Ibiraaniya 10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Kiriisto a soorriyoti jirtuu liikanokhan

¹ Amurre Muusa a oosinti wihi haaggane soosohti one, wihi rummaat mee. Amurretaas ka soorriyoyyo a wihi guꞌhi soomaro tuumman ka liinonnokhti lahaaggicho. Iꞌdaasenyi soorriyoyyoha ꞌdooꞌdi Waakh kawahti ꞌdooꞌdi eloo rucchul laka ikhabin ma kayeelaan.

² Chirri soorriyoyyoha ꞌdooꞌdi Waakh kawahti rumanka uskeelicho kadikhin yabuuꞌdiin, soorriyoyyo tuumman a latoollicha gon. Iꞌdi tahe iꞌda ka ꞌdooꞌdi Waakh kawahti koloo kalday on jirtuu tuumman ladikha, toro la rubeyohicho suujoonkicho ma kacheektaan.

³ Iꞌdaasenyi wihi rummaate jiro a mehe ya, soorriyoyyohi guꞌhi soomaro tuumman lagelo, enenyet kol tuumman uskeelichooda on kasooꞌhelchaan.

⁴ Iꞌdi tahe diiggi heeraroot ichoow ki waharoot koloo kalday laka uskeel ma bahchaan.

⁵ Maantaka, maanti Kiriisto harrata yimiy, wihi us Waakh iyidah, “At soorriyo ichoow wihi lakisoobahche ma ꞌdoonin, iꞌdaasenyi at ani sar a iyeesse.

⁶ Hoolahi tuum chalag ka lakigube, ommos soorriyoyyohi jeenteti uskeeli enenyet liibahche laka, ma kaahamaadin.

⁷ ꞌDeerka Kiriisto wihi us yidah, ‘Okkhoow, an kalla, wihi imiinsane khadaabi yuuban kachiiran, an a imiyye wihi at ꞌdoonto yeela.’ ”

⁸ Kiriisto ꞌhor Waakh wihi us iyidah, “At hoolahi lakisoorriyooche ichoow siimohi lakisoobahche ichoow hoolahi tuum chalag ka lakigube, ommos soorriyoyyohi jeenteti uskeeli enenyet liibahche, ma ꞌdoonine ommos ma kahamaadin.” Ulla chirri soorriyoyyoha amurre Muusa ꞌdoonto laka, iꞌdaas on yidah.

⁹ ꞌDeerka wihi us yidah, “Okkhoow, an kallaaye, wihi at ꞌdoonto iche yeela.” Waakh soorriyoyyohi oraate bahcha, too Kiriisto meessicho gessa.

¹⁰ Waakh iꞌdaas a yeele gone, sar Yeesso Kiriistoti lasoorriyooche ka a inno munyaache. Kiriisto la koloo kalday on jirtuu tuumman issoorriyooche.

¹¹ Kuhaaniyyo ebba maan dakkhan chalag ortiis ka hiliissa haaggicha, soorriyoyyohaas koloo kalday laka uskeel ibihin babbahchaan.

¹² Iꞌdaasenyi kuhaaniha koloo kalday on issoobahche, soorriyoti uskeel bihisso, jirtuu tuumman liikanokhan yitahye, Waakh anki dahantiisti miigeet orronte.

¹³ Ulla toolla intaase chiiytiisti tuum Waakh dahanohiis soogesso kasuga.

¹⁴ A mehe soorriyotaas kaldaye us issoobahche on ka, ꞌdooꞌdi lamunyaacho ꞌdooꞌdi jirtuu eloo rucchul laka ikhabine kayeele.

¹⁵ Rubeyti Munyee laka Yeedi Waakh ka ayta a cheekta, wihi iche kolooraat elatti,

¹⁶ “Kamur wihi us essi kallaayo, waha a ayyinti husube an berri ꞌdooꞌdeey igoocho, amurreteey uurassicho goya gessa, toro la malicho goya kachiira.”

¹⁷ Wihi addane iche kakhayte, “Uskeelicho ichoow hugunꞌdarriticho jirtuu tuumman ma kasooꞌhelo.”

¹⁸ Maanti Waakh enenyet uskeel ikakute la, soorriyoyyohi uskeel bahcho kola ma laꞌdoono gon.

Saggi inno Waakh ikadowwaanni

¹⁹ Maantaka ꞌdooꞌd Kiriistokaaw, diig Yeesso ka, antohi inno roorro laan goobi Waakh ka Meessi Weyti Lagan kagello a khabna.

²⁰ Meessa la jiti husube jiro keeno Kiriisto dafartaas us tabe ka inno ifure, iche kagella. Dafartaas la a sartiissa.

²¹ Kuhaanihi weyti weene minki Waakh itoollo la a khabna gone,

²² mali fissan ichoow kakhuufnaanki inno Waakh kakhuufno uurlammaal ikhabin ka, Waakh idowwaanni giꞌde. A mehe rubeyoheenki suujoon inno kacheekti diig Kiriisto ka a ladikhe, sarteen la a iꞌdoo bicchehi warraakhe lakadikhe.

²³ Khajjeeli inno cheekno mujjum khabno giꞌde, a mehe Waakkhi waha ayyiche a eti lakakhuufo.

²⁴ Saggi inno uur isimiigoonno, ꞌdee ꞌdoonin isikhabno, haag la isiyeello kamalanni giꞌde.

²⁵ Uus inno kulanki inno kulanno ꞌdiin, iꞌdi ꞌdooꞌdoo yeeluu. Iꞌdaasenyi tabno uur a ismiigoonno, toro Ibeenki Kamur soonokhti a soodowwaatee gone, weyti iꞌdaas yeello giꞌde.

²⁶ Chirri inno inkoo inno rum abanne dib on u toro uskeel yeello, soorriyotoo addane uskeel inno kabihisso ma jirto.

²⁷ Iꞌdaasenyi wihi jiro, a hukkunki Waakh ꞌdooꞌd hukkumo soosohti, inno roorro ka sugno, ichoow ꞌdabi weyti bolkho chiiyti Waakh ꞌdabbaacho kalday on.

²⁸ Goorat eti tuummane amurre Muusa raahin ꞌdiiꞌde, chirri et lamma ommos et seyyahe gartiis laabte, uur ma liinugleesti, chirraas on layagiis.

²⁹ Eheet a, eti Weeli Waakh daddabho la mehe imale? Eti diiggi ayyinti Waakh gooche enenyet munyaacho wohoo biꞌdire ikhaato mehe imale? Toro la eti Rubeyti Munyeenye haaggi Waakhe buure inno siisso abaare mehe imale? Sinati eta imasse Waakh igoocho, buur ka geeddoo meheenye kakhayanta?

³⁰ A mehe saggi Kamur rubeytiis waha iyidah a garanna, “Ani aal gudda, ani toro mog gudda.” Toro la wihi addane liidah, “Kamure ꞌdooꞌdiis hukkuma.”

³¹ A roorroti weyti buure chirri Waakkhi rumanka jiro inno khabte.

³² Bal saggi atin dowwanohi atin Yeesso Kiriisto rummeysatteen ijirteen kasooꞌhela. Sinati buurenye atin tuhuyye, iꞌdaasenyi atin a garrahsatteen one, yombo ma inokhan.

³³ Kolossoo ꞌdowhi nyiikhsan on ka atin laleeabaarrama, toro sina atin lakawaaricha. Kolossoo laka ꞌdooꞌdi addane sina lakawaaricho goya atin lagata.

³⁴ Iꞌdi tahe ꞌdooꞌdi jeelayyo kajiro a inahteen. Chirri wihi atin khabtaan tuumman atin lasare laka, atin hamaad on khabteen, jeenteti atin wihi deefo yombuu imassanne Waakh ayyiche ikhabtaan igarattaan u.

³⁵ Maantaka jiti atin roorro laan Waakh kakhuuftaan aꞌdiinna. Saggi jeentetaas u kalaꞌddi buure atin liiguto kasooꞌhela.

³⁶ Wihi toolla atin lakaꞌdoono a garrahsi, ꞌdee chaꞌatin wihi Waakh ꞌdoono yeesseen ka, wihi us ayyiche ꞌhessaan.

³⁷ A mehe dowwanoha ka, “Eti yamiit a yamiite ma malmalo la.

³⁸ Iꞌdaasenyi eteeyki fissan ani ikakhuufa, kakhuufnaankaas ka jira. Eti adah ikakhabti, ma kahamaado.”

³⁹ Iꞌdaasenyi inno ꞌdooꞌdi Waakh adah kakhabti labaabiicho goya ma kijirro, ꞌdooꞌdi Waakh kakhuufo, Waakh ribo goya kijirra.