Hilassi Ergaano 23 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Baawulo la Jaldaabti Weene Yaꞌhuud indo katoolliche, yeye, “Yaaftaay, an ichoowka maalinka rubeyteeyti suujoon ikacheekan ka, hileey a buuhiche Waakh ortiis ka,” iyidah.

² Kuhaanihi weyti weene Anaaniya layadeeh la ꞌdooꞌdi Baawulo garabiis toollo, amur ibahche af a laguꞌddo.

³ Baawulo ꞌdeerka wihi us iyidah, “Waakh a kiguꞌdda, atiha etoo haaggan iskayeesso! At intaase kafiddiita amurre Muusa ka ihukkunta, iꞌdaasenyi ati rubeytaah amurre Muusa jebissa chaꞌat amuri liikaguꞌddo bihisso.”

⁴ ꞌDooꞌdi kootte Baawulo garabiis toolle la wihi us Baawulo iyidah, “Ati kuhaanihi weyti weene Waakhe abaarta!”

⁵ Baawulo wihi us ilaabe, “Yaaftaay, an saggi us kuhaanihi weyti ween iyahe ma kasin, a mehe wihi chiiran, ‘Eti ꞌdooꞌdaah iween wihi suuje iidaahan.’ ”

⁶ Baawulo ꞌdeerka saggi gaasichekoo Farissaayo itahe, gaasichekoo la Sadukaayo itahe garte Jaldaabti Weene Yaꞌhuud goyaka riire, “Yaaftaay an a Farissaayo, a weeli Farissaayo. Wihi inta ka liikahukkumo a jeenteti an ꞌdooꞌdi tuume berri sookaho ikhajjeelo,” yidah.

⁷ Uus iꞌdaas yidah ka, ꞌdooꞌdi Farissaayo ichoow ki Sadukaayo isleeiriire, ꞌdeerka seley lagowe.

⁸ Iꞌdi tahe Sadukaayo mehe tadeeh ya, omoot ka ma lasookaho, herti Waakh la ma jirto, wahanyeyyohi Waakhe jiro khabo liiargin laka ma jiraan. Iꞌdaasenyi Farissaayo saggi wahaas tuumman ijiraan a cheekta.

⁹ Riirit weyti buuraate ichoowka tagaammetoo amurre Muusa Farissaayee kahte, “Eta suujoon nah kaagarro mele,” tidah. “Eemba hertoo Waakhe leeyeedde, ommos wahanyeyyohoo Waakhe jiro khabo liiargine usu leeyeedde?”

¹⁰ Iriire weyti uskulaatte ichoowka eti iskar tuumman itoollo ichohi Baawulo seley goocho karoore. Amur bahche iskartiis ergate a iratti Baawulo ꞌdooꞌd a soosarto, a sookhaatto uranti iskareet a keento.

¹¹ Saahka ibeen Kamur Baawulo hagga tolossate wihi us yidah, “Wohoo rucchul laka akaroorin! Saggi at ilkerengeetti weene Yeerusaleem ka garteey iyeedde saggaas on ilkerengeetti Rooma ka laka garteey iyeedda.”

ꞌDooꞌdi Yaꞌhuud Baawulo ogoos marma

¹² Ibeenki kaas sooraaho chirdeer ka ꞌdooꞌdoo Yaꞌhuud isꞌhele saggi icho Baawulo iyagiisiin kamasseen. Daatteene, sammata icho Baawulo iigaasan ma golossataane ommos bicche laka ma yabhuubiin.

¹³ ꞌDooꞌdi waha isleegooche tomon affar laka a kuta.

¹⁴ Irteene, kuhaaniyyohi wewween ichoow ewweenki Yaꞌhuud ba iirteene, “Nah a isleedaatanne, sammata nah Baawulo iigaasan ma golossanni,” iyidaaheen.

¹⁵ “Toollaka atin ichoow Jaldaabti Weene Yaꞌhuud ba eti iskar tuumman itoollo farniin iꞌdiicha, Baawulo a sookhaato. Iꞌdi ꞌdooꞌdoo runti wohoo kaabti iskayeela. Nah la a tannabanne usu nagiis geeddi us inta isooeleelin.”

¹⁶ Iꞌdaasenyi Baawulo eysinkiis waha daage, irte, Baawulo minki latoorribo ka icheeke.

¹⁷ Baawulo la etoo koobbintoo iskareet itoollo wahe, “Eta nugul wohoo us eti iskar tuumman itoollo icheekti khaba, khaate igeey,” iyidah.

¹⁸ Et la ínam khaate eti iskar tuumman itoollo igeeche. Etoo koobbintoo iskareet itoollo wihi us yidah, “Eti hidane Baawulo layadeehe eta nugul khaate ati igeey iyidah. A mehe wohoo us kisoocheekti, iche khaba.”

¹⁹ Eti iskar tuumman itoollo eti nugul dahan khabte khaate, ꞌdol geeche, “Mehe isoocheekin ꞌdoonta?” worsate.

²⁰ Ulla wihi us yidah, “ꞌDooꞌdi Yaꞌhuud mehe iskadaage ya, atihi saahta Baawulo Jaldaabti Weene Yaꞌhuud orche keento. Iche la iꞌdi ꞌdooꞌdoo runtoo usu kayowti, iche iskayeessa.

²¹ Alla icho adagansan, iꞌdi tahe ꞌdooꞌdi dagti usú jit ka sugo tomon affar laka a kuta. Icho la a daatteene, sammata icho usu iigaasan ma golossataane ommos bicche laka ma yabhuubiin. Icho la toolla yeedicho a massicheene ati on ayye kaasugaan.”

²² Eti iskar tuumman itoollo eti nugul ꞌdiiche toro leefarme wihi us iyidah, “Saggi at waha ikasoocheekte, etoo kalday laka iicheekin.”

Baawulo Gaafanahi Feelig layadeeh liigeecha

²³ Eti iskar iween ꞌdeerka et lamma kooba koobbintoo iskareet itoollo wahe, wihi us iyidah, “Nyaama, iskarti kud lammee ichoow et tomon teeba faraꞌd korto ichoow et kud lamma toorar khabto ilkerengeetti Kaaysareya iratti soobahcha, ꞌdee sahaꞌd seyyahti ibeen ka a kahto.

²⁴ Baawulo laka faraꞌdoo us koro siicha, Gaafanahi Feelig layadeeh la nebey igeecha,” iyidah.

²⁵ Eti iskar iween sagguu khadaab ichiire.

²⁶ Eti khadaaba soochiiro, a ani Kilaawudiyo Luusiyas. Eti an ichiiro la a atihi weene, gaafaneenye Feelig layadeeh. Nebeytaah ma furatti.

²⁷ ꞌDooꞌdi Yaꞌhuud eta a khabte igaasan leheet. Iꞌdaasenyi iskar khaadde usu ribe, iꞌdi tahe saggi us eti ili Rooma liiekkaacho iyahe a abde.

²⁸ Anna wihi icho usu kacheektaane aban ꞌdoone, khaate, Jaldaabtichoti Weene Yaꞌhuud igeeche.

²⁹ An mehe kase ya, wihi icho usu kacheektaan a wahanyeyyohi amurreti Yaꞌhuud miinsan, iꞌdaasenyi wahanyeyyohaas goya walah omoot liikagoocho ommos lakahido goya kijiro mele.

³⁰ Chirri saggi ꞌdooꞌdoo ogoos iyowti liisoocheeke ka, an chirraas on a kisooerga idah. Anna toro ꞌdooꞌdi usu wohoo kakhabo amur ibahche, wihi icho usu kacheektaan ati a kikeeneen.

³¹ Iskare ꞌdeerka wihi liiyidah yeesse, ibeenkaas goya on Baawulo khaatte ichoowka ilkerengeetti Antibaatiris geesse.

³² Ibeenki kaas sooraaho ka, iskarti luhlo kasohatti uranti minki iskareet inokhatte, ti faraꞌd fuusso la Baawulo orey ileesohatte.

³³ Chirri iskarti faraꞌd fuusso ilkerengeetti Kaaysareya sooeleesse ka, gaafanahi Feelig layadeeh khadaab idiibte, Baawulo laka dahanohiis gelisse.

³⁴ Gaafana khadaab soome, Baawulo boroofenhi us kayimiy worsate. Chirri us saggi us inti Kiliikiya layadeeh ikayimiy abte ka,

³⁵ wihi us yidah, “Chirri ꞌdooꞌdi walah kaacheekti yimiy iche woraah daaga.” ꞌDeerka amuri Baawulo minki buurenye gaafana goorat ꞌHerood dise ka latoorribo bahche.