Hilassi Ergaano 28 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wihi Baawulo kurti Malta bicche dahcho kajirto ka yeele

¹ Chirri nah nebey bicche maahne ka, saggi kurtaas bicche dahcho kajirto Malta liiyadeeh abanne.

² ꞌDooꞌdi kurtaas yaal la weyti haag nah tuste. Intaas ka la hir a ꞌdeya il la a roffo. ꞌDooꞌdaas ꞌdabi nah dahammoonni nah ibolkhiche, nah tuumman la nah martiisteen.

³ Baawulo la khorokkoo soobaayiche. Chirra us ꞌdab kachibo ka, toofoo jeenteti kuleeli ꞌdab u soobahe dahantiis khaniine, toro dahan kaallooꞌde.

⁴ Chirri ꞌdooꞌdi ilaas toofi dahan Baawulo kalollooꞌdo arge ka, wihi icho isiyidaaheen, “Eta rumanka diige khaba, a mehe chirri us beyti buure goyaka iumaatan laka, waakkheenki Ki Jiti Fissan Ka Enenyet Hukkumo layadeeh usu jiro a tirte.”

⁵ Iꞌdaasenyi Baawulo toof jillaanjilliche, ꞌdab goya kalugꞌde, walah suujenye kayitah la mele.

⁶ ꞌDooꞌd la Baawulohi sooyombobo suge ommos omoote kasuge. Iꞌdaasenyi inkoo icho geeddi deer sugeene, saggi Baawulo wohoo ikiitaahan icho argeen ka toro maloo addan dowteen. Wihi icho yidaaheen a mehe ya, “Usu a waakkhoo.”

⁷ Chiifi kurtaase Baabiliyos layadeeh la gosashiis intaas ma kadeer. Ulla mujjume nah martiiste orrah seyyah tuummamba nah martitiissa on eheet.

⁸ Aabba Baabiliyos la a maya, adahe kabahta sare a kuleele a jiifa. Baawulo la min gele usu argaa, dahan korche iweeste samaache.

⁹ Inkoo waha tuumman yitaaheen ka, ꞌdooꞌdi intaas kajiro khakkhannan tuumman iyimiyye, lasamaache.

¹⁰ Icho la weyti nah inkaanyiteen. Maanti nah kahno ka wihi nah jit ka raahno tuumman nah siicheen.

Baawulo kurti Malta bicche dahcho kijirto kakaha ili Rooma irta

¹¹ Uuꞌ goorat kooban jejjebeen, hay seyyahe kutte. Koobanhoo ili Alekisaandariya kayimiyye, sumatticho “Waakkhassi Manꞌdaanee,” layadeeh gelle. Koobanha la geeddi hayohi hafari miige jire tuumman Malta on kajireen.

¹² Ilkerengeetti Siirikusaay nimiyye orrah seyyah intaas bariine.

¹³ Intaas ka kooban gelle kahne ilkerengeetti Reegiyo layadeeh gelle. Ibeenki kaas sooraaho ka hafar anki gurro kayimiyye, kahne ibeenki lammaatteet ka ilkerengeetti Bottiwoli gelle, kooban kasooyegne.

¹⁴ Intaas ka ꞌdooꞌdoo Kiriisto rummeeste ꞌhelle, icho la nah waheene teebatoo a leefiddiino. ꞌDeerka intaas kakahne luhlo ka ilkerengeetti Rooma nimiy.

¹⁵ Geeddi nah Rooma igelin ꞌdooꞌdi Kiriisto rummeeste saggi nah inamiit daage, yimiyye, Sokkoti Abbiyo ka or nah kasoodowe. Gaasoo la inti Wetteelinyeti Seyyahe layadeeh ka isꞌhelle. Baawulo la chirri us icho arge ka, Waakh kalaꞌd ilaabe weyti uur miigooche.

¹⁶ Chirri nah ilkerengeetti Rooma gelle ka, Baawulo etoo iskareete yaakhicho laleeꞌdiiche, irte awtiis u keley fiddiye.

Baawulo ilkerengeetti Rooma ka Wori Haaggan cheeka

¹⁷ Inkoo orrah seyyahe kutte ka, Baawulo weynaanti Yaꞌhuud tol iwahe. Chirri icho soourureen ka wihi us iyidah, “Yaaftaay, walah an ꞌdooꞌdeen ichoow hugumme aacchinyeteen miinsane an tirrime mele, eheetteey laka a liikhabte, ilkerengeetti weene Yeerusaleem ka liihide, toro liisookhaate dahanohi sirgaali Rooma ilaas kajiro liigesse.

¹⁸ Icho a ihukkumeene ifurin ꞌdooneen. A mehe walah omoot liikagoocho icho ikaargaan mele.

¹⁹ Iꞌdaasenyi chirri ewweenki Yaꞌhuud iꞌdaas ꞌdiiꞌdo ka iholisse, ani Kaaysar iooye. Iꞌdaasenyi walah an yaafteey kacheekdi mele.

²⁰ Wihi an atin iwahe a wahaas. Innohi isabanni toro isleehawwoonno ꞌdoona. An toolla biingoyyoha ikahidan a jeenteti khajjeeli innohi ꞌdooꞌdi Issiraayele tuumman khajjeello.”

²¹ Wihi icho ilaabeen, “Nah khadaab woraah cheeko nah ili Yaꞌhuudiya kaꞌhelle mele. Toro et yaafteenenye ilaas kayimiyye woraah keene ommos uskeelaah keene mele.

²² Iꞌdaasenyi nah ati malaah daagin ꞌdoonna, iꞌdi tahe saggi meel tuumman ka rabitta at kajirto woricho baabul liikaayyeedo a garanna.”

²³ Ibeenki icho Baawulo ꞌhelaan goocheene, toro la ꞌdooꞌdi inti us fiddiyo yimiy weyti buuraate. Ulla uus chirdeer ichoowka geleb wori dakhi Waakh miinsan idowdowe toro icheeke. Chiirnaanneti Amurre ichoow ti ꞌdooꞌdi Waákh íyeyyeedo idowdowe wori Yeesso miinsane icho isoojiitaa.

²⁴ ꞌDooꞌd gaasoo yeediis raahe, iꞌdaasenyi gaasoo yeediis rummeysawwaaye.

²⁵ Inkoo Baawulo ayta yomboot cheeke ka ꞌdooꞌd iswaaye toro kaheen. Baawulo la wihi us yidah, “Geeddoo meheenye Rubeyti Munyee afi eti Waákh íyeyyeedo Isaaya layadeeh ka aacchinyeteen leeyyeedde. Yeediis la kalla,

²⁶ “ ‘Nyaam ꞌdooꞌda mehe itadeeh ya, “Atin walah a dagansattaane, dagansattaane, iꞌdaasenyi jirtuu ma abattaan. Walah a yeytaane, yeytaane, iꞌdaasenyi jirtuu ma atin gelaan.”

²⁷ A mehe ꞌdooꞌda uurassicho a gaꞌdaale, dogohicho la a ꞌduuꞌdeene, toro la indohicho laka a ꞌduuꞌdeen. Chiꞌiche iꞌdaas ieheynan, indohicho a geeddi icho il argaane, dogo la khabaane, rubeyohicho la a geeddi icho walah abtaan, a geeddi icho ani isoourgiyaane anna samaacho.’

²⁸ “Maantaka waha abda, ribnaanki Waakh ꞌdooꞌd ribo, yaafohi Yaꞌhuud ieheynane liierge, icho la daagaan!”

³⁰ Baawulo la guꞌh lamma tuumman minkoo us kireeste fiddiye. Ulla intaas ka ꞌdooꞌdi argin yimiy tuumman soodowweeste.

³¹ Baawulo intaas ka roorro laan wori dakhi Waakh miinsan cheeke, toro wori Yeesso Kiriistohi Kamure miinsan ꞌdooꞌd abche, et jeyche la mele.