Ibiraaniya 9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Saggi harrata ka ichoow goobi Waakh ka Waakh liiwahti

¹ Ayyinti oraate Waakh gooche ka wahanyeyyohi laꞌdoono Waakh lakawahti a jireene, toro la meessi lagane harratane Waakh lakawahti a jirte.

² Eemati Waakhe ladise, meel lamma seley liigooche. Goonanki oraat la Meessi Lagan iche layadeeh. Meessa la reenki taa lakorcho ichoow kombortoo ballaaddane makaateyyohi kuhaaniyyo Waakh ibahcheen fuuleen, iche kijirte.

³ Dafarti yobbeenye eema seley goosso a jirte, goonanki lammaatteet mehe layadeeh ya, Meessi Weyti Lagan.

⁴ Inta la gaꞌdaari ꞌdahabe uyuugge lakagubo ichoow saanduukhi ayyinti raagane Waakh gooche ꞌdahab kaankubanyahe iche kijire. Saanduukha la wihi kijire, a khulaankoo ꞌdahabe gololoo manna layadeeh kijiro, ichoow wul Haruunti seeb kasoobahe, ichoow dagahtoo lammeenye babballaaddane amurreti ayyinti Waakh gooche kachiirantahe.

⁵ Saanduukh sartiis la walah lamma lasoouume barbarre khabo saggi Waakh intaas ikajiro tusso, iche fuusse. Barbarreticho la inti Waakh enenyet uskeel ikakuto, iche ogoogte. Iꞌdaasenyi toolla wahanyeyyoha tuumman kaayyeedin ma nabuuꞌd.

⁶ Chirri waha dakkhan ka latannabte ka kuhaaniyyo eema goyaka goonanki oraate geleene, kol dakkhan hilichoki Waakh haaggicheen.

⁷ Iꞌdaasenyi goonanki goyaatteet kuhaanihi weyti ween kaldaye gele, ulla guꞌh ka maantoo kaldaye gele. Ulla diiggi jeenteti uskeeliis ichoow uskeeli ꞌdooꞌdi addan garawwaayyo ka yeele us bahcho, iche leegele.

⁸ Rubeyti Munyee la waha tuumman ka wihi iche mujjum inno abisso a mehe ya, jiti Meessi Weyti Lagan lakagelo, uliba ma lasoofurin geeddi eemati oraate harrata on tolosso.

⁹ Waha dakkhane ayyinti oraat miinsan weyꞌda mehe itoollaan ya, siimo ichoow naffi Waakh liisoorriyoocho, rubeyti etane uskeel ikacheekan dikhin ma yabuuꞌdiin.

¹⁰ Ayyinti oraat wihi iche miinsantahe, a daawohi wihi layaham ichoow wihi ladamo ichoow enenyeti isdikho on. Wahanyeyyoha enenyet lakaꞌdoono la sarti kharaat kaldaye miinsanyahiin. Waha la a laraaha one ichoowka Waakh walah tuumman husubnaacha.

Kiriisto usu soorriyoti massane

¹¹ Iꞌdaasenyi Kiriisto kuhaanihi weyti weene, wihi haaggane jiroteen ka inno isoobabbaho a yitah. Ulla eemati goobi Waakhe weyti deefto saggi liiꞌdoono liihaaggiche, iche gele. Eemata la ti enenyet dise menye, ommos ti harrati lasoouume mee.

¹² Yeesso Kiriisto la koloo kalday on Meessi Weyti Lagan ikute. Ulla maanti us meessaas gele, diiggi waharoot ommos diiggi maaroot ma khaatine, Waakh ma ibihin. Iꞌdaasenyi us diiggiissa bahche, jirtuu tuumman inno ribe.

¹³ Ayyinti oraat ka, kuhaani diiggi waharoot ichoow ki heerassi looyyo lasoorriyooche ichoow bombeyi urhaassi looyyo lagube ꞌdooꞌdi uskeel khabo kiirdifta. Daawohaas sartichooda dikhaane, ꞌdee biꞌdir kabahchaan.

¹⁴ Iꞌdaasenyi Kiriisto miigti Rubeyti Waakhe jirtuu tuumman jirto ka soorriyoti miꞌdabenye Waakh isibahcho yitah. Geeddoo meheenye ꞌdeerka diig Kiriisto rubeyoheenki haag ichoow suujoon seley saaho uskeeli inno yeello omoot inno iwoyo kadikha, ꞌdee Waakkhi jiro ihilla.

¹⁵ Jeentetuu Kiriisto ayyinti husube Waakh gooche ka dahgele yitah. Omoottiis ka enenyet uskeeli maanti us ayyinti oraat raahe gele a kasoogate kasoofure. Eti tuummane Waakh wahe, ayyinti armaanjireene usu muꞌdane Waakh igooche ꞌhela.

¹⁶ Maanti etoo yumuy, chirri saggi liidalho islakadaage, walah etoo kalday laka lasiicho mele sammata koloo saggi eti ladalho rumanka iyumuy liitusin.

¹⁷ A mehe isdaagintaas walah iche tahe mele, geeddi eti isdaagintaas leh on jiro. Hoola maanti etaas yumuy on ladalha.

¹⁸ Saggaas on u ayyinti oraate Waakh gooche ka laka, diiggi soorriyoyyoot laantiis walah lasookhabte mele.

¹⁹ Muusa wihi tuummane amurre Muusa goya lakeelo, iche enenyet tuumman icheeke. ꞌDeerka diiggi maaroot ichoow ki waharoot ba khaate, bicche kakhaye, khadaabi yuubane amurre Muusa kachiirantahe ichoow enenyet ba kiirdifte. Usu wahaas gumotoo tinti iiyyaate guꞌduuꞌdan lakahide, iche kayeele.

²⁰ Muusa la wihi us yidah, “Diigga a ki amuri Waakh ayyintiis ka gooche atin raahtaan miigoocho.”

²¹ Saggaas on u Muusa eemati Waakh lakawahti laleegugguuro, ichoow wahanyeyyohi Waakh lakawahti tuumman, diig kiirdifte.

²² Rumanka amurre Muusa ka la, walah buurticho diig on dikha. Sammata diig ikhuban la, Waakh enenyet uskeel ma ikakuto.

Kiriisto a soorriyoti weyti deefto

²³ Waha inno kayeyyeene a iyookkoti wihi goobi Waakh kijiro gone, saggaase liidikha. Iꞌdaasenyi wihi goobi Waakh kijiro wihi dikho, a soorriyoyyohi wihi harrata kussan.

²⁴ Iꞌdi tahe Kiriisto Meessi Lagane weeli enenyet haaggiche iyookkoti ti rummaate ma gelin. Usu goobi Waakh rubeytiissa gele. Ulla toolla Waakh ortiissa kajira, inno iyeyyeeda.

²⁵ Toro la Kiriisto iꞌdi kuhaanihi weyti weene yaafohi Yaꞌhuud ma eheynan. Kuhaaniha guꞌh ka, maalinki kaldaye us Meessi Weyti Lagan gelo, diiggi hoolaate leegela. Iꞌdaasenyi Kiriisto goobi Waakh saggaas ma igeline, ꞌdee kolassi ittaawe ma issoorriyoon.

²⁶ Chirri kootte us iꞌdaas yeele la, geeddi buurenye sina lakawaaricha, uus goorat harra lasoouume. Iꞌdaasenyi toolla inno jiro ibeenneticheti yomboot kijiro la, usu maantoo kalday on yimiyye, soorriyoti jirtuu liikanokhan yitahye, ꞌdee miigti uskeel jirtuu tuumman labahcha.

²⁷ Wihi Waakh gooche a mehe ya, weeli enenyet tuumman ebba koloo on yamuute, ꞌdee Waakh hukkuma.

²⁸ Saggaas on u Kiriisto laka koloo on lasoorriyooche, ꞌdee uskeeli ꞌdooꞌdi buure bahcha. Ulla maanti lammaatteete us soonokhti, uskeeli us toro bahcho ma iyamiite, iꞌdaasenyi ꞌdooꞌdi usu weyti sugo iche yamiite, ribnaan ikeena.