Luuka 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeed ortiissa

¹ ꞌDeyoofiloow, ꞌdooꞌdi buure a tirriinsate, wihi goyteen ka yitah chiire.

² Wihi icho chiireen a wihi ꞌdooꞌdi uuꞌ maanti kolooraate waha yitaaheen arge nah isoocheeke. Icho la hili Waakhe icho haaggicheen, a ki wori Waakh ꞌdooꞌd liicheeko.

³ Toollaka ani rubeyteey walah tuumman uuꞌ maanti waha yitaaheen mujjum goya a yeye, ichoowka mali an waha saggi icho iyitaaheen ikaasoochiiro gooche.

⁴ An iꞌda a yeele ꞌdee runti wihi liiabche ubta.

Herti Waakh delmaat Yoohanahi Enenyet Baattissiyo cheekta

⁵ Maanti ꞌHerood karnati ili Yaꞌhuudiya eheet, etoo kuhaaneenye Sakkariiya layadeeh a jire. Sakkariiya la a ki rabittoo kuhaaniyyoote Abiija layadeeh. Arantiis la Eliissabeet iche layadeehe, iche laka a ti gooboo ullaka kuhaaneenye Haruun layadeeh.

⁶ Lammacho ba la ꞌdooꞌdi Waakh ortiis ka fiffissane eheete, raahnaanki amurreti Kamur ichoow wihi Kamur enenyet kaꞌdoono laraaho ka wohoo rucchul laka ma lakacheekan.

⁷ Iꞌdaasenyi nyaakhut icho khabeen mele, iꞌdi tahe Eliissabeet a mahane, lammacho la toro a araarroween.

⁸ Maantoo Sakkariiya hiliiski kuhaani iche minki Waakhe buure ka haaggicha, a mehe koli rabitti kuhaaniyyohichooda.

⁹ Kura guꞌddeene, hugunki kuhaaniyyoot ka Sakkariiya lasoobahche, eti minki Waakhe buure gelo Kamur uyuugge igubo yitah.

¹⁰ Chirri sahaꞌddi uyuugge lagubo titah ka, ꞌdooꞌdi Waakh wahti tuumman khar ka kulme Waakhe wahtaa.

¹¹ Hertoo Kamur Sakkariiya isoobahte, gaꞌdaari uyuugge lakagubo miigtiis tolossatte.

¹² Sakkariiya uus arge ka nahe, weyti roorro gesse.

¹³ Iꞌdaasenyi herta Waakh wihi iche itidah, “Sakkariiya roorro akhabin. Waakh weysihaah a daage, makhaabassaah la inankoo dessa. Maanti us desse la magahiis Yoohana daha.

¹⁴ Maanti us desse la, ati weyti hamaadda ꞌdooꞌdi buure la delmaattiis ka a kileehamaada!

¹⁵ Iꞌdi tahe us Waakh ortiis ka eti weene yateeh. Ulla uus farsotoo rucchule sabiib laka af kaꞌdaarin. Uꞌ dessi la Rubeyti Munyee usu a buuhissa.

¹⁶ Ulla ꞌdooꞌdi buurenye Issiraayele anki Kamuri Waakkhichee isoolaaba.

¹⁷ Ulla miig ichoow rubeyti eti goorat Waákh íyeyyeedo Eliiya layadeeh khabe iche khaba, Kamúr ortiis sohta. Ulla ooyenye ichoow nyaakhutichooda isineybicha, ꞌdooꞌdi yeed idaagin kharati ꞌdooꞌdi fiffissan ilaaba, ꞌdee ꞌdooꞌd emeetti Kamur itannabicha.”

¹⁸ Sakkariiya wihi us herti Waakh worsate, “Ani ichoow makhaabasseey ba a araarrowne, mehe tusa ꞌdee waha runticho igardi?”

¹⁹ Herti Waakh wihi iche ilaabte, “Ani a Gaabiriyel. An Waakh ortiissa toolla, Waakkhane isooergate ꞌdee wora haaggane an kikeene kicheeka.

²⁰ Jeenteti at yeedeey irummeysan u, at a gammadissa toro yeyyeed ma tabuuꞌde ichoowka maanti mujjumenye yeedeey larummaacho.”

²¹ Geeddaaas tuumman la ꞌdooꞌd Sakkariiya khar ka a suga. Icho la Sakkariiyahi geeddi deer minki Waakhe buure goya kamalmale kamasseen.

²² Chirri us minki Waakhe buure goya kasoobaho, icho leeyyeedin ma yabuuꞌd. ꞌDooꞌd saggi us minki Waakhe buure goyaka fooltabcho iarge kase. A mehe enenyet dahano kaleeyyeede, iꞌdaasenyi yeedin ma yabuuꞌd.

²³ Chirri koliiski hili minki Waakh massate ka goobiis irte.

²⁴ Saahka makhaabassiisti Eliissabeet layadeeh uurowte, hay chan la min goya ma kabihin.

²⁵ Iche la wihi iche tidah, “Kamure ani waha iyeele. Ibeenneta a igargaare, heebti an baꞌh goya kakhabo a ikabahche.”

Herti Waakh delmaat Yeesso cheekta

²⁶ Inkoo Eliissabeet uuriche hay lih eleele ka, Waakh hertoo Waakhe Gaabiriyel layadeeh ilkerengeettoo Naasaret layadeehe boroofenhi Gaalilaaya kajirto iergate.

²⁷ Herta Waakh la farniinki weeloo Maariya layadeehe etoo Yuussuf layadeeh alkume iche khabta. Yuussuf la hiiy karnati Dawuud layadeehe kayimiy.

²⁸ Herta Waakh Maariya isoobahte wihi iche itidah, “Nebeytaah ma furatti, atihi Kamur weyti kijilhaate. Kamur a kileejira!”

²⁹ Yeedassa herta Waakh elatti weyti Maariya malalicheene, wihi liidowo aficho waayte.

³⁰ Iꞌdaasenyi herti Waakh wihi iche itidah, “Maariya roorro akhabin iꞌdi tahe Waakh a kijilhaatee.

³¹ At a uurowta, inankoo dessa, magahi at ibihisso la a Yeesso.

³² Ulla eti weene yateehe, toro la Weeli Waakkhi Weyti Ween iche layadeeh. Kamuri Waakhe komborti antoote too aacchihiiski Dawuud layadeehe siicha.

³³ Ulla nyaakhut nyaakhut Yaakoobo jirtuu tuummamba dakhta, dakhiis la yombuu ma massati!”

³⁴ Maariya la wihi iche herti Waakh worsatte, “An mejel ma gardi gone, waha saggoh iyateehiin?”

³⁵ Herti Waakh wihi iche ilaabte, “Rubeyti Munyee a kisooyagta, miigti Waakkhi Weyti Ween iꞌdi oosimeet u koogoogta. ꞌDeerka weela munyeenye dessi Weeli Waakhe layadeeh.

³⁶ Eliissabeetti uuraahe laka araarri goyaka weel a ꞌhessa. Ichehi goorat a mahan liidah toolla uuri hay lihe khabta.

³⁷ Iꞌdi tahe wohoo rucchule Waakh kamiigenye us iubaaꞌdan ma jiraan.”

³⁸ Maariya la wihi iche ilaabte, “An a falfati Kamure, wihi at tidah a yitaaheen giꞌde.” Herti Waakh Maariya katabte.

Maariya Eliissabeet isulhaassa

³⁹ Saahka Maariya tannabatte dowwa ilkerengeettoo ili Yuuda kuro sarche kajirto iratte.

⁴⁰ Min Sakkariiya gesse Eliissabeet bariitisse.

⁴¹ Chirri iche bariito Maariya daagte ka, weeli Eliissabeet uur kakhabto yuutte, Rubeyti Munyee Eliissabeet buuhisse.

⁴² Eliissabeet riirte wihi iche tidah, “At rumanka deyyeho tuumman goycheka a lakimaale, toro la weeli at soodesso laka a liimaale!

⁴³ An a ayyo waha liiyeela ichoowka abar Kamureey laka ani itamiit?

⁴⁴ Uus an bariitotaah daage, weeli uureey goya kajiro laka weyti hamaade, birgiꞌde.

⁴⁵ Waakh ba atihi wihi Kamur kiyidahye sooyateeh rummeysatte kimaala!”

Maariya Waakh saaꞌdda

⁴⁶ Maariya la wihi iche tidah, “An weyti Kamur saaꞌda

⁴⁷ Rubeyteey la weyti Waakkheeyki ꞌDoorribee kahamaadda.

⁴⁸ Iꞌdi tahe anihi falfatiisenye nugul a ikasooꞌhele! Uuꞌ maalinka kholoyyo tuumman ani eti Waakh imaale iyadeehiin.

⁴⁹ Iꞌdi tahe Waakkhi Miig Leh wihi buurenye iyeele, magahiis la a munya.

⁵⁰ Kamur la kholoyyohi soomaro tuumman ka, ꞌdooꞌdi usu karooro uure inugleesta.

⁵¹ Dahantiisti miig leh ka wihi noole yeele. ꞌDooꞌdi uuricho goyaka eylajo seleye fide.

⁵² Kamur karnatohi wewween komborohichoki antoot a kasookhube, iꞌdaasenyi ꞌdooꞌdi isnuglaacho a okkhiche.

⁵³ ꞌDooꞌdi raarahte wihi hahhaaggan ka dargiche, iꞌdaasenyi kamurre dahano marah rihe.

⁵⁴ Waakh Falfatiisti yaafohi Issiraayel a gargaare, uur inugleeste.

⁵⁵ Aburaaham ichoow nyaakhut nyaakhutiis iꞌdi us aacchinyeteen iyidah u ma kadabine, uur isoonugleeste.”

⁵⁶ Maariya geeddi hay seyyah Eliissabeet leefiddiite, saahka goob inokhatte.

Eliissabeet inankoo dessa

⁵⁷ Maanti Eliissabeet hayohiche massateen ka, inankoo desse.

⁵⁸ Ollokkiche ichoow ꞌdooꞌdi uurichee saggi Kamur weyti uur ikasoonugleeste daage, leehamaade.

⁵⁹ Inkoo weel teebatoo barye ka, ꞌdooꞌd khandihi weel yimiy. Icho la goorat magah aabbahiiski Sakkariiya layadeehe ibihin ꞌdoonaane,

⁶⁰ iꞌdaasenyi abartiis, “Mele, magahiis Yoohana layadeeh” tidah.

⁶¹ Icho la wihi icho Eliissabeet iyidaaheen, “Etoo kaldaye kiinenye magahaas khabo mele!”

⁶² ꞌDeerka aabbahiis dahano ka leeyyeedeene, magahi us weel ibahcho worsateen.

⁶³ Sakkariiya la reenkoo lakachiirti daahe, wihi us chiire, “Magahiis a Yoohana.” ꞌDooꞌd tuumman la girmeeste!

⁶⁴ Chirraas on Sakkariiya toro afi goorat us waaye bahche, yeyyeede Waakh saaꞌde.

⁶⁵ ꞌDooꞌdi intaas kijiro tuumman roorro gesse, ili Yaꞌhuudiya kuro khabo tuumman ka, enenyet wahanyeyyohane kaayyeeda.

⁶⁶ Eti tuummane yeeda daage la mal gele, wihi islaworsate, “Weela ꞌdeerka berri mehe yateeh?” Wihi tahe, saggi miigti Kamur weela ileejirto iche laarga.

Sakkariiya Waakh saaꞌda

⁶⁷ Sakkariiyahi aabba Yoohanee Rubeyti Munyee buuhisse wori Waakh kaayyeede wihi us yidah,

⁶⁸ “Kamuri Waakkhi Issiraayele a lasaaꞌdo! Iꞌdi tahe us ꞌdooꞌdiis a soofure.

⁶⁹ Kamur ꞌDoorribehi miig khabo a inno siiche, ulla hiiy falfatiisti Dawuud layadeeh kayimiy.

⁷⁰ Iꞌdi goorat us ꞌdooꞌdiiski munyayyeenye Waákh íyeyyeedo ka cheekuu,

⁷¹ us chiiyteen a inno kajeycha, ꞌdooꞌdi inno ꞌdiiꞌdo tuumman la ma inno kamiigowo.

⁷² Toro Kamur ayyintiisti munyeenye us gooche, us aacchinyeteen uur isoonugleesti ma kadabo.

⁷³ Ayyintaas la a ayyinti Kamur aacchiheenki Aburaaham layadeeh igooche,

⁷⁴ saggi us chiiyteen inno ikaribo icheeke. Toro la a inno gargaara roorro laan hiliis haagginna,

⁷⁵ ꞌdee geeddi inno jirro tuumman ꞌdooꞌdi munyeenye toro fiffissan ortiis ka nateeh.

⁷⁶ Inankaaw, at la eti Waákkhi Weyti Ween íyeyyeedo lakiyadeeh. At la Kamur ortiissa sohatta jit iharta,

⁷⁷ uskeelichoki liikakuto ka, ꞌdooꞌdiis saggi Waakh iribo abissa.

⁷⁸ A mehe, Waakkheen uure nugulyahe toro a haagganyahe. Kamureen ꞌdooꞌdiis a riba, banayhiis la iꞌdi orrahti baryo sookortuu inno siicha,

⁷⁹ ꞌdee ꞌdooꞌdi mugꞌdihi omooteet goya kajiro serey ka banay sootusa, inno yaakhicha, jiti nebeyeet inno gata.”

⁸⁰ Yoohana la weynaate, Rubeyti Munyee ka miigowe. Ulla hidaad on fiddiye ichoowka ibeenki us ꞌdooꞌdi Issiraayel isoobaho yitah.