Hilassi Ergaano 26 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo ꞌHeroodhi Agiribbahi lammaatteete ortiis ka isiyeyyeeda

¹ Agiribba ꞌdeerka wihi us Baawulo iyidah, “Antohi at awtaah u isikaayyeeddo a khabta.” Baawulo la dahan ficche iꞌduu isiyeyyeede.

² “Agiribbahi karnate, an maalinka weyti hamaada chirri an ortaah toollo ꞌdee wihi ꞌdooꞌdi Yaꞌhuud ikacheekti ortaah ka isiyeyyeedo.

³ Kach ka la, a jeenteti ati hugummeti Yaꞌhuud ichoow wihi icho worsataan tuumman igaratti. Toollaka a kihawwaasde samacchaar on idaganso.”

⁴ “Yaꞌhuud tuumman uus rucchuleet saggi an ijire a garta. Saggi an uus an delde an ileey ichoow ilkerengeetti weene Yeerusaleem on ifiddiye a gartaan.

⁵ Icho geeddi deer a igarteen. Chirri icho ꞌdoonaan, saggi an Farissaayo ieheet a cheekaan. Farissaayo la, a rabittoo Yaꞌhuude rabitohi addane Yaꞌhuud ꞌdirihiis wihi Waakh ꞌdoono mujjum raahto.

⁶ Wihi toolla liikahukkumo la, a jeenteti an wihi goorat Waakh aacchinyeteenyo iayyiche khajjeel ikakhabo.

⁷ Khajjeela la a ki yaafohi Issiraayele tomon ichoow lammee ibeen ichoow maalim Waakh iwahtaane icho sugaan. Karnatoow jeenteti khajjeelane ꞌdooꞌdi Yaꞌhuud icheekta.

⁸ Atinhi Yaꞌhuude, saggi Waakh ꞌdooꞌdi tuume omoot ikasookahcho wohoo liiubaaꞌdan iigoonna!”

⁹ “Ani rubeyteey laka wihi an tissibe, wihi an abuuꞌd tuummane yeele, antohi magah Yeessohi Naasarete tirrimaa.

¹⁰ An antohi kuhaaniyyohi wewween ka ꞌdooꞌdi Waakhe ittaawe jeela a gesse, maanti layagiis la ani laka a ayyiche.

¹¹ Geeddi buure an kolba minkoo weysiite Yaꞌhuude kabaha koo gela ꞌdee icho jaha toro Yeessohi icho igafaan iholin leheet. Jeenteti an icho weyti iꞌdiiꞌduu, ilkerengeetohi ili yeelan kijiro laka irde, ꞌdee icho sina omhicha.”

Baawulo saggi us anki Waakh ikuurgiye cheeka

¹² “Sulhaassoo iꞌdee ka khadaabi antoote kuhaaniyyohi wewween isiicheen khabaayi anki ilkerengeetti Damaasko miinsade.

¹³ Eti weenoow, geeddi maalimeet jit raahaayi banayhi serey kayimiyye wihi orraheet laka kaababo ani ichoow ꞌdooꞌdi kootte iraaho ꞌdolloheenyo guꞌddeen.

¹⁴ Nah tuummamba il guꞌdubne, anna hooyi afi Ibiraaniya ka, ‘Saawulo, Saawulo, a iꞌdoh ani sina iomhissa? At a iꞌdi heeri wussi ooyohiis tulcho, bolokh isikeeno,’ idowo daage.”

¹⁵ “ꞌDeerka wihi an worsade, ‘Kamur at a ayyo?’ “Kamur la wihi us isoolaabe, ‘An a Yeessohi at sina omhisso.

¹⁶ Toollaka kahe tolosso. An a kisoobahe ꞌdee iꞌdi falfateey u kisoobahsada, garti wihi ani imiinsane at agarte ichoow wihi an yomboka kisootuso laabta.

¹⁷ ꞌDooꞌdaah ichoow yaafohi Yaꞌhuud ieheynane an kiergadi a kaariba.

¹⁸ Icho kiergada ꞌdee walah abissa indo furnamaane, mugꞌdi kasoolaabta banayhi Waakh goya keenta, miigti Seytaan kasoolaabta Waakh iurgiyissa. Iꞌda ka uskeelicho a liikakuta, toro icho laka kakhuufnaanki icho ikakhuufaan ka ꞌdooꞌdi Waakh soobahsate goyaka meessi icho muꞌdane ꞌhelaan.’ ”

Baawulo hiliis cheeka

¹⁹ “ꞌDeerka Agiribbahi karnate, an fooltabchoti an serey ka arge, ma raahiwwaayin.

²⁰ Anna kolooraat ilkerengeetti Damaasko Yeedi Waakh kacheeke. Yomboka ilkerengeetti weene Yeerusaleem ichoow ili Yaꞌhuudiya tuumman ichoow ꞌdooꞌdi Waakh igaranne Yeedi Waakh icheeke. Wihi an cheeke la a saggi icho uskeelicho ikasoonokhtaane icho Waakh ikuurgiyaane, fiddihicho ka saggi icho rumanka uskeel ikasoonokhteen tusaan.

²¹ Jeentetaase ꞌdooꞌdi Yaꞌhuud anihi minki Waakhe buure kajiro ikhabte, iigaasan leheet.

²² Iꞌdaasenyi ichoowka maalinka Waakh a igargaare. Jeenteti toolla an inta itoollo an ꞌdooꞌdi weynaan laa ichoow ꞌdooꞌdi wewween ba ileeyyeedo a jeentetaas. Wihi an eldi a wihi goorat ꞌdooꞌdi Waákh íyeyyeedo ichoow Muusa ba ꞌdee berri a yateehiin cheekeen on.

²³ Wihi icho cheekeen, Ki Lasubhe sina lakawaaricha, toro eti oraate omoot kasookaho yateehe, ꞌdee ꞌdooꞌdiis ichoow yaafohi Yaꞌhuud ieheynan banayhi saggi Waakh icho iribo tusa.”

²⁴ Geedda Baawulo isiyeyyeedo ka, Feestas Baawulo kariire wihi us iyidah, “Baawulo at a sirgo! Soonnaankaahki buure a kisirgooche!”

²⁵ Baawulo wihi us Feestas ilaabe, “Eti ween, an sirgo menye, yeeda an kaayyeedo la a yeedi rummaate, a yeedi eti iiꞌd khabo.

²⁶ Agiribbahi karnate, an roorro laane kileeyyeeda. Wihi an tissibo, at wahanyeyyoha tuumman a garatta. A mehe inti dagsan ma lakayeelin.

²⁷ Agiribbahi karnate, at chiirnaanneti ꞌdooꞌdi goorat Waákh íyeyyeedo a rummeysatta? Saggi at irummeysatti a garda!”

²⁸ Agiribba ꞌdeerka wihi us Baawulo iyidah, “Kol at geedda rucchul on ka et Kiriisto ikayeesso koogtahe?”

²⁹ Baawulo la wihi us ilaabe, “Geeddoo rucchul ommos geeddoo deer eheetteey ka ba, Waakhe daaha ati kalday la menye, ꞌdee ꞌdooꞌdi maalinka idagansati tuumman iꞌdeey u Yeesso kakhuufa, hiinaanka an hidanahe on liihidin menye.”

³⁰ Karnat ichoow gaafana ichoow Beernike ichoow ꞌdooꞌdi addan tuummamba sookahe.

³¹ Min kabaheene, geedda icho isleeyyeedaan wihi icho yidaaheen, “Eta walah us yeelo omoot ommos hiinaan muꞌdan mele.”

³² Agiribba la wihi us Feestas iyidah, “Eta kootte Kaaysar ikooyin ka, a geeddi lafuro.”