ichohi addan tuumman baabiiche.

²⁸ “Harra toro iꞌdi maanti goorat Loot jire tateeh. ꞌDooꞌd saggi orrankateet on sukuuku igele, walah ororsata, walah gatta, gaasoo ilmo il kachiba, gaasoo laka minassicho dista.

²⁹ Iꞌdaasenyi maanti Loot ilkerengeetti Soodom kabahe Waakh serey ka ꞌdab ichoow dagahti bolokhto serey kakeene ꞌdooꞌd tuumman bakkiche.

³⁰ “Maanti Ínam Aadam enenyet liisoobabbakkaahicho laka iꞌda on tateeh.

³¹ Maantaas et min sartiis fuulo, meehiis la min goya kijiro yego meehiis soobahsati mele. Saggaas on u, et gos goya kijiro nokhti wohoo sookhaatti mele.

³² Bal wihi makhaabál Loot kayitah kasooꞌhela!

³³ Eti tuummane jirotiis khucchin ꞌdoono, jirotiisti rummaat a waaya, eti tuummane jirotiis waayo la jirotiisti rummaat a riba.

³⁴ Wihi an atin icheeko, ibeenkaas et lamma siriirtoo kalday iskaleeuꞌdurta, koo lakhaata, ki addan la lakataba.

³⁵ Deyyehotoo lammee la inchaba isleetunta, too lakhaata ti addan la lakataba.”

³⁷ Abatti la wihi iche worsatte, “Kamur waha intoh kayateehiin?” Wihi us ilaabe, “Inti wohoo kayumaateen, intaase raꞌd kawara.”