Ibiraaniya 12 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Waakh ꞌdooꞌdiis a soohossa

¹ Maantaka urura buurenye garti saggi icho Waakh ikakhuufaan laabo a inno kamarsanyahe gone, taba, wihi tuummane inno jeycho ichoow uskeeli inno woyo tuumman rogno, toro la oriisihi Waakh orteen gesse ka, a garrahsanni.

² Taba, kol tuumman Yeesso a kamalanni giꞌde. Usú orey inno woye, Waakh kakhuufne, toro uliba laka inno woya, Waakh tuum kakhuufna. Ulla jeenteti hamaadi sugo u, lakhaanyoti eti massalaaba lakakaaho taham a igarrahsate. Ulla toolla goobi Waakh ka komborti Waakhe antoot ankicheki miigeete fiddiya.

³ Bal saggi us ꞌdooꞌdi uskeel khabe usu weyti ꞌdiiꞌddan us ikagarrahsate kamalda. Iꞌda yeela ꞌdee akurmina, toro la rubey iiche atin jebin.

⁴ Iꞌdi tahe atin uskeeli atin hol leedowtaan ka, uliba ma tirrimine ichoowka geeddi atin lakabakkicho ma eleelin.

⁵ Atin la wihi Waakh iꞌdi nyaakhutiis u atin iyidahye uur atin miigoocho, a kadabteen, “Nyaakhutaaw, sooholinti Kamur atin soohosso nabah isuda, toro la geedda us atin khuncho uus rubeye atin jebin.

⁶ Iꞌdi tahe Kamur eti us ꞌdoono tuumman a soohossa, toro la iꞌdi weeliis u, sirbi gessa.”

⁷ Chirri sina atin lakawaaricho, garrahsada on. Iꞌdi tahe Waakh sinataas ka a atin soohossa, saggi ooyo weeliis isoohossuu. Weeli ooyo isooholin a jira?

⁸ Rumanka Waakh nyaakhutiis tuumman a soohossa. Chirri us iꞌdi nyaakhutiis u us atin isooholin, wahaas mehe tusaan ya, atin nyaakhutiis mee gone, atin a iꞌdi eysingꞌalaj.

⁹ Ooyenyeteenti inno desse inno sooholisso, a inkaanyinna gone, geeddoo meheenye sooholinti Aabbaheenki saraat inno soohosso raahna, ꞌdee jirtuu tuumman jirra?

¹⁰ Ooyenyeteen geeddoo icho ka imasse, iche inno sooholissa. Iꞌdaasenyi sooholinti Waakh inno soohosso, a wihi inno imale, ꞌdee inno laka munyatiis leegisanno.

¹¹ Sooholin enenyet lasoohosso chirraas wohoo lakahamaado lakoogyahe mele, a bolokh on. Iꞌdaasenyi yomboka eti tuummane lasoohosse, gurnaanki us delo a wihi fissan ichoow nebey.

¹² Maantaka, dahanohiinki ꞌhare ichoow luhlohiinki harmo miigoocha.

¹³ “Luhlohiin jiti fissan iyeela.” ꞌDee jirotiin ka ma tarrantarrattaane, ma kuftaane, iꞌdaasenyi a miigowtaan.

Waakh nabah isuda

¹⁴ Hol dowa ꞌdee weeli enenyet tuumman nebey kaleefiddiya, toro la ꞌdooꞌdi munyee ateeha. Iꞌdi tahe eti tuummane munya ieheynan, jirtuu Kamur ma argo.

¹⁵ Taba aw isikhaba, uus ꞌdee etiinkoo kalday laka haaggi Waakhe buurenye us atin tuste waayine. Uus etiinkoo kalday laka iꞌdi hiiyyi hadaado khabo soobaho sina keeno, toro enenyet suujaacho itaahan.

¹⁶ Uus etiinkoo kalday laka sohoꞌddarri kaassohanne, ommos iꞌdi Essaawohi Waakh inkaanyitiwwaaye itaahan. Ulla jeenteti gololi koloo kalday on ka, antohiiski teyyannoon ororiche.

¹⁷ Ulla yomboka iꞌdi atin igarattaan u, maanti us weysi aabbahiis ꞌdoone, aabbahiis usu a ꞌdiiꞌde. Chiꞌ Essaawo weysi iooye laka, sag us maliis iurgiyicho mele.

¹⁸ Atin la iꞌdi yaafohi Issiraayel mee, a mehe atin hali Sinnaaye laꞌdaaro, ꞌdab kabolkho, ichoow mugꞌdihi reebe ichoow rug,

¹⁹ ichoow hooyi arabi laafuufo ichoow hooyi Waakkhi yeyyeedo ma isoodowwaan. Inkoo ꞌdooꞌdaas hooyi Waakkhi yeyyeedo daage ka, Waakh hawwaasteene, ichohi toro yeedoo addan daago ma ꞌdoonin.

²⁰ Amuri Waakh bahche icho daagin iꞌdoonin la kalla, “Chirri weeli enenyet ommos wohoo nafe laka hala ꞌdaareen, dagah a lakaseyo, a layigaase.”

²¹ Wihi ꞌdooꞌd halaas ka arge, weyti burꞌdoocheene, ichoowka Muusa wihi us yidah, “An weyti roorro khaba ichoowka harma.”

²² Iꞌdaasenyi atin Hali Saayone isoodowwaatteen. Waha la a ilkerengeetti weene Yeerusaleeme goobi Waakh kijirto, a ilkerengeetti Waakkhi jiro. Waha la a inti herti Waakhe eluffe goosso, hamaad ka kulante.

²³ Toro la urur Kiriistoki iꞌdi teyyanohi Waakhenye isoodowwaatteen. Waha la a ꞌdooꞌdi magahenyeticho goobi Waakh ka lachiire. Atin la Waakkhi ꞌdooꞌd hukkumo ichoow rubeyohi ꞌdooꞌdi fiffissane el laa lakayeele, iche isoodowwaatteen.

²⁴ Toro la Yeessohi dahgeleenye ayyinti husube Waakh gooche keene, iche isoodowwaatteen. Diiggiis a liirdifte, ꞌdee Waakh enenyet uskeel ikakuta. Diigga iꞌdi diig Aabelki eti aal guto yowti mee.

²⁵ Taba giꞌde Waakkhi yeeda atin idowo aꞌdiiꞌdina. A mehe chirri goorat yaafohi Issiraayel Muusahi harrata ka leeyyeede yeediis ꞌdiiꞌdeene iche ibahsawwaaytuu, inno laka sag inno iꞌdaaru laka ibahsanni mele chirri inno eti goobi Waakh kasooyyeedo adah kakhabanne.

²⁶ Maantaas goorat hooyi Waakh harra a sesseehiche, iꞌdaasenyi toolla wihi us ayyiche us yidah, “Koloo kalday toro harra kalday on menye, sereyta daayan laka a korkokicha.”

²⁷ Yeeda, “Koloo kalday toro,” essi saggi wihi Waakh haaggiche harrata kijiro liikorkokicho, liibahcho, ꞌdee wihi jirtuu tuumman jiro kaldach on isooꞌhadaane tusa.

²⁸ Maantaka Waakh dakhi liikorkokinne inno siicha gone, Waakh jiti us kahamaado, roorro ichoow inkaanyit ka kalaꞌd ilaabno toro wahanni giꞌde.

²⁹ A mehe Waakkheen rumanka a ꞌdabi walah yaham.