Ibiraaniya 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Saggi Waakh liihamaadicho

¹ ꞌDooꞌdi Kiriisto rummeeste tuumman la orey a isohti, a isꞌdoono giꞌde.

² Goobassiin ka, ꞌdooꞌdi atin igaranne atin martiisattaan laka kasooꞌhela. A mehe ꞌdooꞌdoo saggaas on u garrawwaayyo ka herti Waakh a martiiste.

³ ꞌDooꞌdi jeelayyo kijiro laka kasooꞌhela, ꞌdee aw ikhaba, iꞌdoo atin laka jeelayyohaas kaleejirtaan u. Toro la ꞌdooꞌdi sina lakawaaricho laka aw ikhaba, iꞌdoo atin laka sinataas atin lakawaarichuu.

⁴ Enenyet tuumman mindischo a inkaanyito. Makhaabal ichoow makhaabál ba la uus icho etoo addan leeurꞌdin. Iꞌdi tahe Waakh ꞌdooꞌdi iꞌdaase ichoow ki sohoꞌddarri kaassohti rumanka a hukkuma.

⁵ ꞌDooꞌdi chílim iꞌdamaammowo iitaahana, wihi atin khabtaan on kadarga. Iꞌdi tahe Waakh wihi us yidah, “An koloo kalday laka ma kaaseeho, an koloo kalday laka ma kiꞌdiiꞌdo.”

⁶ ꞌDeerka roorro laan wihi inno nadeeh, “Kamur a gargaaraaya, walah an karooro mele. Weeli enenyet mehe iyeela?”

⁷ Bal ꞌdooꞌdi oraate atin woye, Yeedi Waakh atin isoocheeke, kasooꞌhela. Jiroti haaggane icho jireen, wihi iche desse kamalda, toro la atin laka saggichuu Waakh kakhuufa giꞌde.

⁸ Yeesso Kiriisto iꞌdaaru laka ma urgiyo. Us chele ichoow maanta ichoow jirtuu tuummamba a koo kalday on.

⁹ Maantaka yeedi tuummane runti Waakh tabardowsane enenyet laabcho, uus jiti mujjume atin bujin. A mehe wihi indigir atin ikhabo gololi soorriyoyyoote layaham menye, a haaggi Waakhe buurenye uurassiin miigoocho.

¹⁰ Innohi ꞌdooꞌd Kiriistee la, chalagti kuhaaniyyohi Yaꞌhuude eemati harratane Waakh lakawahti weyti kayeere a khabna. Kuhaaniyyohaas soorriyoyyohi icho Waakh ibahchaan ohom a muꞌdanyahiin. Iꞌdaasenyi wahanyeyyohi chalagteen ohom ma muꞌdan.

¹¹ Iꞌdi tahe ayyinti oraat ka kuhaanihi weyti weene Yaꞌhuud diiggi hoolahi Waakh liisoorriyoocho, iche sookhaata eema ka Meessi Weyti Lagan ka, jeenteti uskeeli enenyet u Waakh ibahcha. Iꞌdaasenyi jidi hoolahaas uram kharicheeda lakaguba.

¹² Yeesso laka iꞌdaase layeele, aritti ilkerengeeteet khariche ka sina tuhuyye, yumuyye, diiggiis ka la ꞌdooꞌdiis munyaache.

¹³ Maantaka inno laka Yeesso uram khariche ka iiranni, lakhaanyoti usu lakadowe, inno laka a inno lakadowo.

¹⁴ Iꞌdi tahe harrata ka ilkerengeetti weene jirtuu tuumman inno fiddiino ma khabno. Iꞌdaasenyi ilkerengeetti soosohatti, iche yowanna.

¹⁵ Maantaka taba, Yeesso ka Waakh kol dakkhan koolinno. Iꞌda ka kooloheen a iꞌdi soorriyoti inno Waakh ibihinno, toro la a iꞌdi gurnaanki enenyet af ka saggi Waakh Kamur iyahe cheeko.

¹⁶ Haaggi atin ꞌdooꞌdi addan iyeessaan ichoow gargaari atin ꞌdooꞌdi addan leegisantaan la akadabina. A mehe haagga a iꞌdi soorriyoti Waakh kahamaado.

¹⁷ Weynaantiin wihi iche atin idowto daaga, antohicho la akutina. Iꞌdi tahe ꞌdooꞌda jeenteti us atin iyaakhicho u, koloo kalday laka ma naso. Icho la hila berri saggi icho ihaaggicheene, Waakh worsata. Chaꞌatin wihi icho atin idowaan raahtaan, hilicho hamaade kahaaggichaan. Iꞌdaasenyi chaꞌatin idaagin la, hil a leemiigoossaane, waha la indigir icho atin ibahaan mele.

¹⁸ Waakh nah isoowaha. Wihi nah tissibno, rubeyohi suujoon nah ikacheekanne khabna, toro walah tuumman ka, nahi haag yeello ꞌdoonna.

¹⁹ Weyti la a atin hawwaasde, Waakh isoowaha, ꞌdee dowwanoha ka toro a atin isoonokhdi.

Weysihi ꞌdaꞌddaboot

²⁰ Waakkhi nebey leh Yeessohi Kamureenenye Ersinki weene iiyyaate diiggi ayyinti husube jirtuu tuumman imassanne us gooche ka omoot a kasookahche.

²¹ Waakh ba haaggi tuummane atin kaankhane, ꞌdee atin wihi us ꞌdoono yeessaan atin siicha. Yeesso Kiriisto ka, Waakh ba miigti atin wihi us kahamaado yeessaan atin siicha. Yeesso Kiriisto ba jirtuu tuumman lasaaꞌda. Aamiin.

Waansihi ꞌdaꞌddaboot

²² ꞌDooꞌd Kiriistokaaw, a atin hawwaasde, taba, wihi an khadaabaar rucchul ka atin iidahye uur atin miigoocho, nabah isuda giꞌde.

²³ Wihi addane an atin isoocheeko, walaaleenki Timooti layadeeh jeela ka a lasoofure. Chuꞌus dowwa isooeleele la, a issooraahna ꞌdee atin sooarga.

²⁴ ꞌDooꞌdi atin iwewween tuumman ichoow ꞌdooꞌdi Waakh tuumman bariiticha. ꞌDooꞌdi koo Kiriisteenye ili ꞌDeylaan kijiro, a atin soobariitiche.

²⁵ Waakh ba atin tuumman atin imaala.