Hilassi Ergaano 20 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo toro ili Makedooniya ichoow ili ꞌHellas inokhta ꞌdooꞌd Kiriisto uur miigoocha

¹ Chirri kowdo goote ka, Baawulo abatti soowahe, inkoo us icho uur miigooche ka, “A Waakh atin bariisti,” iyidahye, ili Makedooniya ikahe.

² Ulla ilaas tuumman dah kagooche, ꞌdooꞌd Kiriisto wori ittaawe ka uur miigooche, ꞌdaꞌddaboka ili ꞌHellas gele,

³ ilkerengeetti weene Koriinto hay seyyah fiddiye. Ulla kooban ka ili Siiriya ikahin leheet. Iꞌdaasenyi jeenteti ꞌdooꞌdi Yaꞌhuud mal igooche ꞌdee khaban iꞌdoonuu, saggi us ili Makedooniya itabo us inokhti gooche.

⁴ ꞌDooꞌdi usu walhiche a inam Birroki ili Beeroya, Soobarro layadeeh ichoow Aristaarkos ichoow Sekundohi ilkerengeetti ꞌDessaloonika ichoow Gaayohi ili Deerbe. ꞌDooꞌdi ili Aassiya Baawulo walhiche la a Tuuchiko ichoow Turofiimo. Timooti laka Baawulo a walhiche.

⁵ Icho la kooban ka orey isohteene, ilkerengeetti Tuurowa ka nah sugeen.

⁶ Nah la inkoo Daawti Makaateti Liikhasin kutte ka kooban ka ilkerengeetti Fiiliffi kakahne. Ibeen chan sohanne ꞌdooꞌd ilkerengeetti Tuurowa ka toro ikhayne. Teebatoo intaas fiddiine.

Baawulo Ewuutukos omoot kasookahcha

⁷ Ibeenki oraate teebataas ka isinimiy, ꞌdee gololi Kamure isleenahame, toro omoot Yeesso kasooꞌhellaa. Baawulo ꞌdooꞌd Yeedi Waakh icheeke ichoowka ibeen ekka seley kagowe, iꞌdi tahe usuhi ibeenki kaas sooraaho kaho ꞌdoonaa.

⁸ Goonankaas saraate islakaꞌhelo ka taassi ittaawenye jira.

⁹ Geedda Baawulo yeyyeedo la etoo nugule Ewuutukos layadeehe ꞌdohti min kafiddiyo urꞌdumme khaatte. Chirra urꞌdumme khaatte ka, minki seyyahnaatteete saraat kasoodihe ichoowka il guꞌdde. Chirri icho sookkhichaan, a yumuy.

¹⁰ Baawulo la il ikhubte et isiꞌdiiche, dahano kayuubte, “Anahina, et a noolyahee,” yidah.

¹¹ Baawulo ꞌdeerka toro minki saraat ikore, makaate isleeyumheen. Inkoo us icho leeyyeede ichoowka orrahe sookorte ka, katabe.

¹² ꞌDooꞌd eta nugul usuhi nool khaate goob geecheen. Icho la weyti uur lakhobooche.

Baawulo ilkerengeetti Tuurowa kabaha ilkerengeetti Mileeto gela

¹³ Intaas ka Baawulo katabne, kooban gelle, orey isohanne ichoowka ilkerengeetti ꞌdee Baawulo kooban kagelo Assos layadeeh iꞌdulle. Usu iꞌdaas gooche, iꞌdi tahe usu luhlo kasohta, il dah kagoocha ichoowka ꞌdee Assos ka isꞌhella.

¹⁴ Chirri us ilkerengeetti Assos ka nah ꞌhele ka, kooban gelle, ilkerengeetti Miituleene ikahne.

¹⁵ Intaas ka kahne kurti Kiiyos layadeehe bey goya kijirto kakunne, ibeenki lammaatteet ka kurti Saamos layadeehe bey goya kajirto iranne. Ibeenki kaas sooraaho ka ilkerengeetti Mileeto sooeleelle.

¹⁶ Baawulo la usuhi kooban ka ilkerengeetti Efeesso ikuto iche gooche. Usuhi ibeennetoo boroofenhi Aassiya fiddiyo ma ꞌdoonin. A mehe usuhi dowwa ilkerengeetti weene Yeerusaleem chirri iche tateeh ibeenki daawti Beentekos ka eleelo ꞌdoona.

Baawulo ewweenki Efeesso ꞌdaꞌddaboka waanicha

¹⁷ Baawulo la ilkerengeetti Mileeto ka ewweenki urur Kiriistoki ilkerengeetti Efeesso woyo farniin iꞌdiiche, ꞌdee or a kasoodoween.

¹⁸ Chirri icho sooeleeleen ka wihi us iyidah, “Atin rubeytiin saggi an uus maanti kolooraat an boroofenhi Aassiya soogele an atin ileejire a garattaan.

¹⁹ Makhaaballeti Yaꞌhuud kajmeti suujenye igelisse, eheetteey laka, an a isnuglaache toro oytim ka Kamur ihile.

²⁰ Maanti an ꞌdow ka ichoow minassiin ka Yeedi Waakh atin icheeke, wihi indigir atin ikhabo tuumman uureey tuumman ka a atin abche. Iꞌdaasenyi saggi an kolba minkoo igele an Yeedi Waakh atin iabche a garattaan.

²¹ Wihi an ꞌdooꞌdi Yaꞌhuud ichoow ki Yaꞌhuud ieheynan icheeke a ichohi uskeel kasoonokhti ꞌdee Waakh urgiyicho toro Yeessohi Kamureene kakhuufo.

²² “Toolla la Rubeyti Munyee iche ilkerengeetti weene Yeerusaleem iwoyta, wihi intaas ka iyateeh la ma gardi.

²³ Wihi kaldaye an gardi, Rubeyti Munyee a itootoossa, ilkerengeetti ween tuumman ka sina ichoow hiinaan a isugaan.

²⁴ Iꞌdaasenyi jiroteey walah iche ileetahe mele. Wihi ileekhumman, a anihi weyti hol dowo, hili Waakhe Yeessohi Kamure dahanoheey soogesse massicho. Hila la a Wori Haaggane an haaggi Waakhe buurenye inno imunneynan enenyet icheeko.

²⁵ “Wihi an gardi, atinhi an goytiin kasohde, wori dakhi Waakh miinsan atin icheeke, etiin toro yombuu iargo mele.

²⁶ Maantaka wihi an atin icheeko, chirri etiinkoo jit buje, ani ma liiworsati.

²⁷ Iꞌdi tahe wohoo kaldaye Waakh atinhi abattaan ꞌdoono an mujjum atin ikasoocheekin ma jiraan.

²⁸ Rubeyti Munyee iꞌdi ersimohi hoolaate atin kayeesse. Hoolaha la a ꞌdooꞌdi Waakh. Maantaka isyaakhicha toro la hoolahi Rubeyti Munyee dahantiin gelisse tuumman yaakhicha. Ururi Waakhe goorat Yeesso diiggiis ka Waakh igate, yaakhicha toro toorriba giꞌde.

²⁹ A garda, chirri an atin katabe, ꞌdooꞌdi yeedi beenaat ꞌdooꞌd abcho iꞌdi yaayti weyti oore u goytiinna soogela, woy bakkicha.

³⁰ Berri goytiin ka laka ꞌdooꞌdoo wihi rummaat urgiyicho ꞌdee abatti ankicho ijiito a soobaha.

³¹ ꞌDooꞌdi iꞌdaase yuubsada. Toollaka saggi an guꞌh seyyah tuumman bolokh ka an ebba ibeen ichoow maalim ba iwaaniche kasooꞌhela.

³² “Toollaka dahanti Waakh ichoow wori haaggiiski buure miinsane atin gessa. Waakh wora ka atin miigoon a yabuuꞌde, toro la wihi atin muꞌdan ꞌdooꞌdi Waakh munyaache tuumman a leeꞌhessaan.

³³ An chilimme ichoow ꞌdahab ichoow gaaddi etoo addan ma maanjeeran.

³⁴ Saggi an dahanoheey on ka isiwoywoye, toro an dahanoheey on ka ꞌdooꞌdi an khabe laka iwoywoye, a garattaan.

³⁵ Walah tuumman ka saggi inno hol idowno inno ꞌdooꞌdi ꞌdaꞌddaran igargaarro a atin tuse. Anna wihi goorat Yeessohi Kamure yidah iche kasooꞌhele. Kamur mehe yidah ya, ‘Eti walah diibo weyti hamaad khaba ki khaatti ka.’ ”

³⁶ Chirri Baawulo yeyyeed massiche ka, icho tuumman khabaayi jilbo il kaguꞌdde Waakh wahte.

³⁷ Chirra icho usu sorboobtaane icho dongataan ka, icho tuumman ooyeen.

³⁸ Wihi weyti icho kooyiche, a chirri us, “Toro yombuu fooleey ma agartaan,” iyidah. ꞌDeerka raaheene, kooban eleelicheen.