Kolossaay 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Bariitoti Baawulo urur Kiriisto ierge

¹ Khadaaba eti atin isoochiiro a ani, Baawulohi Waakh saggi us iꞌdoono on u ergaano Yeesso Kiriisto ikayeesse. Timootihi koo Kiriistee laka a iskhabna.

² ꞌDooꞌdi an isoochiiro la, a atinhi munyeenye, Kiriisto rummeysatteene lakakhuufo, ilkerengeetti Kolossaay taalliine, atin ichoow Kiriisto ba wohoo kalday tahiin. Waakkhi Aabbaheene ba atin imaala nebey atin kakaala.

Baawulo urur Kiriisto Waakh iwaha

³ Nah kol tuumman chirri nah Waakh atin isoowahno, Waakkhi Aabba Yeesso Kiriistohi Kamureene kalaꞌd a ilaabna.

⁴ Wihi nah Waakh kalaꞌd ikalaabno la, a jeenteti nah saggi atin Yeesso Kiriisto ikakhuuftaan idaagne toro la saggi atin ꞌdooꞌdi Waakh tuumman iꞌdoontaan nah idaagne.

⁵ Wihi atin iꞌda kayeesseen la, a jeenteti atin saggi Waakh goobiis ka haaggi nool atin iabbire, atin ikhajjeessaan. Haagga Waakh la orey on daagteen, maanti atin Wori Haaggane rummaat daagteen.

⁶ Wora Haaggan a atin iyimiyye, ꞌdooꞌdi ittaawenye harra tuumman laka a kataaꞌha toro gurnaan dela. Waha la a wihi goytiin ka laka yitah, uus maanti kolooraat atin Wora rummaat daagteene, toro haaggi Waakhe buure runtiis tuum abatteen.

⁷ Wora rummaat eti atin abche, a Ebaabarahi nah weyti ꞌdoonno ilbooy ka nah walhicho. Us a eti meesseenyo ka hil Kiriisto ka lakakhuufo.

⁸ Toro la us saggi atin Rubeyti Munyee ka ꞌdooꞌdi Waakh tuumman iꞌdoontaan a cheeke.

⁹ Jeentetaas u, uus nah woriin ꞌhelle, koloo kalday laka Waakkhi nah atin isoowahno ma ꞌdiin. Wihi nah Waakh daahno la, a usuhi tuum khara ichoow abannaanki Rubeyti Munyee kayamiit tuumman ka wihi us ꞌdoono atin ibuuhicho.

¹⁰ Waakhe atin iwahna, ꞌdee jiroti Kamur inkaanyitto toro kahamaadisso jirtaan. Iꞌda ka sagag tuumman ka enenyet haag a iyeessaane, abannaanki atin Waakh abattaan la a kakhayma.

¹¹ Toro la Waakh ba miigtiisti miig tuumman kussan ka atin miigoocha, ꞌdee walahbaaw atin isoobahe ka ꞌdooꞌdi samacchaare tateehiine, garrahsattaan. Toro la hamaadi buure ka,

¹² Waakkhi Aabbaheene kalaꞌd ilaabtaan. A mehe us atin ꞌdooꞌdi Waakhe goobi Waakhe ababo dalho leedalhin yabuuꞌd a atin kayeele.

¹³ Iꞌdi tahe us miigti mugꞌdi a inno kasoofure, dakhi weeliiski us ꞌdoono goya inno keene.

¹⁴ Weeliis diiggiis ka a inno gatte inno soofure, uskeeleen tuumman inno ikakute.

Kiriisto usu walah tuumman iween

¹⁵ Kiriisto a fooli Waakkhi liiargin, a huraati wihi lasoouume tuumman iween.

¹⁶ Iꞌdi tahe usu on ka Waakh walah dakkhan a soouume. Wihi serey kajiro ichoow wihi harra kajiro ichoow wihi laargo ichoow wihi liiargine iꞌdi maanta komborohi antoot ommos wihi miig khabo ommos wihi anto leh ommos wihi walah tuumman dakhti tuumman usu soouume. Kiriisto ka walah tuumman a lasoouume, toro la usu liisoouume.

¹⁷ Us geeddi walah tuumman liisoouumin laka a jire. Usu walah tuumman iskakhuccha.

¹⁸ Toro la usu matakki sartiisenye, sartiis la a ururiissa. Us a uumaccho ichoow eti oraate ꞌdooꞌdi tuume goyaka omoot kasookahe. Iꞌda ka usu on walah tuumman iween.

¹⁹ Iꞌdi tahe wihi Waakh kahamaadiche, a buuhiiski tuum weeliis goya fiddiyo,

²⁰ toro Kiriisto ka walah tuumman ankiis a keene. Diig Kiriistoki massalaaba kakhubte ka, Waakh walah tuumman a ineybe, wihi serey kijiro ommos wihi harra kajiro eheetteey ka ba.

²¹ Atin goorat ꞌhor Waakh foga ileejirteene, maliin ka chiiytiissa eheet jeenteti atin uskeel iyeesseen u.

²² Iꞌdaasenyi omootti sar Kiriisto tumuy ka, Waakh ankiissa atin keene, atin munyaache ortiis ka ꞌdooꞌdi eloo rucchul laka ikhabine wohoo rucchul laka liikacheekan atin kayeele.

²³ Iꞌdaasenyi, taba wori rummaat kakhuufa, iꞌdi wihi isesseehin u jurkhicha. Khajjeeli Wori Waakhe Haaggan akaguurina. Wora atin daagteen a ki ꞌdooꞌdi harra tuumman liicheeke. Anna a Baawulo, a falfati Wora Haaggan cheekto.

Baawulo iroonoti urur Kiriisto hol idowa

²⁴ Toolla sinayyohi an iroonotiin u ꞌhelo ka a hamaada, toro sarteey ka wihi sinayyo Kiriisto kaankhan indigirti sartiis u a buuhicha. Sarta la a urur Kiriisto.

²⁵ Hili Waakh indigirtiin u dahanteey soogesse ichoow urura an ifalo a israahaan. Hila la a ki an tuum Yeedi Waakh cheeko.

²⁶ Waha la uuꞌ lasoobahe ichoow kholoyyo tuumman ka a wihi dagsane, iꞌdaasenyi toolla ꞌdooꞌdi Waakh a liisoobabbakkaahiche.

²⁷ Wihi Waakh ꞌdooꞌdiiskaas igooche, a waha goorat haaggane dagsane yaafohi Yaꞌhuud ieheynan liisoobabbakkaahicho ꞌdooꞌdiis abti. Waha la a Kiriistohi atin ichoow usu ba wohoo kalday tahiine, ꞌdee weynaanti Kamure inno khajjeello isleegisanno.

²⁸ Nah wori Kiriisto miinsane cheekna, ebba la kharateenyo tuumman ka tootoonna, walah abinna, ꞌdee ichohi icho ichoow Kiriisto wohoo kalday yitahye iiꞌdowe Waakh ikeenna.

²⁹ Jeenteti waha u la, miigti Kiriisto isiicho ka an weyti hol dowa. Miigtiis la weyti imiigoossa.