Ibiraaniya 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Iyookkoyyohi saggi ꞌdooꞌdi lagarti Waakh ikakhuufe

¹ ꞌDooꞌdi Waakh kakhuufo saggi wihi icho ikhajjeelaan isooyateehiine tissibaane, toro la wihi toolla liiargine ubaan.

² Iꞌdi tahe kakhuufnaanki ꞌdooꞌdi goorat archiiy Waakh kakhuufe on ka, iche Waakh saggi us icho ikahamaade icheeke.

³ Jeenteti inno Waakh ikakhuufno, iche saggi us yeedi afiis on ka us harra isoouume igaranna. Wihi toolla indo lakaargo la, wihi indo liikaargine lakasoouume.

⁴ Aabel kakhuufnaanki us Waakh kakhuufe on ka, iche soorriyoti too Kaayin kussan Waakh ibahche. Jeenteti kakhuufnaankaas u, Waakh saggi usu eti fissan iyahe cheeke, soorriyotiis la kahamaade. Aabel Waakh a kakhuufe gone, chuꞌus toolla ijirin laka, usu a iꞌdoo us uliba inno leeyyeedo on.

⁵ Eenog la kakhuufnaanki us Waakh kakhuufe on ka ma umaatan. Noolyahaayi Waakh rubeytiis goobi Waakh geeche, Eenog lawaaye. Iꞌdi tahe geeddi liikhaatin, saggi us eti rumanka Waakh kahamaadicho iyahe iche lacheeke.

⁶ Et Waakh ikakhuufine Waakh kahamaadicho mele. Iꞌdi tahe eti Waakh wahan ꞌdoono tuumman, wihi lakaꞌdoono a usuhi saggi Waakh rumanka ijiro, toro us ꞌdooꞌdi usu yowti kalaꞌd iguto, rummeesti.

⁷ Noowa la kakhuufnaanki us Waakh kakhuufe on ka, iche maanti Waakh tootooche, wihi maalinkaas liiargin icheeke, koobanhi buure dise, goobiis ribe. Kakhuufnaanki us Waakh kakhuufe ka, ꞌdooꞌdi harrata uskeel igooche. Toro la Waakh usu eti fissanoonki kakhuufnaanki Waakh lakakhuufo lakeelo muꞌdan iekkaache.

⁸ Aburaaham la kakhuufnaanki us Waakh kakhuufe on ka, iche maanti Waakh iloo berri alaal ka siicho irte. Ulla chirri us ili us isohti igaran laka, ayti Waakh a raahe iliis kaguure.

⁹ Kakhuufnaanki us Waakh kakhuufe on ka, iche ili Waakh iayyiche ka iꞌdi eti yeelan u ili yeelan ifiddiye. Ulla iꞌdi Isakh ichoow Yaakoobuu eemayyo igele. Icho laka ayyinti Waakh usu igooche a dalhaan.

¹⁰ Aburaaham la saggaase ifiddiye. Waha la a jeenteti us ilkerengeetti weene daddaabohi ilaat sarche kadisane, jirtuu dakkhan jirto Waakh rubeytiis rerreege toro dise, ikhajjeelo.

¹¹ Aburaaham la kakhuufnaanki usu Waakh kakhuufe on ka, iche miigti usu araarri goyaka weeloo kaꞌhelo ꞌhele, chirri us araarrowe Saara la mahante laka. Iꞌdi tahe us Waakkhi ayyiche eti lakakhuufo iekkaache.

¹² Kholoyyohi ittaawe ꞌdeerka makhaabala atteka yumuy iche kayimaateen. Nyaakhuti kholoyyoha ittaaw ka a geeddi yiyyihimohi saraate toro iꞌdi yoohti beyti buure afiche kijirtuu ekkees ma layabuuꞌd.

¹³ ꞌDooꞌda dakkhan la Waakh kakhuufaayi tuume. Icho la wihi Waakh iayyiche ma ꞌheline, toro la fogaka wihi ꞌdee berri sooyateeh argeene, kahamaadeen. Saggi icho harrata ka chiiy ichoow ꞌdooꞌdi yeelan iyahiin ꞌdow ka a cheekeen.

¹⁴ ꞌDooꞌdi iꞌdaas essi, saggi us ili ꞌdee kiise iyowti, iche tusa.

¹⁵ Chirri icho ili goorat icho kasootabeen kamasseen la, a geeddi kootte icho inokhtaan.

¹⁶ Iꞌdaasenyi ili weyti deefo imoonaan. Waha la a goobi Waakh. Maantaka Waakh chirri us a Waakkhichooda liidah us ma kuuryaawo, a mehe usu ꞌdooꞌda ilkerengeet a idise.

¹⁷ Aburaaham la kakhuufnaanki us Waakh kakhuufe on ka, iche maanti Waakh kaje, inankiiski Isakh layadeeh Waakh soorriyo ikabihin leheet. Aburaaham ayyinti Waakh igooche khaatte, inankiiski kaldaye keleyenye us khabe, Waakh isoorriyin leheet.

¹⁸ Chirri Waakh goorat Aburaaham, “Isakhe nyaakhuti ittaawe kaꞌhessa,” iyidah laka,

¹⁹ Aburaaham saggi Waakh Isakh omoot ka isookahcho iche kamasse. Aburaaham ka la a iꞌdoo inankiis omoot ka liisoolaabe.

²⁰ Isakh la kakhuufnaanki us Waakh kakhuufe on ka, iche yeeletiisti lammee Yaakoobo ichoow Essaawo ba wihi berri sooyateeh ikaweeste.

²¹ Yaakoobo la kakhuufnaanki us Waakh kakhuufe on ka, iche chirra us sooyamuut yeele Yuussuf kooba iweeste. Toro la wussiis katirriinsataayi, Waakh wahte.

²² Yuussuf la kakhuufnaanki us Waakh kakhuufe on ka, iche chirra us sooyamuut saggi yaafohi Issiraayel berri ili Miissiri ikaguuraane, icho ilicho ikanokhtaan cheeke. Amur bahche lafohiis iꞌdi layadeeh icheeke.

²³ ꞌDooꞌdi Muusá dele, kakhuufnaanki icho Waakh kakhuufeen on ka iche roorro laan amuri karnat bahche, nyaakhuti lallabe yaafohi Ibiraaniya tuummane labakkicho miinsan raahin ꞌdiiꞌdeen. Muusa uus desse, hay seyyah dakkhan dagcheen. Iꞌdi tahe Muusa weeli joon lehe eheet.

²⁴ Muusa la kakhuufnaanki us Waakh kakhuufe on ka, iche maanti us weynaate, usuhi weeli inanti karnati ili Miissiri lakawaho ꞌdiiꞌde.

²⁵ Ulla usuhi jiroti uskeel keeno geeddoo rucchul on lakahamaado fiddiyo ka, usuhi isbahcho, sinati ꞌdooꞌdi Waakh taham, usu laka taham gooche.

²⁶ Usu ka la lakhaanyoti us jeente Kiriisto iꞌhelo leedeefta, kamurroonki us ili Miissiri kaꞌhelo ka. Iꞌdi tahe usu kalaꞌddi buurenye berri Waakh guto, iche rerreege.

²⁷ Muusa la kakhuufnaanki us Waakh kakhuufe on ka, iche ili Miissiri kabahe, holi karnat hollowe la ma karoorin. Ulla iꞌdoo us Waakkhi liiargin iarge u, yombohi us inokhti ꞌdiiꞌde.

²⁸ Ulla kakhuufnaanki us Waakh kakhuufe on ka, iche ꞌdooꞌd saggi daawti Baasakka liigelo, toro la diig khoꞌdoommeti min afafhiise lakachiiro idowdowe. Iꞌda ka la herti Waakhe omoot teyyano tuumman ikeento, teyyanohi yaafohi Issiraayel ma bakkin.

²⁹ Yaafohi Issiraayel la kakhuufnaanki icho Waakh kakhuufeen on ka, iche Beyti Buurenye Guuꞌddan seley igoote, harrati kafafsan itabeene, imaaheen. Iꞌdaasenyi iskarti ꞌdooꞌdi Miissiri chirra icho yaafohi Issiraayel raaheen ka, chirraas on bicche khaateen.

³⁰ Yaafohi Issiraayel la kakhuufnaanki icho Waakh kakhuufeen on ka, iche maanti icho ibeen teeba ilkerengeetti Yeeriko kamareen, daddaabohi ilkerengeet kamarsan tuumman isoorerreyeen.

³¹ Raahabti malaayee la kakhuufnaanki iche Waakh kakhuufte on ka, iche ꞌdooꞌdi Waakh daagin ꞌdiiꞌde liileeigaasawwaaye. Iꞌdi tahe iche ꞌdooꞌdi Issiraayele ꞌdegey irte, nebey ka a martiisatte.

³² ꞌDeerka ꞌdooꞌdoo addane wawwaha, bal mehe addane idaahe? Iꞌdi tahe Giidiyon ichoow Baarag ichoow Saamison ichoow Yeeftah ichoow Dawuud ichoow Saamuwel ichoow ꞌdooꞌdi Waákh íyeyyeedo tuumman, chir an jiroticho kaayyeedo mele.

³³ Kakhuufnaanki ꞌdooꞌda Waakh kakhuufe on ka, iche yaafohi chiiytichee idiheene, isooricheen. Jiti fissan on enenyet kahukkumeene, wihi goorat Waakh iayyiche la ꞌheleen. Gaasichokoo afi bahassi a ꞌduuꞌdeene,

³⁴ gaasoo laka ꞌdabi buure jiccheene, gaasoo laka ꞌdooꞌdi birlabbe ka ogoos marmo kabahsateen. Icho a ꞌdaꞌddarneete, iꞌdaasenyi miigoween. Toro la iskarti diho ka mimmiigenye chiiyo firdisso yitaaheen.

³⁵ Deyyeho gaasoo ꞌdooꞌdi hiiyyicheenye tuume omoot lakasookahche, ꞌheleen. ꞌDooꞌd gaasoo bolokkhi buurenye latuse toro furnaanki lasoofuro ꞌdiiꞌde, ꞌdee maanti omoot lakasookahcho ka jirotoo deefto ꞌhelaan.

³⁶ Gaasoo laka a lakachaarte, laajjayyo ka lajahe, gaasoo laka biingoyyo lakahide, jeelayyo lakachibe.

³⁷ Gaasoo dagah ka labakkiche, gaasoo seley laaggooche, gaasoo la birlabbe ka labakkiche. Gaasoo la uktohi adi gaad kayeesseene, gessateen. Icho la rumanka miskiinki marahe eheneete, sinati buure laka lakawaariche, toro la wihi suuje layeele.

³⁸ ꞌDooꞌda weyti haagganeete harrata ma imalin. Icho la iꞌdi ꞌdooꞌdi meel laa u, hidaad ichoow kuro kaassohteene, toro la goꞌddaꞌd ichoow lumam igeleen.

³⁹ ꞌDooꞌda tuumman jeenteti icho Waakh weyti ikakhuufeen u, saggi Waakh icho ikahamaade a lacheeke. Iꞌdaasenyi icho wihi Waakh iayyiche, ma ꞌhelin.

⁴⁰ Iꞌdi tahe Waakh mali inno iroone gooche. Iꞌdaas ka la laanteen Waakh ortiis ka ꞌdooꞌdi el laa ma yateehiin.