Hilassi Ergaano 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Isiteefano jaldaab orche ka isiyeyyeeda

¹ Kuhaanihi weyti ween la wihi us Isiteefano worsate, “Waha lakaacheekti a rum a?”

² Waha ka wihi us laabe, “Yaafeey idagansada. Waakkhi weynaane tiis tahe, aabbaheenki Aburaaham layadeeh geeddi goorat archiiy us ilkerengeetti weene Haaran igelin, ili Messabotaamiya ka a isoobahe.

³ Waakh wihi us Aburaaham iyidah, ‘Ilaah ichoow ꞌdooꞌdaah kaguure ili an kidowdowo iro.’

⁴ “Aburaaham la ilaas kaguure ili Haaran furte. Inkoo aabbahiis buje ka, Waakh ilaas kaguuriche ila toolla atin taalliin furte.

⁵ Waakh harratoo rucchule us alaassati ma siin, iꞌdaasenyi chirri Aburaaham weel ikhabin laka, harrataas usu ichoow nyaakhut nyaakhutiis alaal ka a igooche.

⁶ Waakh wihi us Aburaaham iyidah, ‘Nyaakhutaah ꞌdee berri iloo yeelane gela, ilaas ka la guꞌh kud affar iche bowꞌda yateehe weyti la sina lakawaaricha.

⁷ Iꞌdaasenyi an ili icho bowꞌdaticho keeheet sina tusa. Yomboka ilaas a kasoobahaane, yamiitiine inta ka ani iwahtaan.’

⁸ ꞌDeerka ayyinti Waakh Aburaaham igooche a ti mejel lakhandiyo. Aburaaham la Isakh dele ibeenki siyyeennaatteet ka khandiye. Isakh la Yaakoobo dele Yaakoobo la yaafoheenki tomon ichoow lammee uume.

⁹ “Aacchinyeteentaas la walaalichoki Yuussuf layadeeh inaafte ili Miissiri iororisse, ilaas ka bowꞌda yitah. Iꞌdaasenyi Waakh Yuussuf a leejire,

¹⁰ sinayyohiis tuumman karibe. Waakh la Yuussuf khara siiche Faraawohi karnati ili Miissiree jilhaache, ꞌdeerka ili Miissiri ichoow urantiis tuumman iweynaache.

¹¹ “Maantooka abaare ꞌdeerka ili Miissiri ichoow ili Kaanaan leekahte, sina buuraatte, aacchinyeteen laka golol waayte.

¹² Maanti Yaakoobo saggi golol ili Miissiri ikajiro daage ka, yeeletiisti aacchinyeteene kolooraat ili Miissiri ierge.

¹³ Maanti lammaatteete iche toro ili Miissiri imuuꞌdde ka, Yuussuf walaalinyetiis isicheeke, Faraawo laka Yuussuf goobicho abte.

¹⁴ Waha ꞌdubicho ka Yuussuf aabbahiiski Yaakoobo layadeeh ichoow minkicho tuumman ili Miissiri isoowahe. Ichohi sooguure isgoya a et tomon teeba ichoow et chan.

¹⁵ Yaakoobo ꞌdeerka goobiis tuumman khabaayi ili Miissiri ikhubte. Intaas ka usu ichoow aacchinyeteen yumaateen.

¹⁶ Sarticho lakhaate inti ilkerengeetti Cheekem layadeeh ka, goꞌddi goorat Aburaaham yeele Haamor kasoogatte lakahawwaale.

¹⁷ “Maanti ibeenki Waakh ayyinti us Aburaaham igooche buuhicho soodowwaate ka, ꞌdooꞌdeen ili Miissiri ka weyti kakhayme.

¹⁸ Karnatoo addane Yuussuf ichoow wihiis tuumman igaran la ili Miissiri ka soobahe.

¹⁹ Ulla aacchinyeteen weyti sina kawaariche, toro ekkeeste, nyaakhutichoki ladele icho khar isoorogaane ꞌdee tuumo ihosse.

²⁰ “Maantaase Muusa desse. Ulla weyti haagganeet. Goobicho ka hay seyyah mujjum lawoywoye.

²¹ Maanti khar liisoobahche ka, inám Faraawo khaatte iꞌdi weelichuu weyneysatte.

²² Muusa la kharati ꞌdooꞌdi Miissiri laabche, etoo harrab ka ichoow walah tuumman ka atah yitah.

²³ “Maanti us guꞌh tomon affar eleele ka, ꞌdooꞌdiiski Issiraayele us idaahicho gooche.

²⁴ Etoo Miissiri koo Issiraayel il itakho arge, ꞌdeerka ki Issiraayel igele, aal gutte ki Miissiri yigis.

²⁵ Muusa kol ꞌdooꞌdiis saggi Waakh usú isooerge, usu icho iribo ikaso koogyahe, iꞌdaasenyi icho ma kasin.

²⁶ Ibeenki kaas sooraaho ka, Muusa reeroo lammeenye Issiraayele isjaho arge, isineybin leheete, ‘Era, atin a walaal, a iꞌdoh isgaameerin iꞌdoontaan?’ iyidah.

²⁷ “Iꞌdaasenyi eti kootte ki addan gaameero Muusa ꞌdol itakhe, ‘Ayyo eti nah iween ichoow eti nah hukkumo kaayeele?’ iyidah.

²⁸ ‘Saggi at chele eti Miissiri itigisye ani laka ogoos iꞌdoonta?’

²⁹ Chirri Muusa yeedaas daage ka, ili Miidiya ifirde. Inkoo us intaas geeddoo fiddiye ka ínam lamma dele.

³⁰ “Inkoo guꞌh tomon affare kutte ka, herti Waakh Muusa hidaaddi Hali Sinnaay ka isoobahte. Saggi iche ikasoobahte la a geeyi ꞌdab kabolkho toro ꞌdab iumhan.

³¹ Muusa chirri us waha arge ka wahaas kagirmeeste. Chirra us meel isohti, us mujjum fiiricho ka, hooyi Kamur daage.

³² ‘Ani a Waakh aacchinyetaahha, a Waakh Aburaaham ichoow Isakh ichoow Yaakoobo.’ Muusa nahtim ka harme intaas yeyin laka karoore.

³³ “Kamuri Waakhe ꞌdeerka wihi us Muusa iyidah, ‘Kobohaah duumi, a mehe inta at tolosso a harrati lagan.

³⁴ Rumanka sinati ili Miissiri ka ꞌdooꞌdeey lakawaaricho a arge, ooytinticho la a daage. Toolla la a isooyage icho riba. Toollaka kaale ati ili Miissiri toro kiergadaa.’

³⁵ “Waha a Muusahi goorat icho ꞌdiiꞌdeene, icho, ‘Ayyo eti nah iween ichoow eti nah hukkumo kaayeele?’ idoween. Herti Waakhe geeyi gubti goyaka isoobahte ka, Waakh rubeytiis usu a ergate eti icho iween ichoow eti icho soofuro kayeele.

³⁶ Muusahaase ꞌdooꞌd ili Miissiri kasoobahche. Usuhaas on guꞌh tomon affar tuummamba girmo ichoow wahanyeyyohi miigti Waakh tuso ili Miissiri ka ichoow Beyti Buurenye Guuꞌddan ka ichoow hidaad ka haaggiche.

³⁷ “Muusaha a ki goorat ꞌdooꞌdi Issiraayel, ‘Waakh ꞌdee berri etiinkoo Waákh íyeyyeedo iꞌdeye a atin isooerga,’ iyidah.

³⁸ Maanti ꞌdooꞌdi Issiraayel hidaad ka iskafurte, Muusahaase leejire. Muusahaase Hali Sinnaay ka, Waakh iꞌdi herti Waakh u isoobahe, leeyyeede. Ulla Waakh ichoow aacchinyeteen dahcho kajire. Muusa la Yeedi Waakhe jirtuu tuumman imassan Waakh kaꞌhele inno laka inno isookucche.

³⁹ “Iꞌdaasenyi aacchinyeteen Muusa a daagiwwaayte, usu ꞌdiiꞌdde uurassicho ka ili Miissiri iche inokhatti dowdowte.

⁴⁰ Aacchinyeteen wihi iche Haruun itidah, ‘Iyookkoyyohi waakkhi orteenyo raaho nah ihaaggi. Iꞌdi tahe wihi Muusahi goorat ili Miissiri nah kasoobahche kayitah ma garanni.’

⁴¹ Maantaase iyookkotoo iꞌdi maartoo u haaggicheene, iyookkotaas soorriyo igoorraheen. Wihi icho dahanohicho ka haaggicheen inkaanyiteene kahamaadeen.

⁴² Iꞌdaasenyi Waakh icho adah kakhabte ꞌdiiche, yiyyihimo Waakh kayeesseene, wahteen. Waha ichoow wihi buuggoo etoo Waákh íyeyyeedo chiire a israahaan. “ ‘Minki Issiraayeloow, soorriyoyyohi atin guꞌh tomon affar hidaad ka goorrahteen, ani igoorrahteen?

⁴³ Atin minki waakkhi beenaate Mooleg layadeeh ichoow yiyyihintiinti waakh lakayeessi Reefan layadeeh iche siꞌddeen, icho a iyookkoyyohi atin haagsatteene ꞌdee atin wahattaan. Maantaka an a atin baabiicha ili Baabiloon ꞌdirihiis atin liibooliya.’

⁴⁴ “Aacchinyeteen goorat hidaad ka eemati saggi Waakh ileejiro tusso iche khabte sissiꞌdatte. Eemataas saggi goorat Waakh Muusa ihaaggi iyidah on liihaaggiche, toro iyookkoti goorat Muusa arge on lakahaaggiche.

⁴⁵ ꞌDaꞌddaboka aacchinyeteen eemataas ooyenyeticho kakhaatatte. Maanti iche Yoochuwa raahte, ili iche gelaan eemataas a isitteen. Waakh la orcho raahe yaafohi Waakh igaranne ilaas kajire rihe. Eemataas la ichoowka geeddi karnati Dawuud layadeeh jire tuumman ilaas a kasooꞌhadde.

⁴⁶ Waakh la weyti Dawuud a jilhaate. Dawuud la usuhi Waákh Yaakoobo fiddiito iyeelo daahe.

⁴⁷ Iꞌdaasenyi Soolomone Waákh min idise.

⁴⁸ “Iꞌdaasenyi Waakkhi Weyti Ween minki dahanohi enenyet diseen ma fiddiyo, iꞌdi ꞌdooꞌdi Waákh íyeyyeedo yadeeh u,

⁴⁹ “ ‘Sereye a komborteeyti buurenye antoote, harra la a komborteeyti rucchule an luhlo korcho. Minki iꞌdohenye idissaan? iche Kamur essa. Ommos inti an kanaso a intoh?

⁵⁰ Dahanohaaya on menya waha tuumman haaggiche?’

⁵¹ “Atin a matah miig mehe? Uurassiin ichoow dogtiin a iꞌdi wihi ꞌdooꞌdi Waakh ikakhuufin. Atin a iꞌdi aacchinyetiinna, kol dakkhan Rubeyti Munyeenye tirrintaan.

⁵² Eti Waákh íyeyyeedo aacchinyetiin sina iomhin a jira? ꞌDooꞌdi emeetti Eti Fissan cheeke laka a bakkisseen. Atin la usu ꞌdub a goosseene toro la dubunuunu tigaaseen.

⁵³ ꞌDooꞌdi goorat herti Waakh ka amurre liikeene a atine, iꞌdaasenyi atin amurretaas ma raahin.”

Isiteefano laseya layagiis

⁵⁴ Jaldaabe chirri iche waha daagte ka weyti hollowte, ichoowka indo gugguꞌduutteen.

⁵⁵ Iꞌdaasenyi Isiteefanohi chirraas Rubeyti Munyee buuhto, goobi Waakh serey iyeye, Waakkhi ababo arge, Yeessohi Waakh anki dahantiisti miigeet toollo arge.

⁵⁶ Wihi us yidah, “Yeya, goobi Waakhe furane Ínam Aadam usuhi Waakh anki dahantiisti miigeet toollo a arga.”

⁵⁷ Iche la weyti riirte, farro nabho isgelisse. Chiꞌiche nabho farro isgelisse ka iche tuummamba Isiteefano ioriite,

⁵⁸ khaatte, ilkerengeet khariche ijiitte, dagah ka saate. ꞌDooꞌdi gar laabe etoo nugule intaas kajire Saawulo layadeeh darfohichoki oroot tuumman ikatabeen.

⁵⁹ Geedda Isiteefano dagah lakachibo layagiis, usu Waakh on wahta, wihi us essi, “Yeessohi Kamure, rubeyteey a kitimaate.”

⁶⁰ Ulla jilbo il kaguꞌdde weyti riire, “Kamur! ꞌDooꞌda uskeela aleeraahin” yidah. Uus yeedaas massiche on rubey gooche, yumuy.