Hilassi Ergaano 25 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Feestas Baawulo hukkuma

¹ Inkoo Feestas boroofen yimiyye maan seyyahe kutte ka, Feestas ilkerengeetti weene Kaaysareya kakahe ilkerengeetti weene Yeerusaleem irte.

² Intaas ka kuhaaniyyohi wewween ichoow weynaanti Yaꞌhuud Baawulo cheekatte.

³ Weyti Feestas hawwaasteene siintoo daaheene, ꞌdee Baawulo ilkerengeetti weene Yeerusaleem a isooergo. Iꞌdi tahe icho saggi icho jit ka isugaane iyagiisiin, iche goocheen.

⁴ Feestas wihi us ilaabe, “Baawulo ilkerengeetti Kaaysareya kahidanyahe, anna dowwanoha on intaas inokhda.

⁵ Chirri et wohoo suuje yeele, weynaantiin gaasoo ilkerengeetti Kaaysareya a ileeiratti, wihi atin usu kakhabtaan a cheekatti.”

⁶ Inkoo Feestas geeddi ibeen siyyeettoo ommos ibeen tomontoo icho leejire ka, ilkerengeetti Kaaysareya ikhubte. Saahka inti ꞌdooꞌd lakahukkumo koorronte, amur bahche Baawulo a liikeeno.

⁷ Chirri Baawulo yimiy ka, ꞌdooꞌdi Yaꞌhuude ilkerengeetti weene Yeerusaleem kayimiy usu kakhaarte, wihi ittaawenye huleesenye icho runticho tusin iubaaꞌdan kacheekteen.

⁸ Baawulo la isiyeyyeede, “An uskeel amurreti Yaꞌhuud ommos minki Waakhe buure ommos Kaaysarhi Rooma iween miinsane an yeele mele,” yidah.

⁹ Feestas laka usuhi ꞌdooꞌdi Yaꞌhuud wohoo siicho ꞌdoona, wihi us Baawulo iyidah, “A geeddi at ilkerengeetti weene Yeerusaleem iratti intaas ka orteey ka lakihukkumo?”

¹⁰ Baawulo wihi us ilaabe, “An toolla kootiin Kaaysarhi Rooma goya toolla, inti imasse liikahukkumo a tan. Iꞌdi at mujjum igarattuu, an walah suujenye an ꞌdooꞌdi Yaꞌhuud iyeele mele.

¹¹ Chirri kootiinhi ili Rooma saggi an wohoo liikayagiis yeele gooche la, omoot ma ꞌdiiꞌdo. Iꞌdaasenyi chirri wihi ꞌdooꞌda Yaꞌhuud ikacheekti rume ikajirin, et antohi us dahanohicho ikagesso khabo mele. An Kaaysare iooya,” yidah.

¹² Inkoo Feestas ꞌdooꞌdi usú waanicho leehawwooche ka wihi us iyidah, “At Kaaysare iooyte gone, Kaaysare iiratta!”

Feestas karnati ꞌHerood Agiribbahi lammaatteete wor Baawulo siicha

¹³ Inkoo ibeennetoo kutte ka karnati ꞌHerood Agiribbahi lammaatteete makhaabassoo Beernike layadeeh khabaayi ilkerengeetti Kaaysareya yimiy, Feestase bariitichaa.

¹⁴ Inkoo icho ibeennetoo tuumman baryeen ka, Feestas wihi Baawulo lakacheekti karnat kaleehawwooche, wihi us yidah, “Etoo goorat Feelig hidanyahaayi katabe a jira.

¹⁵ Maanti an ilkerengeetti weene Yeerusaleem irde ka kuhaaniyyohi wewween ichoow ewweenki Yaꞌhuud ba wohoo kacheekteene, usuhi sina liigoocho daaheen.

¹⁶ “Anna wihi an ilaabe, amurreti Rooma ka, eti wohoo lakacheekti tuumman sammata usu ichoow ꞌdooꞌdi walah kacheekti isiꞌheline us isikayeyyeedin, walah layeelo mele.

¹⁷ Maanti icho inta ileeyimaateen ka, ma malmaline, iꞌdaasenyi ibeenki kaas sookhuccho minki ꞌdooꞌd lakahukkumo koorronde, amur bahche usu a lasookhaato.

¹⁸ ꞌDooꞌdi kootte usu walah kacheekti tolossate, toro la wihi suujenye an imure, a kacheektaan idah, walah icho kacheekteen mele.

¹⁹ Wihi icho kacheektaan tuumman a yeedichoki saggi icho Waakh iraahaan miinsan ichoow etoo Yeesso layadeehe yumuyye, Baawulo la a jira essi.

²⁰ Saggi an ayta mujjum ifiiricho ka mal waaye, ꞌdeerka Baawulo worsade usú ilkerengeetti weene Yeerusaleem iran ꞌdoono intaas ka waha lakacheekti ka lahukkumo.

²¹ Chirri Baawulo usuhi lakhuccho ichoowka Kaaysar aytiis goocho iooye ka, ani amuri lakakhuccho ichoowka Kaaysar liigeecho bahche.”

²² Agiribbaha la wihi us Feestas iyidah, “An awteey u anihi eta daago a ꞌdoona.” Feestas la wihi us ilaabe, “Saahta a daagta.”

²³ Ibeenki kaas sooraaho ka Agiribba ichoow Beernike ba intaas yimaateene, enenyet tuumman la gulguubsate inkaanyit tuse. Icho ichoow ꞌdooꞌdi iskar tuumman iween ichoow ꞌdooꞌdi ilkerengeet ka magah khabo tuumman minki ballaaddane yeedad lakadagansati geleen. Amuri Feestas bahche ka, Baawulo lasookhaate.

²⁴ Feestas la wihi us yidah, “Agiribbahi karnate, ichoow ꞌdooꞌdi tuummane inta inno kaleejiro, eta a agartaan! ꞌDooꞌdi Yaꞌhuud tuummane ilkerengeetti weene Yeerusaleem kajiro ichoow ki inta ilkerengeetta Kaaysareya kijiro a idaahe, riire usuhi omoot liigoocho ꞌdoonaan.

²⁵ An walah omoot liikagoocho an kaarge mele. Iꞌdaasenyi jeenteti us Kaaysar ikooye u, anihi Rooma isooergo gooche.

²⁶ Iꞌdaasenyi walah buuho usu miinsane an Kaaysarhi kamure ichiiro an khabo mele. Jeentetaas gon ortiin ikeene, toro kach ka atihi karnate Agiribbaaw iche ortaah keena, ꞌdee chirri walah laawworsate ka, ani laka wihi an Kaaysar ichiiro khaba.

²⁷ Iꞌdi tahe ani ka, ma haaggan chirri an eti hidan Kaaysar iergo sammata an wihi lakacheekte ikhabin.”