Ibiraaniya 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Maantaka orey isohanni, kakhuufnaanki inno Kiriisto kakhuufno ka soonnaanneti ꞌdooꞌdi Kiriisto ka iiꞌd khabo miinsan, a raahno. Wihi Kiriisto miinsane inno kolooraat abanne iꞌdi maanta sohoti omoot keeno inno kasoonokhanni ichoow saggi inno Waakh ikakhuufno illehe, kakunno giꞌde.

² Soonnaanneta addan la a iꞌdi maanta baattissiyo ichoow ꞌdooꞌdi dahano lakorcho ichoow ꞌdooꞌdi tuume berri omoot kasookaho ichoow saggi Waakh berri enenyet ihukkumo wihi us goocho jirtuu tuumman iyateehiin illeh kakunno giꞌde.

³ Afi Waakh ka, iꞌdaase yeella, Kiriisto goyaka iiꞌdowna.

⁴ A mehe ꞌdooꞌdi maantoo Kiriisto rummeysan katabe soolaabinti lasoolaabo icho uskeelicho kasoonokhtaan ma tateeh. ꞌDooꞌda runti wori Waakh a abte, wihi Waakh ꞌdooꞌd siicho la rubey ka a chanchameene, icho ichoow ꞌdooꞌdi addan la Rubeyti Munyee a isleeꞌheleen.

⁵ Icho rubeyohicho ka chinniti Yeedi Waakh ichoow miigti maanti Waakh enenyet soodakhti a chanchameen.

⁶ Chirri icho Kiriisto kakhuufin ꞌdiicheen, soolaabinti lasoolaabo ꞌdee icho uskeelicho kasoonokhtaan ma tateeh. Iꞌdi tahe icho toro Weeli Waakhe awtichuu massalaaba kakaahaane, toro usu ꞌdow on ka lakhaanyo kadowaan.

⁷ Iyookkoka Waakh harrati bicchehi hiri ꞌdeyo surrukhto, toro la gurnaanki indigir khabo eti gos leh ibihisso a imaala.

⁸ Iꞌdaasenyi harra chiꞌiche kudah ichoow haraam on bihisso, indigir iche khabto mele gon. Waakh kola harrataas a fala, ꞌdaꞌddaboka la jirtuu tuumman ꞌdab yaham.

⁹ Aalasseenyoki nah weyti ꞌdoonno, chirri nah iꞌduu atin faajjiino laka, nah waꞌdwaaꞌd ma atin kakhabno. Iꞌdi tahe saggi atin jiti deefo ribnaan raaho iraahtaane garanna.

¹⁰ Waakh wihi imale on yeela. Usu wihi atin yeessaan ma kadabo, ommos ꞌdooninti atin usu tusatteen ma kadabo. ꞌDooninta la mehe lakaarga ya, gargaari atin ꞌdooꞌdi Waakh gargaarteene, uliba laka atin gargaartaan.

¹¹ Wihi nah etiimba iꞌdoonno kallaayo, orey isohda, isꞌdoona ichoowka jiro ꞌdubiche a eleesso, ꞌdee wihi atin Kiriisto ka khajjeessaan uba.

¹² Iꞌda ka la wihi Waakh miinsan ka ma seyꞌhoottaane, iꞌdaasenyi dabati ꞌdooꞌdi samacchaar ichoow kakhuufnaanki icho Waakh kakhuufaan ka wihi Waakh ayyiche muꞌdane raahtaan.

Wihi Waakh ayyiche khuuf on yateehiin

¹³ Maanti Waakh Aburaaham ayyintiis igooche a daatte. Et usu kaween mele gone, chuꞌus daatte, magahiissa on wahe.

¹⁴ Waakh wihi us Aburaaham iyidah, “Rumanka a kimaala, toro la nyaakhutaah a ittaawicha.”

¹⁵ Aburaaham la geeddi deer garrahsi ka Waakh a kakhuufe, wihi goorat Waakh iayyiche ꞌdaꞌddaboka ꞌhele.

¹⁶ Eti daatti tuumman magahi etoo kaweene waha, ꞌdee iriire massatta.

¹⁷ Waakh ꞌdooꞌdi wihi us ayyiche dalho saggi us ayta weyti imiigooche toro la us maliis iurgiyin a tusa. Jeentetuu la Waakh wihi us ayyiche ka a daatte.

¹⁸ Waakh wihi us ayyiche ichoow wihi us daatte ma urgiyaane, been goon ma yabuuꞌd. Maantaka innohi Waakh inyaanne karibanne uure inno miigoocha, ꞌdee khajjeeli us inno siiche mujjum khabanna.

¹⁹ Waha inno khajjeello la, jiroteen ka fiddihi roorro laan lafiddiyo khuuf inno siichaan. Eti inno khajjeel kakhabno a Yeessohi dafarti yobbeenye meel seley goosso tabe, dafartaas ꞌdirihiche ka meessi goyaat ikute.

²⁰ Yeesso la orteenna meessaas inno igele. Ulla jirtuu tuumman uumman Melkisedeek u, kuhaaniheenki weyti weene yitah.