Ibiraaniya 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso Muusa laka a kaweenyahe

¹ Maantaka ꞌdooꞌd Kiriistoki munyeenye Waakh goobiis iwahe, Yeessohi kakhuufnaanki inno Waakh kakhuufno inno cheekno ka, Waakh ergaano ichoow kuhaanihi weyti ween kayeele kamalda.

² Yeessohi Waakh soobahsate la, wihi Waakh yeel iyidah tuumman ka a eti lakakhuufe, saggi Muusa hiliiski minki Waakh ka eti lakakhuufe ieheet u.

³ Yeesso Muusa ꞌdirihiis koolo a imaleen saggi eti min diso koolo min ꞌdirihiis ikamaleen u.

⁴ Min ba eti diso a khaba gone, iꞌdaasenyi Waakh usu walah tuumman iꞌdi icho yahiin kayeele.

⁵ Muusa goorat iꞌdi ilbooy u, eti rumanka hili minki Waakh ka lakakhuufe eheete, ulla wihi Waakh berri sooyadeehe cheeke.

⁶ Iꞌdaasenyi Kiriisto weeli lakakhuufo hili minki Waakh tuumman itoollo eheet. Chirri inno burꞌde ikhabine, khajjeeli inno Kiriisto kakhabno keeylajno la, inno a minkiissa.

Nasmeti ꞌdooꞌdi Waakh lanascho

⁷ Maantaka, iꞌdi Rubeyti Munyee Chiirnaanneti Waakh goyaka tadeeh u, “Maalinka chaꞌatin wihi Waakh essi daagtaan,

⁸ matah amiigeysanna iꞌdi aacchinyetiin u. Iche la goorat a idaagiwwaayte. Maanti iche hidaad goya kajirte iche ani ikajje.

⁹ Chirri aacchinyetiin wihi an guꞌh tomon affar iyeele agarte laka, usu an rum ahe a ikajje, toro sinayyohi ikajo ikeente.

¹⁰ Ani la jeentetaase kholotaas ikahollowe, wihi an idah, ‘Uurassicho kol dakkhan baabaa iche kijiraane, jitasseey la ma garan.’

¹¹ Ani la holeey ka a daadde wihi an idah, ‘ꞌDooꞌda ili an kanascho yombuu tuumman ma gelo.’ ”

¹² ꞌDooꞌd Kiriistokaaw taba giꞌde, uus etiinkoo kalday laka matahmiigti Waakh liirummeysanne Waakkhi jiro lakatabo khabin giꞌde.

¹³ Iꞌdaasenyi geeddi il Maalinka on yahe, maan dakkhan uur ismiigoocha. Uus ꞌdee etiinkoo kalday laka uskeel ekkeysanne, us Waakh matah imiigeysanne.

¹⁴ Iꞌdi tahe chirri inno geeddi inno jiro khabno inno mujjum tolossanne, inno khajjeeli maanti inno kolooraat Yeesso rummeysanne on khabno, inno tuumman Kiriisto a walhinne.

¹⁵ Iꞌdaasenyi, wihi Yeedi Waakh essi akadabina. “Maalinka, chirri atin wihi Waakh essi daagteen, matah amiigeysanna iꞌdi aacchinyetiin u. Iche la goorat ani a idaagiwwaayte.”

¹⁶ Kamalda bal ꞌdooꞌdi wihi Waakh essi daage toro raahiwwaaye a ayyo illeh? Icho ꞌdooꞌdi tuummane Muusa ili Miissiri kasoobahche menya?

¹⁷ Toro ꞌdooꞌdi Waakh rubeytiis guꞌh tomon affar ihollowe a ayyo illeh? Icho ꞌdooꞌdi uskeel yeele, hidaad goyaka tuume menya?

¹⁸ Toro kamalda bal, ꞌdooꞌdi Waakh idaatte, “ꞌDooꞌda ili an kanascho yombuu tuumman ma gelo,” iyidah a ayyo illeh? ꞌDooꞌdi Waakh rubeytiis daagiwwaaye menya?

¹⁹ Wihi ꞌdeerka inno abanni, ꞌdooꞌda Waakh ma kakhuufin gone, ilaas icho kanasin leheet a latirte.