Ibiraaniya 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Kiriisto a kuhaanihi weyti weene ayyinti husube toro deefto keeno

¹ Ayti nah elanni talla, rumanka kuhaanihi weyti weene goobi Waakh ka komborti antoote Waakkhi Weyti Ween ankicheki miigeet ka meessi lakiinkaanyito fiddiyo a khabna.

² Ulla hili kuhaanihi weene Meessi Lagan ka Waakh ikahila. Meessa la a eemati rummaate Waakh lakawahti, weeli enenyet menye, Kamuri Waakhe rubeytiis dise.

³ Kuhaanihi weyti ween tuumman hiliis a ki us siimo ichoow soorriyoyyo Waakh ibahcho. ꞌDeerka kuhaaniheenki weyti ween laka a imasse chirri us Waakh wohoo ibahcho.

⁴ Chirri kootte Kiriisto harrata kijiro, kuhaani ma yateeh gon. A mehe kuhaaniyyohi saggi amurre Muusa iꞌdoontuu siimohi Waakh liibahcho bahcho a jiraan.

⁵ Meessi lagane icho hili Waakh kahaaggichaan a oosim ichoow iyookkoti wihi goobi Waakh kajiro. Jeentetane maanti Muusa eemati Waakh lakawahti disin leheet, Waakh itootooche, wihi us iyidah, “Tabe, wihi at haaggisso tuumman ichoow iyookkoti goorat hali Sinnaay sartiis ka an kituse a israaheen.”

⁶ Iꞌdaasenyi Yeesso hili ki kuhaaniyyoha weyti kussane lasiiche. A mehe ayyinti husube Waakh gooche us dahgele yahe, ayyinti oraate amurre Muusa keente weyti kussantahe. Waha la a jeenteti iche ayyinti weyti deefto iraahto.

⁷ A mehe chirri kootte ayyintaas oraate Waakh gooche eloo ikhabin ayyintoo addan ma layowti gon.

⁸ Iꞌdaasenyi Waakh rubeytiis maanti us iꞌda yidah, aacchinyeteen uskeele kaarge, “Ibeen a yamiit, iche Kamur essa, ibeenki an ayyintoo husub ꞌdooꞌdi Issiraayel ichoow ꞌdooꞌdi Yuuda igoocho.

⁹ Ayyintaas la iꞌdi ti goorat an gooche mee. Maantaas an aacchinyeticho dahane sookhabde ꞌdee ili Miissiri kasoobahcha. Iꞌdi tahe icho ayyinteeytaas ma khucchinne, an la icho adah kakhabde, iche Kamur essa.

¹⁰ Inkoo ibeennetaas kutte ayyinteeyti husube an ꞌdooꞌdi Issiraayel igoocho talla, iche Kamur essa. Amurreteey malichooda goya gessa, ꞌdee kamassaan, uurassicho goya kachiira, ꞌdee raahaan. An Waakkhichooda ateehe, icho la ꞌdooꞌdaaya yateehiin.

¹¹ Et kola ollokkiis walah abcho, ommos walaaliis, ‘Kamur abo,’ idowo mele. Iꞌdi tahe icho tuumman, ki ween ichoow ki nugul ba a igartaanee.

¹² An la uskeelicho a ikakuta, suujoonkicho la jirtuu toro ma kasooꞌhelo.”

¹³ Chirri Waakh ayyinti us gooche, “ti husub” yadeeh, waha mehe tusaan ya ti goorat oraat a raagte gon. Taas la geeddoo nucchul on sohatta, massatta.